食物水準繼續@將軍會館

 呢個商場共有三期，各式食店都有，放工想去酒樓食小菜，呢間之前食過，絶對可以回頭。

 

手機落單係大趨勢，呢度都唔例外，簡單方便，隨意加單，仲有個總數顯示比你睇，唔怕食大咗。

 

有二人/四人套餐，價錢每位都係百幾蚊

 

凍盤小食除咗醉鷄，仲有呢客沙薑豬手 ($68)。沙薑碎舖滿豬手件，浸得入味，豬手皮爽口，偶爾食到肉，加埋個微酸醬味，真係會令人一舊接一舊架。

 

蟲草花除咗用黎煲湯外，仲可以用黎煮餸。呢客蟲草花翡翠苗 ($88)，顏色吸引，用上湯餚煮，少油少鹽，兩種食材都有嚼口，簡單又健康。

 

歡喜飲湯，尤其係味道清甜嘅。呢盅花膠螺頭爵士湯 ($48)，夠熱足料又大盅，花膠螺頭有嚼口，仲有鷄腳瘦肉，亦見到圓肉紅棗，仲有木瓜，怪唔之得啖湯超甜啦，飲完感覺舒服。

 

多款孖寶套餐，主要都係海鮮搭一個餸

 

今晚就叫虎杉斑孖寶 ($258)

 

第一寶係玉桂乳鴿 (2隻)，即係燒BB鴿

 

滷得相當入味，唔駛點喼汁/淮鹽都夠味; 皮香脆，肉雖然唔多，但作為另一款餐前小食都可以呀。

 

壓軸出場係清蒸虎杉斑，計過數單叫玉桂乳鴿 (2隻)都要$98，而家比多$160就有條斑食下，食魚有益呀。

 

估計有一斤重，一貫酒樓蒸魚方法，淋上甜豉油加上蔥絲，趁熱起筷。

無咩細骨，魚皮帶少少膠質，魚肉都算嫩滑，無蒸過火；甜豉油用黎撈飯又係掂嘅。

 

二人可以坐卡位座，寬敞舒適，上菜速度快，食物出品保持水準，下次可以再叫朋友一齊黎。

#ublog #food #foodie #foodblog #foodblogger #TKO

烤魚界天花板@烤魚工房

 相約表妹食飯，問佢想食咩，答案出乎意料，竟然唔係食日本菜而係想去食烤魚。

 

呢間就係佢帶我去的，仲話係香港最正宗，最地道最愛歡迎的重慶烤魚，長期人龍排隊!

 

由門口望入去，以為去咗卡啦OK，裝修風格相當特別，無諗過係烤魚專門店。

 

霓紅燈作為天花裝飾，主要為卡座，坐得都幾舒適。

 

主打烤魚，仲有串燒及乾鍋，手機落單，簡單方便

 

最先出場係蔥油拌麵 ($36)，材料簡單，撈好就食得。麵條幾彈牙，蔥油加上醬汁，好快食完就上主菜啦。

 

六款口味中，招牌必吃鮮青椒味烤魚

 

三款魚中選擇江團魚 ($329)，未食過就先選小麻小辣。原條即點即烤，成條魚直徑都成個盤咁大，足夠3-4個人食。插埋支廣告紅旗，幾搞鬼。

 

鮮青椒與辣椒碎舖係魚身上，未食已有視覺上嘅衝擊，湯底再滾起就食得。

 

貴些少價錢都選擇食江團魚，皆因少骨，魚肉嫩滑又多，偶然食到魚脂肪，更添點魚油香味。先煎香魚，外皮再帶點微脆，半點腥味也沒有。

 

湯底麻中帶小辣，賜予魚肉刺激感，滾住食，每啖魚肉入口都熱辣辣。

 

雖然湯底中仲有少量金菇同大豆芽，但無阻我吔再叫其他配菜嘅，鴨血，萵荀片，娃絓菜同火鍋粉 (每份$20)。

 

食烤魚呢類濃味食物，又點少得杯凍飲?! 除咗汽水外，仲有多款特色飲品，見水吧職員不停手調製，就知幾咁受歡迎。我都唔執輸，叫杯至尊水果茶 ($43)，多款水果混入茶中，又靚又好飲，仲可以食埋D生果，解渴又解辣。

 

食到咁上下就加配菜，呢度嘅鴨血入口嫩滑，好似食緊果凍口感，與麻辣湯底係絶配; 另外萵荀片要爽脆口感或腍身D都隨我喜好。

 

火鍋粉又係不能缺席，煮至煙韌口感，就咁加湯一齊食，要KO一碗又係無難度。

 

壓軸出場係厚燒牛舌串 ($36/2串)，門口師傅真係無停手咁燒，牛舌有相當厚度，又大件，燒完再灑上孜然粉，成件事即刻變得好川式。

 

今餐真係好味又超飽，估唔到依加食烤魚都變成年輕人嘅喜好，怪唔得整個”香港烤魚界天花板”，年青人一睇就明，哇哈哈………………

#ublog #food #foodie #foodlover #foodblog #重慶烤魚 #川菜 #旺角 #烤魚工房

 

好食好坐好招呼@令和鍋物酒場 (尖沙咀)

 當你食過一間好餐廳後，每當你想食果種菜式時就好自然會諗起佢，呢間絶對係心水居酒屋頭三位

 

居酒屋點可以少得酒?! 呢度成幾個酒櫃提供唔同種類酒款，仲有唎酒師推介

 

今晚就點選青檸梳打 ($28)及呢度嘅熱賣鮮檸檬威士忌梳打 ($58)，前者入口清爽; 後者見到成廿片冰檸檬，飲到威士忌同梳打嘅完美結合，微醺感覺好好FEEL。

 

呢客明太子厚揚串 ($35)，侍應話係新菜式，送凍飲/酒都岩，咁就黎串試下啦

 

炸豆腐上舖上明太子，加埋蔥粒，又幾好味喎。

 

仲有池魚唐揚 ($38)，細細條炸到香脆，成條食都無問題，可以叫侍應比碟沙律醬點食就仲好味，呷一啖梳打，又食一條，正呀。

 

再黎個煙燻牛舌蕃茄沙律 ($68)，沒有半點綠色，以紫洋蔥代替沙律菜

 

選用紫洋蔥無一般洋蔥咁辛辣，牛舌切成薄片，煙燻味唔係太食到，加入開胃醬汁撈均黎食，入口係清爽嘅。

 

每次黎呢度，都必叫北海道花魚一夜干 ($88)，皆因確係抵食

 

成條花魚一夜干燒至皮帶微脆，無細骨，啖啖肉同幾JUICY，點埋個蘿蔔蓉醬汁仲更加好味道。咁嘅價錢有咁高質素，點可以唔叫?!

 

趁仲未係夏天，趕緊黎個壽喜燒。由A4黑毛和牛至美國安格斯都有選擇。我哋就選中間位，M7澳洲和牛配野菜豆腐盤 ($258)

 

呢份M7有200g份量, 大約有6片，肉色相當靚仔，脂肪分佈可以

 

轉色就食得，牛肉已經夠嫩滑，沾上蛋汁食，就雙重滑感，輕鬆食。

 

火鍋追加薩摩赤鷄肉 ($98)，呢度係150g

 

鷄肉幾有彈性，有D鷄味，配埋豉油蛋黃汁一齊食，又滑又香。

 

佈置好和式，坐得都幾舒服，侍應招呼有禮，上花魚同厚揚串時，建議我地趁熱食會更好味，絶對要多回頭。

#ublog #foodblog #foods #foodpics #japanfood #TST #令和鍋物酒場

 

韓食4寶掂掂掂@閔大人

 最初認識”閔大人”呢個名字係韓劇大長金嘅男一，今晚再同”閔大人”有多一層認識係呢度……………

 

粉紅佈置為主色，莫非”閔大人”係粉紅控?! 哇哈哈………

 

食物選擇唔多，主打韓式小食，似專心做好食物為前題

 

首先出場係紫菜飯卷 ($48)，以黑碟作器皿，配以泡菜，簡單有美感

 

材料有蟹柳，青瓜，醃蘿蔔等，飯粒軟硬度適中，灑上芝麻增香口，一啖一舊甜甜地又夠口感，輕鬆易食。

 

每次去韓國，都會係街邊小食檔食韓式炒年糕 ($48)，寒冷天氣食呢D微辣食物特別滋味。

 

年糕加入魚糕片及高麗菜，混入惹味年糕醬汁一齊煮，煙煙韌韌，又令我掛住韓國啦。

 

除咗散叫，仲有主食套餐，可以一次試兩樣嘢，咁就呢客炸醬麵配無骨雞 ($78)

 

原味無骨炸鷄有3件，炸醬麵再分開上

 

先食炸雞，一咬D炸皮發出”嚓”一聲，繼而有D脆皮掉下; 鷄肉唔乾身亦已調好味道，單食都唔錯。

 

而個炸醬麵，配上青瓜絲頂部，中間有炸醬，底部就係麵條

撈均後就開動，炸醬味道唔會過濃，混入煙韌麵條，偶爾食到少少肉片及青瓜絲，最驚喜係唔油，唔似其他韓食店食完個碟仲有成吋油係度。

 

炸鷄有無骨/有骨比你選擇，友人決定要有骨鷄，呢度係半份 ($98)，離遠見侍應送黎時已經話………………咁大份嘅?! 有無搞錯係全份呀 (哈哈)

 

可配搭唔同口味/醬汁，今晚各自各精菜，點咗2款醬汁 (各加$10) : 蜜糖芥末及山葵美奶滋，仲有炸鷄嘅好拍檔酸蘿蔔粒。

 

即叫即炸，所以炸鷄山係壓軸出場………

 

油溫控制好好，所以外皮可以炸至乾身，入面嘅鷄肉亦可保持肉汁，同埋唔會食到一口油。隻鷄應該係細碼，鷄骨亦炸至頗腍身，有時連埋D鷄肉一齊食埋都無咩問題。

 

一黃(蜜糖芥末)，甜中帶微辛

一白(山葵美奶滋)，甜奶滑中帶點wasabi嗆鼻

 

兩者都不分高下，想”點”就”點”……….呢度嘅炸鷄性價比相當高。

 

呢度仲提供各式窩夫甜品，二人共享/自私食亦得

 

本來係諗住叫架，但實在太飽，唯有下次先，仲可以叫多杯咖啡慢慢嘆。

#ublog #food #foodpic #TKO #koreanfood #chickens #foodblog