正正因為競爭大, 火鍋店唔有新點子好難突圍而出, 呢間環境佈置走型格路線, 不停播住流行外語歌, 有別於傳統火鍋店!
友人話呢間D火鍋湯底夠多選擇又特別, 名字甚為搞鬼, 令人會心微笑
好似今晚呢個叫"酒火入鍋" ($328), 整個湯鍋分為5格, 5種不同湯底為木瓜鍋, 蕃茄波士頓龍蝦鍋, 清湯牛腩鍋, 四川麻辣鍋及潮州沙嗲鍋, 味道有濃味有淡味, 配合唔同火鍋配料, 產生美妙效果!
選好湯底就到火鍋食材啦, 種類由海鮮, 肉類, 手打丸類, 自家製餃類, 蔬菜類等, 每類都幾多選擇! 仲有刺身及小炒類供應, 唔止火鍋咁簡單!
首先送上係二人海鮮拼盤 ($368), 擺盤靚仔, 海產包括蟶子, 扇貝, 大蜆, 海中蝦及花甲, 賣相每樣望落都新鮮, 配搭清甜木瓜鍋, 令海產類變得更為鮮甜! 貝類口感爽脆及蝦肉彈牙, 唯蟶子有少少沙!
又點左我最愛牛頸脊啦, 以掛架式上, 底下有大量冰粒既能保持生肉溫度, 又可避免直接接觸冰粒及後溶解水, 好方法呀!呢客頂級安格斯牛頸脊 ($188/小), 排列整齊, 肉色靚仔, 脂肪分佈平均, 薄薄一片烚十零秒就食得, 肉味幾香, 同個潮州沙嗲鍋好夾喎!
睇餐牌已經被呢個酒鍋手工熊 ($88)相片所吸引住, 呃LIKE之選
但烚完之後變到阿媽都唔認得, 食落就知其實佢係墨魚丸黎, 見到墨魚粒, 口感彈牙!
呢客三拼福袋 ($160), 包住唔同餡料 :黃色係牛肉丸；黑色係蝦丸；白色係春蛋，驚喜度高，唔放入口都唔知入邊係咩！
身為芝士控的我, 又點可以錯過呢客芝士年輪呢?! 咬落滿口creamy芝士, 香甜好味!
見到有麻辣湯底，必然要叫佢好拍檔 - 鴨血 ($68)出場, 切成件狀, 即使烚完都唔會碎晒, 入口都幾嫩滑!
呢客紫菜响鈴 ($58)差唔多每必叫, 有別於一般响鈴, 入邊多了片紫菜, 脆炸後食落多一份紫菜鮮味, 點埋個酸甜醬汁, 減低肥膩感! 推介呀!
火鍋又點可能無菜, 呢客蔬菜拼盤 ($58)相當抵食, 有幾款菜如生菜, 白菜及娃娃菜, 另有車厘茄及南瓜件, 顏色紅綠配相當吸睛! 烚於蕃茄波士頓龍蝦鍋就更清甜!
呢度除提供啤酒及其他酒類外, 仲有特式飲品, 好似呢杯荔枝特飲, 荔枝肉加埋梳打, 飲落有荔枝甜美及梳打口感, 用黎食火鍋時飲好GUR呀!
呢到有戶外酒吧區, 吸煙人士癮起時可以唔駛走落街食, 相當貼心!
酒鍋：尖沙咀天文台道 8號2樓號舖
contact me : gingerszeto@yahoo.com.hk
