早已聽聞呢間日式餐廳性價比高，有時會出現人龍。今日可以早食lunch，早D去拎位。
有吧枱位，今日四人唔岩坐，可以坐四人枱。
掃二維碼落單，超多款午市定食選擇，生熟類都有，一時間花多眼亂。最後決定食……………………………………壽司梅 ($98)
定食套餐包括十款壽司，仲有沙律，茶碗蒸及麵豉湯。
三文魚，赤身，油甘魚，鱆紅魚，日本魷魚，赤海老，玉子，蟹籽，蟹肉蟹膏及三文魚青瓜卷，兩排上下排列。
大路款式，全部都岩食。油甘魚及鱆紅魚比較厚切，入口幾滿足; 飯粒唔會一夾就鬆散，就咁食晒都已經飽肚。
茶碗蒸熱辣蛋滑，食埋就梗加飽肚。飲多杯茶，呢餐咁嘅價位，無得輸。
約咗長輩食飯，開餐活動範圍要近屋企。中菜當然無走鷄，就去咗呢間。
四週貼滿推介特色菜式，有相有真相
唔係斬到碎上，食起黎豐富嘅骨膠原溶入口中。南乳嘅咸香味入晒豬手，但又唔會過濃，仲有紫洋蔥作配料一齊煮，個汁仲可以用黎撈飯食。
呢D椒鹽系香口食物，都係留返出街食。經典代表就有椒鹽鮮魷 ($118)。
每件都似著上”黃金聖衣”，炸漿夠薄脆，唔會食到一口粉都未食到主食材。鮮魷幾爽彈，做到外脆內軟，點埋個喼汁食，送凍飲/啤酒一流。
呢客龍記炸子鷄 ($98)，係呢度嘅招牌菜，出鏡率超高。兩三個人可以叫半隻。
叫得做招牌菜，梗係有D料到。夾起見到鷄皮下無咩多餘脂肪，入口皮脆肉嫩，相當驚喜。
簡單地叫碟蒜蓉白菜仔 ($68)，無沙食到好香蒜蓉味，仲要唔會炒到好油，淋甜好食。
上菜速度快，每樣都熱辣辣，味道唔錯。茶位每人$8，個茶仲幾好飲，唔收加一服務費，都幾抵食。
好友升職自動話要請食飯，咁開心當然要賀一賀佢，就同佢去呢間居酒屋。
被編排坐對住燒爐嘅靠牆位置，可以遠距離睇到串燒部師傅功架。四周掛滿聖誕裝飾，昏黃燈光幾好feel。
黎居酒屋，梗要叫杯凍飲爽吓先，除咗唔同酒類，當然唔少得cocktail/mocktail。
今晚唔”酒”啦，就叫杯雜錦果茶 ($58) 及荔枝梳打 ($48)，前者滿滿果肉粒，微甜茶味幾出; 而後者就充滿荔枝香甜味。
首先出場係温泉蛋慢煮日本鷄肉凱撒沙律 ($98)，擺盤有D心思。温泉蛋上，鷄肉中，再有沙律菜及多士粒。
篤穿蛋黃，再撈均所有材料。温泉蛋黃汁加上少少碎芝士，用黎點嫩滑鷄肉好味呀。
歡喜食玉子燒，自己唔識整嘅話，出街食就係大好機會。呢客明太子伴玉子燒 ($48)，一客四件，以為明太子會包係蛋內，呢度係與白蘿蔔蓉放係蛋上。
兩樣都加D，估唔到白蘿蔔蓉與蛋都好夾，中和咗明太子嘅咸味。
有串燒，最想食免治雞肉棒，呢度仲係自家製 (配鮮蛋黃) $38
沾上蛋黃增加一點香滑感，偶爾食到D鷄軟骨碎有脆感，就係要呢種口感。
跟住有長蔥雞腿串 ($32)及鷄腎串 ($28)，即叫即燒，睇住師傅燒不停。
長蔥同鷄腿肉本來就係一對，長蔥甜味配仍然嫩滑嘅鷄腿肉，輕鬆易食無難度。
雞腎就得夠乾身，有口感，唔夠味嘅可以加七味粉調味。
呢客重量級火焰原隻鷄腿 ($138)，係呢度嘅名物，出鏡率甚高。侍應淋上Voka再點火，震撼眾人嘅視覺。
熄火後，侍應再來幫手分肉。鷄腿肉夠嫩滑，被火燒過後多一點香味，好味。而個燒椰菜入口仲甜美多水份，又係好食。
想再飽肚D，當然要叫D澱粉質，幾款湯烏冬中，叫咗呢客日本產蠔滑蛋稻庭烏冬 ($128)。
內含4隻蠔，都唔算細隻，入口超濃蠔味; 而湯中加咗隻蛋及紫菜碎，令湯底變得厚身，配上滑嘟嘟嘅稻庭烏冬，食完相當暖肚。
仲有燒飯團棒 ($38)，燒得外脆內帶煙韌感，味道帶點微辣，一支揸住食都幾過癮。
無限用餐時間，可以輕輕鬆鬆一邊飲一邊食，氣氛唔錯。
#food #foodie #foodpics
又到月尾，朋友約食飯，想食經濟實惠嘅居酒屋，不期然諗起佢。
秋冬季又係鍋物出場時間，兩個鍋鍋價錢吸引，下次天氣凍D可以叫。
呢度嘅蟹籽沙律 ($60/細)可算係名物，份量超大，用黎打咭無難度。
大量爽口青瓜絲，加上生菜絲，蟹籽及蟹柳，側邊唧上沙律醬圍邊。
入口有清爽感覺，蟹籽係口中嘅爆脆感，就係要呢種口感。
心血來潮想食土佐豆腐，呢客青唐辛子豆腐唐揚煮 ($55)變做”愛的替身”。
汁煮豆腐，醬汁味道比較溫和D，加埋小青椒及紫菜碎，好易入口。
炸物中想食墨魚咀唐揚 ($60)，送上沙律醬伴食。一啖一舊趁熱食，帶點嚼口，佐酒/凍飲岩晒。
友人就點咗大盛魚生丼 ($198)，擺盤吸引。刺身類包括三文魚，吞拿魚，八爪魚，帶子，牡丹蝦，三文魚子及海膽。除咗八爪魚，其餘都係厚切，全部食材差唔多舖滿遮住咗下面個飯。
見到三文魚子及海膽，忍唔住黎個自製鮮上加鮮”丼”，”哦意絲……..”
呢客大蝦野菜天婦羅 ($78)，有3隻蝦再拼茄子，蕃薯，南瓜，青椒仔等，超抵食。
炸漿唔厚，唔會食到一口粉都未食到食材，蝦肉幾彈牙。
有天婦羅，最好就梗係要埋稻庭烏冬 ($62)，一熱一凍，滑嘟嘟口感，自製黃金組合。
食緊之際，侍應送上呢客麻辣風吉列大雞扒配他他醬 ($88)，被佢嘅”體型”嚇一嚇。無諗過唔駛一百蚊就有咁大塊鷄扒。
坦白講唔太食到麻辣味，當佢係一塊吉列鷄扒點他他醬就絶對好OK，熱辣辣入口超脆，鷄肉仲帶肉汁，好邪惡呀…………………
自從食過燒花魚後，若果有機會遇到都會叫。呢客風味花魚燒 ($108)，咁大條原條燒都係呢口價。
加白蘿蔔蓉落去個汁到一齊食，魚皮少少脆，肉帶少少細骨，就咁單食都好好味。
上菜速度幾快，無限你用餐時間，可以分幾輪叫，慢慢享受美食。
