對於一D小店向來都有些偏好, 若然由一班後生仔主理既更加會加D分! 星期日訓到自然醒後, 最好就係當然黎個BRUNCH, 今次就黎到長沙灣呢間主打法國菜既餐廳, 享受一個法式星期天!
餐廳面積唔大, 一眼見晒, 後生仔主埋, 裝飾風格偏向型格路線, 燈光昏暗, 給人一種放輕鬆感覺
望下餐牌, BRUNCH既食物選擇都唔少, 仲有以優惠價錢可加埋飲品
我地分別點左LATTE ($10), STRAWBERRY AND PASSIONFRUIT SODA ($10)
雖然係以優惠價加點, 但絶對好飲, LATTE咖啡味香濃, 泡沬幼滑; 而杯SODA即叫即調製, 甜甜酸酸好醒神, 真係買罐汔水都唔止呢個價啦!
天氣好, 心情好, 胃口自然好, 先叫個沙律醒一醒個胃先, 呢款係ALASKA CRAB SALAD ($128)
清新爽口沙律菜打底, 配以唔少份量蟹肉係面, 個COCKTAIL醬汁係自家製, 味道似千島醬汁, 同鮮甜既蟹肉幾夾
BRUNCH既必然選擇, 當然係EGG BENEDICT ($128)
主角選用北海道蛋, 蛋味更濃, 切開仲見到蛋汁流出, 而蛋下面既係餐廳特別搵人訂製既面包, 質感更加能夠索到蛋汁及自家製既HOLLANDAISE SAUCE, 呢款自家製既HOLLANDAISE SAUCE, 味道好香滑, 可以講得係成個菜既靈魂! 而個正確食法原來係菠菜, 菌類, 甘荀仔撈埋醬汁加蛋汁一齊食, 又學到野啦!
另一款就係ALL DAY BREAKFAST ($108)
咁既價錢有咁大份份量, 相當抵食, 所有材料舖滿成集碟, 顏色繽紛, 真係會引起多d人既食慾架! 法式餐廳當然配上鬆脆牛角飽, 充滿香香牛油味, 唔會太大個
個鷄蛋夾住塊煙肉, 好等d煙肉油份可以落入鷄蛋內, 食落更加惹味, 又幾有諗頭喎! 另外對於個薯角亦好欣賞, 好有薯味同上碟時仍然係熱辣辣, 加分!
食得出對待食物既誠意, 環境又舒服, 唔會好嘈吵, 可以輕鬆享受一個愉快星期天 (BRUNCH只限星期六日供應!) 有機會會再幫襯埋佢個晚餐先!
地址 : 長沙灣福榮街512-518號依時大廈地下A舖
contact me : gingerszeto@yahoo.com.hk
知道呢幢大廈有好多食店, 今次黎到14樓搵食, 食咩? 睇到個招牌都知係食意粉
餐廳面積唔算好大, 基本上一眼望晒, 場地適合開私人PARTY, 坐位坐落唔會迫狹, 燈光環境令人幾舒服
開放式KITCHEN, 發現全女班工作, 個個係度忙緊自己工作, 不時傳來陣陣食物香味
打開餐牌, 食物選擇都幾多, 有小食, 沙律, 湯類, 意粉, 甜品及飲品
先黎一個煙三文魚凱撒沙律($68)
份量好大份, 二人份量都有餘, 煙三文魚整成玫瑰花型, 材料有煙肉脆粒, 沙律菜夠爽脆, 醬汁都幾好味
當然要試下意粉, 呢款經典蕃茄肉醬意粉配溫泉疍 ($88) - 蕃茄肉醬味道酸酸味, 當然好味啦, 打均隻溫泉疍撈埋意粉一齊食, 有埋疍汁既香滑, 味道又去到另一層次
忌廉汁野菌大蝦扁意粉(可轉為天使面), $108 - 賣相討好, 天使面口感適中, 大蝦夠爽口彈牙, 若然醬汁方面可多返D就仲好
甜品時間到, 香蕉班戟配Haagen Dazs雪糕(奶茶味), $58 - 班戟配上少少朱古力醬, 切一口連同奶茶糕一齊食, 好味!
另一款甜品為一口西多士, $68 - 一客有成9粒, 餡料入面選擇花生醬(咁先仲似西多士), 亦有一球奶茶雪糕, 一凍一熱, 口感香口美味!!
食完呢餐都幾滿足, 食得出CHEF既誠意, 價錢都幾實惠, 真心希望呢D樓上食店能夠愈開愈多, 等我地都多D開餐選擇
地址 : 銅鑼灣駱克道459-461號The L. Square 14樓
contact me: gingerszeto@yahoo.com.hk
望見餐廳既名字, 腦海裏想到2個字............"懷舊", 究竟食咩菜色架呢?
入到去, 燈光昏暗, 配上粉紅色餐椅, 前點起蠟燭, 有情調得來, 更加增添左古老懷舊味道, 原來呢間餐廳已開業十幾年, 能夠係現今香港可以站得著腳咁耐, 應該有D料子!
唔想用腦諗食咩, 就叫精選晚餐(SET DINNER), 有七款選擇, 價錢由$95-$165, 包餐湯/沙律, 主菜一款及咖啡或茶
加$20湯頪可轉酥皮龍蝦/海鮮湯
我地各自轉為酥皮龍蝦/海鮮湯, 呢款為酥皮龍蝦湯, 湯底好香龍蝦味, 加少少胡椒調下味仲好味道, 配埋熱辣辣香酥皮, 好味又飽肚
我就選擇酥皮海鮮湯 - 材料有青口, 三文魚及蝦, 味道香滑又有鮮味, 三文魚好嫩滑, 唔怪之得呢間咁出名食三文魚, 由於係焗酥皮關係, 成個湯都夠晒熱, 湯夠熱我最LIKE!
主菜我地點左諾曼第烤豬柳配蘋果燒汁 ($98) - 豬柳肉質嫩滑, 配埋酸酸甜甜既蘋果燒汁, 可解肉類既膩感, 食埋個香滑薯蓉, 夠晒飽肚!
不得了..................呢個係蜜糖香草烤德國咸豬手 ($165)
份量完全足夠二人SHARE, 醬汁可自選, 我就選了黑椒汁, 貪佢夠晒香口惹味! 豬手可由代切埋上, 豬手皮係煮到腍身, 並唔係傳統德國咸豬手既硬脆, 食落完全感受到D骨膠原係口中爆發, 而肉亦唔嚡乾, 配埋黑椒汁一齊食, 好滿足~!
飲埋餐飲, 完全係飽和狀態, 價錢相當實惠, 侍應服務態度有禮, 難怪閒日晚上都有九成入座率
地址: 油麻地彌敦道438號鄧氏大廈地下
contact me: gingerszeto@yahoo.com.hk
陪友人買完打槍用品, 行到累累地當然要食返個甜品補下數, 呢頭唔知幾時開多左好多甜品舖, 一諗到想食窩夫, 就自不然雙腳行左入呢間!
由於時間尚早, 夠鐘食甜品既客未到, 唔駛坐得咁迫, 可以慢慢嘆
打開餐牌, 發現除左有甜品外, 原來仲多左咸食, 我地就叫左"特餐" - 芝士腸泡菜辛辣撈面, 送多士, 太陽蛋及柚子冰紅茶 ($24), 相當抵食喎! 份量唔野少, 個辛辣面都幾辣, 若然由撈面變為湯面會好D, 好在有杯柚子冰紅茶解辣
全日早餐真係好多時都見到佢既踪影, 估唔到連呢度都有
$70, 材料豐富, 尤其欣賞佢個迷李牛角酥, 好香脆, 配埋個茄汁豆一齊食, 梗加好味! 仲送埋杯柚子冰紅茶架
好啦.....甜品時間到啦! 由於食左以上兩樣, 飽飽地就唔食窩夫啦, 改食呢款係三色脆蕉可麗餅 ($68)
賣相幾靚仔, 所謂既脆蕉其實係似拔絲香蕉個脆面咁, 用香軟既可麗餅包住香蕉加, 雪糕加杏仁片一齊食, 又硬又軟, 好快被我地KO左啦!
意猶未盡, 再叫多個伯爵紅茶梳乎厘 ($65) - 食到淡淡既伯爵紅茶味, 味道唔太甜, 配埋朱古力雪糕岩岩好
以上2款朱古力雪糕球都係用MOVINPICK, 唔怪之得咁好味啦!
埋單都係二百幾蚊, 就已可以食埋晚餐加甜品, 相當抵食!
地址:旺角廣華街3號百利達廣場地下4號舖
contact me: gingerszeto@yahoo.com.hk
印象中既黑布街係車房為主, 唔知幾時開始就被食店開始佔據, 仲好.....又多一條"食街"
但凡諗唔到有咩想食時, 食日本野出事既機會率.............係低既! 呢間主打串燒手打烏冬既食店, 見到門口食物相片, 相信選擇都幾多, 梗會有野岩食, 一於呢度開餐!
見佢餐牌有三文魚刺身 (八切), $48都好扺食 - 每片都幾厚身, 食落都鮮味, 唔錯!
友人係芝士控, 見到呢個芝士烏冬鍋(可選海鮮/牛肉) $68
份量適中, 選左牛肉配料, 面頭再洒上芝士碎, 芝士汁食落幾香滑, 而烏冬亦彈牙, 食完唔覺好"漏".
見天氣熱熱地, 我就點左呢款天婦羅冷稻庭, $68 - 天婦羅包括炸蝦2隻, 冬菇, 南瓜及蕃薯各一, 炸漿唔厚, 食落熱辣辣, 配埋個冷烏冬一齊食, 一熱一凍, 口感特別! 正^^
見食物水準唔錯, 點多個芝麻鷄翼, $38 - 一客有兩隻, 炸到好皮香肉嫩, 加埋個芝麻香味, 好味!!
二人埋單都係二百幾蚊, 價錢相當合埋, 唔怪之得客人不斷進出, 好彩早D入座, 唔係就要等位啦
地址 : 旺角黑布街19號地下
contact me : gingerszeto@yahoo.com.hk
之前出席Revlon春夏妝品發佈會, 又有機會認識佢地既最新美妝品, 今次口號為LOVE IS ON
活動中包括3個WORKSHOP, 我就選擇參加Floral Art, 經過專業人士教導下, 我都整得似模似樣架
入返正題先, 活動中當然向大家展示各春夏美妝品, 包括: 眼影, 胭脂, 睫毛液, 指甲油及化妝掃
當然唔少得特別介紹全新Ultra HD Matte Lipcolor高清原色啞緻唇膏液及ColorStay持久無瑕二合一底妝組合
品牌仲特別邀請星級化妝師小白為我地作彩妝示範, 並表示呢套新妝品簡單又好用
既然咁吸引, 當然要親自試下啦, 帶左以下產品返屋企
REVLON ColourStay持久無瑕二合一底妝組合 ($185)
4種色調, 呢兩盒係其中兩隻色
粉底及遮瑕二合一, 輕便易用, 一盒塑造自然妝容
遮瑕膏色調與粉底霜專業配對, 唔再擔心妝容膚色不均的尷尬情況; 專為亞洲女性膚色而設, 可提亮膚色, 同時具高度遮瑕, 完美遮蓋毛孔及瑕疵
防汗水配方同時控油, 妝容持久不脫色, 全日完美無油光
粉底貼薄輕盈, 輕易締造亮白清爽的妝容
呢盒係色號240 (Medium Beige), 較為適合膚色較深人士用
而呢盒色號140 (Natural Ochre), 適合膚色較自然人士用
Revlon Ultra HD Matte Lipcolor高清原色啞緻唇膏液 ($108)
8種色調, 其中5隻色就係呢度
由左至右: #600 (Devotion), #610 (Addiction), #625 (Love), #630 (Seduction), #615 (Tempation)
採用獨有的100%無蠟啫喱技術, 質感輕盈, 上色比一般唇膏更均勻及柔滑細緻;
採用Ultra HD極限絶色科技, 顯色度極高
啞緻霧面妝感, 同時水潤柔滑
淡淡雲呢拿和芒果忌廉香味, 醒神怡人
2款產品都好易用, 質地都幾貼服, 包裝簡便易拎出街作補妝, 價錢又親民, 仲唔快D去入貨?!
(使用產品為#240及#615)
產品售賣點: REVLON屈臣氏, 萬寧及莎莎彩妝自助專櫃
有關產品由品牌提供, 內容純個人分享
contact me: gingerszeto@yahoo.com.hk
