呢間西餐廳之前食過佢佐敦店，原來油麻地呢度都有間，遇上開餐時間就唔駛煩惱食咩
見有晚市套餐，主打肉類，豬牛鷄羊魚都有，梗有一款岩食
呢客南瓜忌廉湯就係是日餐湯配上蒜蓉法包，香甜南瓜味湯質唔太稠，飲完唔會飽咗一半。
飲完湯，小食水牛鷄翼 ($58)就上枱，一客四隻配少少沙律
皮香脆肉嫩，被甜辣醬汁所包圍，辣度輕微放心食，每人兩隻輕易被KO。
套餐主菜要咗呢客美國安格斯西冷牛扒 ($238)，擺盤幾吸引，法邊豆係件扒上，配以煎薯仔及沙律，每種營養(蛋白質，碳水化合物，纖維素代表)都各有擔當.....哈哈!
柯打五成熟，切開仍然見到紅色。先聞到燒烤香味，入口帶幾分嚼口，肉味幾出，點燒汁加芥末，味道唔錯。
餐包杯價值$34嘅飲品，可補差價飲其他，我就梗係嘆杯"飯後啡"，拿鐵上拉出一個天鵝拉花，綿滑奶泡配香濃咖啡香，望住來往彌敦道車輛經過，可以暫時比個腦放輕鬆一吓。
友人就想食漢堡，三款牛肉類漢堡選擇芝士牛肉煙肉蛋漢堡 ($178)，配以黃金拍擋薯條及沙律，份量佔領咗成個木碟
成個漢堡首先被隻煎蛋吸引住，差唔多"姐"晒下面嘅材料。
蛋黃汁代替咗傳統醬汁，嘗試一啖食晒煙肉，漢堡，芝士，番茄及生菜，連埋個鬆軟飽，係...............成功嘅，換來成個口都被塞滿，一啖中有唔同味道與口感，相當滿足。
加埋杯特濃凍朱古力 ($46)，飲佢就好似食咗件客液態朱古力甜品，滿滿朱古力味但又唔太甜，頂部鮮忌廉既香滑又邪惡，正呀!
沒有留言:
張貼留言