Chill級好味@Muze Mozz

 要係太子區搵食，除咗出名餃子店外，警局附近仲有個酒吧區。行下行下見到呢間門口幾岩feel，除咗飲嘢，仲可以開埋餐

牆上壁畫夠搶眼，帶比人另一種風景; 高椅都坐得幾舒服，燈光柔和又聽住令人身體不由自主跟住拍子微動嘅歌曲，令人放輕鬆。

多款酒精類/Mocktail以供選擇，天氣持續炎熱，望住呢兩杯咁清新綠色系飲品，未飲已眼睛消暑。Passion Dream ($68)以熱情果為擔當，香甜可口; Mojito ($88)加入薄荷青檸同梳打水，RUM酒賜予微醺感覺，感覺幾正。

先上冷盤，呢客西班牙八爪魚沙律 ($108)，顏色配搭比人一種開心感覺

慢煮過嘅西班牙八爪魚，入口柔軟帶少少嚼口，鮮甜味滲入口腔內; 清脆沙律菜與車厘茄微妙配搭，加入和風沙律汁，味道甜中帶少酸，怡人開胃。

十多款Tapas中，想試吓西班牙馬鈴薯蛋餅 ($48)，2件配以沙律菜，相當抵食

金黃色蛋餅內有煙肉及馬鈴薯，口感似食緊日式蛋卷，唔係死實實; 加入煙肉帶有少少咸香，馬鈴薯豐富咗整體口感，唔錯。

一向鍾情於蒜油意粉，今晚有得食之餘仲有埋海鮮..............................西班牙蒜油海鮮意粉 ($138)是也

蜆，青口梅花間竹式圍邊，仲有爽口蝦球

每條意粉有口感之餘，各自披上蒜油戰衣，入口香滑亦有辣椒及蒜香味，份量足夠二人分享。

好味嘅嘢絶對值得稍等一下....................................發現MOZZ法式焗釀春鷄 ($158)係食評嘅出鏡率偏高，當然要跟隊。

春鷄內釀入磨菇碎，一切開鷄肉汁已流出，鷄肉相當嫩滑，皮下無半點脂肪，焗後變得香脆，老土D都要講句:真係皮脆肉嫩呀.......................

以為隻鷄已經係亮點，"薯"不知底下原來有彩蛋，薯片入口帶脆度，似自家製焗到脆身嘅薯片，上面嘅鷄汁精華多少都滲入D，薯片有除咗有薯味仲有鷄味，超有驚喜呀!!!!

感覺呢餐係Chill住食，我已經諗定下次黎到要食咩啦........................

#bar #restaurant #太子 #dinner #chill #food #foodpics #tasty #foodblog

新店晚市有八折@友義氣.酸菜魚

 係呢幢商場樓上，每層都被各式餐廳佔據咗，隔一陣再黎，你會發現又有新食店進場，就好似呢一間

店內有卡座及小圓枱，二人開餐或三五知己都適合

早到仲有卡位，快D睇下餐牌有咩食先................呢度提供川粵菜式，無論你食辣唔食辣都照顧到

每間餐廳煮嘅酸菜魚都有自己出菜準則，今晚食呢客酸菜魚 ($238)，有埋個魚頭上盤，若果有埋條尾就賣相仲好D

辣度有得選擇，我哋初試小辣，辣椒乾份量相應地減少，灑上少少菊花瓣裝飾。

無骨魚片入口滑溜，食得相當輕鬆。

酸度比較溫和，侍應話下次可以要求加酸度，其他配料仲有金菇，酸菜，大荳芽及紅薯粉條，呢個標準份量，二人分享岩岩好。

送飯擔當.............有雙蔥尖椒爆牛肉 ($108)，大量尖椒京蔥配牛肉

牛肉夠大塊，嫩滑之餘食唔到梳打粉味，正! 尖椒有D辣度，加埋惹味醬汁一齊炒，幹掉一碗白飯絶無難度。

食緊濃味食物，就好想飲杯凍飲，除咗汽水外，仲有其他梳打/乳酸特飲，呢杯就係荔枝梳打 ($26)，有荔枝爆珠，一咬荔枝香甜味爆出黎，爽呀。

新店開業，晚市全單有八折優惠，食得更爽皮。

#blog #food #foodblog #foodpics #CWB #spicy

幸福就是咁簡單@幸福鳥

 上次與友人都想食尖沙咀分店，但可惜唔夠時間最終無食到，點知原來全新分店設於太古中心，今次血拼完仲唔即刻"飛雲"上身?! 哈..哈......

店內設計靈感源自從明治時代開始的日本文化重鎮京都深度構想(Kyoto Second Look)，令人感覺猶如置身於京都。對於依加仲未可以自由行嘅港人帶來一點慰藉。

見餐牌多以海鮮為題，但可惜今晚無飛機貨返店，無緣食刺身..............唔緊要，大把其他嘢食!

燒雞泡魚干 $68，味道偏甜，燒至軟身，點沙律醬食邪惡指數激增，係佐酒小食佳品。

極上牛舌 $88，分成四件，每件都帶點厚度，食起黎夠口感; 只係加鹽同黑椒碎作調味就已經足夠，嘅少少檸檬汁提味就仲岩FEEL，入口軟滑有牛舌味，推介呀!

幸福鳥免治軟骨雞肉 $68，汁燒完再灑上少少芝麻

傳統上係點生鷄蛋汁一齊食，外面燒得香脆，又有蛋汁嘅香滑及濕潤感，內裏食到鷄軟骨嘅脆度，好味呀。

炸雞球，炸得表面唔會油淋淋

伴以沙律醬趁熱食，炸醬外皮帶點微辣度，唔太厚身，鷄肉亦嫩滑。

沖繩菠蘿 $38，燒得外帶微脆，內裏仍然爆汁，多汁之餘甜中帶微酸，可作為清新一下味蕾。

蒜香粟米 $58，有4件，口感仲有少少生嘅爽脆，唔係烚熟先再燒，香甜粟米汁係口腔爆出黎，蒜香味唔重。

豆腐 $38，質感同味道有點似土佐豆腐，但淡味好多，加點鰹魚碎多一點鮮味。

汁燒原條九州槍魷魚 $158，份量都唔細條，切得排列整齊，仲有少少薑末比你伴食

汁燒得黎唔乾身，柔軟易嚼

主菜黎個牛肉壽喜燒鍋 $188，無跟飯/烏冬

上枱後侍應先注入壽喜燒汁，滾起牛肉轉色就食得，其他配料如洋蔥，金菇，豆腐，津白及芋絲等

牛肉薄切，入口嫩滑，加埋壽喜燒汁嘅香甜味，"餓E司"。

侍應主動加茶及收碟，上菜速度適中，適合二人或三五知己飲吓酒食吓嘢輕鬆一番。

食咗當去咗@黑木亭

 外遊返港隔離日子變3+4，好多人即時都計劃返"鄉下"。個人都再睇定D先，搵間有日本風嘅居酒屋止吓癮

呢間上到去真係有九成似去咗日本嘅居酒屋，呢D位打咭影相拎LIKE無難度

時間尚早，仲可以坐到卡位

逢星期一至三幫襯，女士們送棉花糖特飲，未開餐先興奮.........CHEERS

友人無得飲，佢都要叫返杯，"捨命陪君子"啦，叫咗呢兩杯蜜桃烏龍熊茶 ($58)同北海道芒果乳酸 ($48)。外型咁得意嘅蜜桃烏龍熊茶，熊仔型嘅冰粒落入蜜桃烏龍茶，一飲有香甜蜜桃味; 而杯北海道芒果乳酸就有妾芒果香味，加入乳酸又甜中帶酸，夏天飲岩晒…

飲緊嘢之際，呢客牛肉三色椒配武士辣醬 ($38)及燒汁牛肉金菇卷 ($58)就上枱啦。前者帶少少辣味，後者就有燒汁嘅甜味，兩舊牛肉都入口有肉汁，調味岩岩好。

再嚟多客牛油芝士鐵板帶子 ($68)，二人分享岩岩好

用牛油煎香咗嘅帶子，面頭仲加上半熔芝士，邪惡指數再多啲，一啖一隻，"哦E司嘅呢.............."

是日主角霸氣登場.............喜之次魚王木桶飯配鯛魚湯 ($448)

見樓下做緊重點推介，差唔多半價優惠，無理由唔叫返個食吓

半條喜之次"霸佔"了半個木桶面，煎香咗嘅喜之次，魚肉超嫩滑，外皮帶點香脆，好好食，連魚頭都唔可以放過。

除咗喜之次，仲有少少魚生，如吞拿魚蓉，三文魚及鯛魚粒，仲有甜蛋一件，砌埋可以變成魚生丼飯一碗

食晒魚後，個鯛魚湯可加入木桶飯(內有芝士條及飯素)，變成魚湯飯，魚湯味幾濃，加少少芥末調味，飽肚又暖和，一個木桶飯有幾個食法，正呀。

今餐又係食咗當去咗，日本.....你等我呀!