久仰佢嘅大名，但唔知點解未有機會去食，點知機會就係今晚。與住附近嘅友人交收後就係度開餐兼聚舊。
店內以中式為裝修主題，柔和燈光幾舒服，我地被安排坐卡位，正。
手機落單後，就開始調配我地個”混醬”
一辣一唔辣鴛鴦湯底 ；招牌一手辣方麻辣紅油 ($108)同椰子雞湯 ($118)，照顧到唔食得辣嘅友人。
先講麻辣湯底，辣度由BB辣開始 (呢個係BB辣)，辣度果然係BB級，麻香味滾起時開始飄入鼻腔，口水已開始流
而個椰子雞湯，除咗有椰子同鷄件外，仲有少少杞子及紅棗，果然滋補又養身，未落食材前先飲咗一碗，有椰子清甜味。
有人話露營必須酒…………..我就諗起火鍋必須……………..牛。除非你唔食牛肉，否則點都會叫碟靚牛作亮點。佢有幾款牛肉拼盤，一次過可以試晒幾個唔同部位。但我地就情有獨中美國牛頸脊 ($198)，份量都對眼，二人食岩岩好。
肉色係靚仔嘅，每片都帶點厚度，入口肉汁同脂香味爆出黎，肉質柔軟得黎又帶點嚼口，同兩款湯底都夾。
友人火煱食材中必會叫魚，呢客新鮮脆肉鯇腩 ($108)就岩佢啦
腩位無咩骨，入口有脆度，魚味就稍為淡口D。
食麻辣湯底，有D膽拖食材自然會出現係腦海中，例如招牌劉毛肚 ($88)
即係黑栢葉，千祈咪烚過龍，否則會變韌。呢D厚薄度就只需廿秒度就可以。索咗少少麻辣湯，口感爽脆。
仲有佢嘅好拍擋…………….團圓鴨血 ($68)，又係麻辣湯底必食
真身果然夠圓，烚完都仲可以完整地夾起。口感嫩滑，無得輸。
丸類選擇都令我地諗咗一陣，最終由手打牛筋丸 ($68)跑出。
粒粒飽滿，浮起就食得。咬落結實又彈牙，入面充滿肉汁，兩啖一粒夠口感。
綠色代表有萵荀 ($38)及皇帝菜 ($38)，前者爽甜; 後者腍甜，兩種唔同口感，擔當火鍋雙綠。
依加嘅湯底可謂集各食材嘅精華，叫客粉絲 ($38)黎索湯，好味又飽肚。
本來想食埋紅糖糍粑作甜品，但睇少咗粉絲嘅威力，唯有留待下次啦。
#ublog #food #foodie #foodihk #重慶火鍋 #又一 城 #劉一手
