火辣的一餐@炊二哥

 突如其來嘅寒冬，要珍惜呀。咁凍當然想食火鍋溫暖下啦，港式台式火鍋食得多，今晚就食成都四川火鍋，黎個火熱晚上。

 

原來呢間係成都出名嘅火鍋店嘅第一間海外分店，店內裝飾以木為主體，配上昏黃色燈籠點綴。

 

以圍爐煮茶作主題嘅火鍋店，配以矮枱矮椅，又幾特別。

 

坐低後，侍應一次過送上四小格及老鷹茶，四小格包括紅棗，南瓜，栗子及花生。原來晚市會送輕量版圍爐煮茶，未食火鍋前先養下身。

 

將佢地放係火爐上慶返熱就食得，感覺新鮮。自己覺得紅棗及栗子係最好食，配埋杯老鷹茶，初體驗圍爐煮茶感覺都幾好。

 

掃二維碼落單，多款特色火鍋，好似鰻魚滑酸菜鰻骨金湯鍋 / 毛肚火鍋 / 番茄牛腩鍋 / 滑牛肉火鍋 / 鵝腸火鍋等。

 

仲有其他特色小食，就好似呢客鷄胗串燒 ($18/10串)，下底有個小蠟燭慶住。

 

每串有一片鷄胗，灑上惹味孜然粉，好有嚼口。

 

仲有拇指小籠包 ($28)，蒸嘅就食得多，煎嘅又咁精緻嘅真係未食過。口感似迷李生煎包，但外皮無咁厚，加少少黑芝麻係面仲香口，呢口價相當抵食。

 

最後點選滑牛肉火鍋 ($338) 小鍋份量係二人份，辣度除你歡喜，侍應溫替辣度比較強烈，建議食開嘅辣度低一級就可以，所以…………………呢個係特小辣。

 

仲有其他火鍋配料可以追加，既然有火紅鍋底，追加鴨血 ($18)及青荀($18)

 

出面有”混醬”區，若果想中和辣度，侍應話可以醋加麻油點食

 

話咁快就滾起，呢個鍋話係二人份，除咗個鍋夠大，仲好多材料。除咗有主角滑牛肉外，仲有香菜豬肉丸，蝦滑，豬皮， 巴沙魚，蟹柳，脆皮腸，厚切午餐肉，豬腸，冬瓜，竹筍，藕片，豆乾等………

滑牛肉夠大塊之餘，入口真係滑喎。

食到中段鼻水開始流，飲品除咗有香芋奶茶、黑糖奶茶、咖啡奶茶、香蕉奶茶和芝麻奶茶。最後都係叫咗罐可樂 (哈哈……)

 

蝦滑彈牙

 

估佢唔到竟然有鵪鶉蛋，忘記幾耐無食過

 

叫咗一碗白飯二人分，未能完全食晒成個鍋，實在太飽，呢位二哥出品果然夠豪氣。

#ublog #foodblog #foodiehk #hotpot #TKO

太子有好味泰菜@Lost in Thai

 又係花墟買完花，行下行下見到呢間門口以粉綠色做主題，開初以為係Café，原來係食泰菜。

 

電子屏幕不停介紹菜式

 

拉門入去仲有張二人枱，咁就試下啦。掃QR Code落單，牆上掛住當時推介手寫菜式，幾搞鬼。

 

呢客泰式鳯爪沙律 ($68)，望落顏色繽紛，”砌”成個塔型，再淋上酸辣汁。

 

無骨鳯爪入口爽脆，紫洋蔥，芹菜加埋車厘茄就組成沙律擔當。

 

成為泰菜中火紅之星嘅火山骨湯 ($118/小)，呢度都有得食。話叫做湯，其實係酸辣汁。

 

送上膠手套方便進食，成舊揸住夠豪邁; 骨肉輕易被分離，沾上酸辣汁，辣度都唔可以睇少，幾惹味。

 

食到辣辣地，即刻飲返啖泰式龍眼冰 ($32)解下辣，用銀碗裝住加朵蘭花，大量龍眼肉，味道清甜又夠凍。

 

友人對蝦過敏，由炸蝦餅轉為炸魚餅 ($58)

 

即叫即炸，入口熱度十足，口感札實，配酸甜醬係好味嘅。

 

今晚主菜係炒咖喱軟殼蟹 ($168)，兩隻軟殼蟹斬半，伴住大量咖喱汁。

 

軟殼蟹入口香脆，咬落唔會一口油，沾埋D香滑咖喱汁食，仲唔係邪惡之鬼?!

 

咁多咖喱汁，當中又有青紅椒及洋蔥，叫碗白飯是常識吧。

 

甜品想食芒果糯米飯但今晚無，呢碗椰青大菜糕 ($28)絶對係最佳替身。用銀碗裝住應該係自家製，入口有椰青肉清香味，甜度岩岩好。

#foodiehk #foodpics #foodblog #thaifood

發現新菜式@Nam Viet Nam

 一打開升降機門，就已經被呢個霓紅燈箱吸眼球。

 

對越式沙律認識唔多，呢客越式發酵茶葉沙律 ($54)開了我地嘅眼界。

基本上成個沙律口感爽脆，皆因有乾脆嘅茶葉，椰菜絲，青瓜絲，甘荀絲及生菜絲。蕃茄粒平衡返個”濕度”，加埋脆豆及花生，無多餘醬汁，相當健康。

呢客作為小食嘅惹火上身鹹檸豬頸肉 ($70)，出鏡率都幾高，見隔離枱都有叫到。上枱後再點火，就變成咁呢個嘅畫面。

 

火焰好快熄滅，豬頸肉多一分燒香味，點埋個青椒醬(唔辣嘅)，多一份惹味。

食緊豬頸肉之際，接骨木花茶配青蘋果 (熱/$30)及香茅青蘋果 (冷/$25)就送上。前者味道香甜; 後者有淡淡香茅味，幾有清新感覺。

 

呢客紅白配就係火龍芒芒蝦仁配脆蝦片 ($58)。將火龍果粒與芒果粒再加入原隻蝦放上脆蝦片上，腍彈與脆嘅口感一啖有齊晒。

 

好耐無食過撈檬，今晚就會一會佢，黎客炸素食春卷撈檬粉 ($68)，都幾大碗喎。

 

毫不客氣地加入醋汁將佢變成”湯”咁 (哈哈……)，輕輕掛咗係檬粉上，味道偏甜唔會太酸; 而件炸素食春卷肥嘟嘟咁，外皮香脆，入口似食到芋蓉嘅綿口感，唔錯。

最後上枱嘅係烤蔞葉鷄配青蘋果條 (半隻/$90)。

 

以鷄肶嘅大細黎講，呢隻應該係春鷄，烤好後再”舖”上烤蔞葉及炸蒜粒。

 

入口熱度十足，本身隻鷄已經有味道，可以點少少佢嘅特色醬，味道甜甜地有椰子味，同鷄肉都夾嘅。仲有佢嘅青蘋果條，睇色以為會辣但又唔係喎，係咸咸地味嘅青蘋果條，幾得意。

#foodblog #foodie #foodpics #foodblogger #mk