同哈比食西餐, 見呢間餐廳環境昏暗, 幾有情調喎, 入坐時已見不少情侶在進餐!
見到枱上有呢款海鮮拼盤($228)宣傳牌, 賣相及價錢都幾吸引, 經商議後決定要一客
侍應送上見實物同照片都幾相符, 珍珠蠔肉比較薄身, 口感唔係好夠, 但食落幾鮮味; 最欣賞係隻西班牙大頭蝦, 真係幾大隻, 肉質鮮甜, 2隻真係唔係幾夠喉!
食完個海鮮拼盤又點會夠, 仲點左呢款二人套餐($298), 都幾多野食!
由餐湯開始(今晚係南瓜湯), 味道偏淡, 但都飲到絲絲南瓜味道
凱撒沙律 - 沙律菜爽脆, 配上芝士咸香, 幾好味
頭盤都有2款, 巴馬火腿蜜瓜 - 薄薄一片咸香味道既巴馬火腿搭係甜蜜瓜上, 咸甜交錯, 但從來無出錯!
青蘋果鵝肝多士 - 厚切鵝肝, 食落唔會有渣, 要趁熱食! 中間夾著一片薄薄青蘋果片, 中和鵝肝既肥膩, 配以薄脆多士, 好邪惡呀!
主菜選了烤澳洲牛柳扒, 五成熟, 切開仍然見到中間係紅色, 食落肉質嫩滑, 肉味都幾出, 食埋伴碟既薯蓉, 果然無選錯
另一款係忌廉汁煙三文魚菠菜意粉, 份量適中, 三文魚碎上, 配以菠菜及洋蔥增加香味, 意粉軟硬度都幾岩我, 唯個忌廉汁味道有點偏咸, 淡口返少少會好D!
甜品有意式奶凍及Dreyer's 士多啤梨雪糕, 奶凍香甜幼滑; 士多啤梨雪糕酸甜味好醒神, 兩種味道又幾唔錯!
最後飲埋杯飲品就完滿結束呢餐有情調既西餐啦!
contact me : gingerszeto@yahoo.com.hk
朋友之前歐遊回來約出黎派手信, 基於安全理由就無去玩埋德國, 所以今晚約會既地點專登㨂選食德國菜(補償返???...哈...!!) 參考網上資料, 呢間評價都好似唔錯, 地點又就腳, 一於打去訂定位!
餐廳面積普通, 入坐時已見有人開緊餐, 另設3間獨立房間, 大電視正在播放球賽
裝潢幾有德國FEEL, 有鹿頭, 德國旗, 坐緊窗口位仲可有街景望下
打開餐牌, 食物種類都幾多, 由前菜沙律, 主菜, 意粉/飯到甜品都有供應
仲提供鷄尾酒/手調飲品類, 咁就先黎一杯 Schnee ($58) 飲下先, 材料包括蘋果及荔枝, 味道清新
友人咩都想試, 就由餐湯開始, 分別點左2款餐湯, 德國經典薯仔湯子($58), 質感好濃厚, 似飲緊薯蓉, 味道幾香
傳統匈牙利燉牛肉湯($58), 望落似羅宋湯, 湯料有紅蘿蔔, 薯仔及牛肉粒, 飲落味道較薯仔湯更濃味
前菜沙律有呢款新鮮三文魚他他香草酸忌廉汁伴溫泉蛋($118), 賣想討好, 蛋汁好香蛋味, 撈埋香滑三文魚粒一齊食, 口感好軟滑, 另外既沙律菜淋上香醋汁, 好醒胃, 為之後既肉食打好基礎
侍應推介呢款燒德國燒腩仔配薯條($188), 燒豬手就食得多, 一於轉食呢款燒腩仔, 一客份量都幾多, 無想像中咁肥, 肉質好嫩滑, 而個皮脆到不得了,燒到唔油膩, 配芥末醬食就最岩, 侍應果然無介紹錯! 呢個時條當然要叫返杯Bitburger Premium Beer ($68)黎伴食啦, 黎食德國菜, 無理由唔飲返杯Beer呀?!
友人係無澱粉質不歡, 叫埋呢個黑松露野什菌忌廉汁濶條麵($148), 一上枱時已經聞到香濃黑松露味, 好多野什菌粒, 每條濶條麵都沾上香滑忌廉汁, 誠意推介比喜歡黑松露既朋友!
食到呢度其實都好飽, 但又想傾耐D, 於是又叫埋甜品, 見到餐牌寫住係Movenpick, 一客夢幻雲呢拿雪糕($45)又點少得, 香幼味濃; 另一款係日本黑芝麻芝士餅($48), 賣相幾得, 芝麻味超濃, 食落又唔覺甜味, 幾特別!
估唔到呢間德國菜餐廳其他菜式都食到, 唔係單一豬手香腸先係招牌菜, 其他菜式都做得出色, 價錢都算合埋, 唔錯唔錯^^
地址 :銅鑼灣駱克道４４７－４４９號中威商業大廈１樓
contact me : gingerszeto@yahoo.com.hk
呢排忙到飛街, 想到以食作為減壓方法, 立即約埋友人一齊去食放題, 最方便地點梗係會諗到係旺角, 呢間可算係區中都算出名既日式放題餐廳
價錢以入座時段訂價, 最貴都係二百零蚊, 限時食2個鐘, 時間都好夠食
去到見到好多人係門口等候安排入座, 一早訂左位, 好快就被安排入座, 望下枱上既食物落單紙, 食物選擇都算多, 包括刺身, 壽司, 小食, 炸物, 燒物, 熱食, 飯/麵食及酒類(啤酒, 清酒及梅酒)
任食仲包埋任飲, 自己去雪櫃拎飲品, 好多款式, 仲有雪糕任食, 唔怕無甜品~
打頭陣當然係食刺身先, 除左落單紙上既白拖羅外, 全部點晒, 三文魚切得都唔細件, 甜蝦亦唔細隻, 個人可以食十幾隻, 總話黎講刺身食落係新鮮既
雖然有人講諣食放題梗唔會壽司呢D咁飽肚野, 但眼見佢好多選擇, 有D係出面唔多見有, 一於點少少試下, 好彩佢SIZE細細, 飯量唔大舊, 一啖一舊都幾過癮, 水準OK!
見到有中華冷麵, 不好飯類既友人雙眼發光, 係要點返一個, 食落夠冰凍, 配料包括青瓜, 蟹柳絲及粟米粒, 淋上酸汁好醒胃!
食完凍野, 開始進行熱食, 點了日式煮珍珠蜆, 食落無沙, 加上有麻油, 都幾香; 另外呢款係日式煮牛肉, 牛肉咬落有肉汁唔太嚡, 味道唔太咸, 空口食都OK!
天婦羅係友人至愛, 係咁易點了幾款, 包括糖心紫蕃薯粒(確係幾甜!), 炸蝦, 南瓜, 全部熱辣辣, 唔係一早炸好等有單就夾比客, 點埋醬汁一齊食都唔錯!
我都唔客氣點了幾款炸物, 包括炸鷄軟骨粒, 芝士年糕及紫薯球, 上枱時仍然都係熱辣辣, 炸物唔熱都幾難食, 最歡喜係個芝士年糕, 咬落香甜, 內裏既軟芝十會咇出黎, 不禁要再追加一轉!
見到有D燒蔬果類, 當然又要試下啦, 呢串燒翠肉瓜及菠蘿, 燒完仍然係咬落有汁, 菠蘿甜度高, 真係愈食愈想食!
收加一服務費, 侍應反應夠快, 等候食物時間唔耐亦無走單, 唔怪之得咁多人幫襯!
地址 ： 旺角西洋菜南街168號3樓全層
contact me : gingerszeto@yahoo.com.hk
對於每天3餐都出街食既人黎講, 多渴望有餐住家菜食, 家庭式菜式, 無味精靚湯, 唔花巧, 或者係你同我由細食到大既餸! 呢間名字咁搞鬼既食店, 與食物聯埋起上黎會諗到健康簡單, 皆因"蒸"者, 係比較健康既烹煮方法!
食店面積普通, 配上鮮紅色椅子好搶眼, 坐得幾舒服!
呢到既茶唔係一般食店所飲到既中國茶, 呢個用焗盎侍用既係八寶茶, 材料包括菊花, 紅棗, 圓肉等, 倒入熱水焗一陣就飲得, 飲得人好舒服, 侍應仲會不斷主動加水, 好細心!
呢度供應套餐/散叫, 價錢合埋, 菜式真係好屋企FEEL, 望下套餐都幾岩胃口, 就唔諗啦!
先黎個冷盤, 包括燻蹄, 牛展及鮑魚, 三款都味道可口, 份量岩岩好!
期待既時候出場啦, 有燉湯飲, 今晚呢款係猴頭菇燉雪耳鷄, 欣賞佢夠晒熱, 湯味夠清, 不燥熱又滋補, 夏天飲都好適合
呢款蒜蓉蒸頭腩, 底層有勝瓜及粉絲, 索晒頭腩既精華, 食落好鮮甜, 而個頭腩配以果皮絲一齊蒸, 食到陣陣果皮香味, 質感腍滑!
荷葉香菇蒸鷄, 荷葉, 金菇菜及粉絲鋪底, 配以開邊紅棗, 杞子及香菇一齊蒸, 鷄肉夠鮮嫩!
蒜蓉炒菜芯呢碟賣相真係好有屋企FEEL, 蒜蓉味好香, 菜芯唔老!
加多個蓮藕煎肉餅 ($78), 出奇地唔用蒸既方法, 煎得個色澤幾靚, 味道幾重味, 用黎送飯好岩胃口, 略嫌食唔到蓮藕既爽口感!
包埋呢個欖菜肉碎炒飯, 炒得夠乾身, 味道調教得幾好!
此店食物標榜無味精, 食物款式夠家庭化, 就似返去屋企食飯咁, 食完都無口渴, 想念家中味道又未能回家食飯時, 呢度可以幫你暫時止到渴.......................
地址 ：觀塘開源道６０號駱駝漆大廈３座１樓Ｑ室
contact me : gingerszeto@yahoo.com.hk
牛奶護膚就聽得多, 驢奶製既護膚品就真係首次聽, 仲有機會親身體驗, 唔知效果係點呢?
呢支就係來自意大利Skin Ceramic 既Donkey Milk Celluminator Essence
驢奶保濕精華 ($168 / 50ml)
具有抗氧化、保濕、抗皺，抗衰老、鎮靜、修復受損皮膚等多種功效; 質地透薄的高濃度營養補濕精華，富含多種發酵精華加快細胞代謝，提升肌膚抵抗力、彈性、改善暗沉，保持肌膚健康。 使用後皮膚透亮彈滑，重現健康活力，散發自然光澤感。
主要成份:
透明質酸及葡聚糖 - 保濕
酵母菌發酵精華 - 改善膚質，去除老化角質，補濕，令肌膚澄淨透亮
乳酸發酵精華 - 保持肌膚健康，活化細胞，提升彈性、抵抗力
馬齒莧及米糠提取物 - 美白，抗皺 ，舒緩，平滑肌膚
韓國製造, 滴管式設計
延展性相當好, 每次只需2-3滴就可足夠搽於全面, 有微香!
使用方法 : 早晚潔膚及爽膚後,取適量塗於面部，續後配合面霜。
早晚使用, 改善暗黃膚色, 觸感更覺柔滑, 補濕效能唔錯, 若然於日間使用, 唔駛再搽面霜都足夠!
此產品由品牌提供, 內容純個人分享
莎莎獨家發售
contact me : gingerszeto@yahoo.com.hk
