係呢個商場買完野又到開餐時間，咁多餐廳選擇中，雙腳不由自主地又行去呢間…………哈哈。
冷盤有四喜烤夫 ($48)，份量二人分享啱啱好
烤夫夠入味，鬆軟口感; 配埋木耳及毛豆，加幾分唔同口感。
惹味之選有干煸四季豆 ($62)。以蝦米肉碎加埋濃味醬汁一齊炒嘅四季豆，入口有豆嘅甜味，亦食到蝦米嘅咸香味，用黎送飯就一流。
食得餛飩多，今次試下唐芹水餃麵 ($52)，清湯底，配兩條小棠菜，賣相相當清淡。
皮身有點厚度，咬入食到微香唐芹味，豬肉填滿整隻水餃。
上海菜中，例牌會叫碗酸辣湯麵 ($55)，大大碗，二人分享都可以
湯中嘅配料主要有豆腐，木耳，冬菇及荀; 湯底唔算好”杰”，酸辣度溫和
麵條係幼身，軟硬度適中，湯汁可以掛上。
以呢客炸饅頭 ($32)為甜品，即叫即炸，金黃色外脆內鬆軟，加埋香甜煉奶點食，點忍得住唔一件接一件。
食完仲可以嘆多壺茶先埋單。
#foodblog #food #foodie #foodpics #上海菜
係銅鑼灣開餐，想搵間坐得舒服又唔太嘈雜嘅，行入少少呢條街都有唔錯嘅選擇，例如呢間。
裝修風格走簡約型格路線，有咖啡豆及相關產品出售。
食物選擇唔係話太多，沙律/漢堡/意粉/飯/輕食及甜品都有供應，當然有一系列特色咖啡/啤酒
炎炎夏日，見到呢客意大利布袋芝士蕃茄沙律配意大利陳醋 ($118)就心心眼啦。
有齊我歡喜嘅食材，切開個水牛芝士呢一刻，唔知點解感有種莫名嘅治癒感。
餐牌上寫係用意大利陳醋，但實物就用上香草醬汁，無咗份酸甜醒神味道，換黎多一點草青香味。將呢個紅綠白配一齊食，爆汁嘅蕃茄與奶香嘅軟滑芝士齊齊係我口中battle，完勝。
友人主食要和風鰻魚飯 ($158)，份量相當足夠。
以滑蛋奄列包住白飯，再放燒好嘅鰻魚及紫菜絲，和風味倍增。
三樣野一啖過，先食到醬汁鰻魚然後到滑蛋包飯，超滿足。
漢堡類有三款，分別為素菜/豬肋漢堡同埋我呢款手打安格斯牛肉漢堡配薯條 ($138)
以漢堡嘅厚度，應該一啖係食唔到底
要讚嘅係飽身有烤過嘅，食起黎鬆軟得黎亦有D脆口，除咗有多肉汁嘅手打牛肉漢堡外，仲有片煙肉，唔係求其煎，入口有食豬肉乾嘅味道; 配以芝士，蕃茄同生菜呢D最佳拍檔，看似簡簡單單但又D驚喜位。
甜品未出場，呢杯Flat White ($45)先。拉個心心花比我，綿滑奶泡中輕輕滲出咖啡香，趁熱嘆啖先。
嚟啦嚟啦………遠處見到侍應拎住呢客法式焦糖班戟 ($108)行埋黎我地張枱。
層香脆焦糖好似頂帽咁帶咗係件班戟上，以大量吉士醬圍住，邪惡度未食已夠高分。
班戟口感較紮實，唔係日式空氣感，沾滿香甜幼滑嘅吉士醬一齊食，好味到無朋友。
呢餐可以放空咁享受，聽住帶點節奏嘅歌曲，又可舒服地同友人傾吓計，GOOD。
#foodblog #foodie #food #foodpics #CWB #coffee #dinner
未到七八月，天氣已經咁熱，搞到胃口都差D，想食D濃味食物”喚醒”返佢。簡單D就去食川菜，呢間位置方便易搵。
叫個涼盤打個頭陣，上海菜有醉鷄，川菜有藤香鷄 ($66)
㕑師比咗個鷄肶我地 (心心眼)，鷄肉嫩滑唔在講，浸得相當入味，有藤椒嘅獨有香味，咸咸地單食都幾好味。
發現川菜中嘅小炒都係”偷飯賊”，呢客蓮藕仔炒鯛魚片 ($98)正正係好例子
以甜椒，木耳，芹菜，洋蔥，辣椒及蓮藕仔炒鯛魚片，蓮藕仔外貎係迷你版，但口感味道似食緊酸荀，過癮喎。
整體味道係惹味嘅，少少辣幾令人開胃口，而鯛魚片完全無細骨，食得輕鬆又放心。
叫咗個招牌香鍋，任選最少五樣餸即炒，有香辣/麻辣(可選辣度)/醬香三款醬料，唔食辣嘅可以叫醬香，未試過醬香，今次試下咩味先。
呢鍋食材有新鮮鮑魚 (4隻/$68)，豬皮 ($36)，花菜 ($26)，牛肚 ($46)及鷄件 ($42)。
醬香味道濃味中帶少少甜味，基本上與大部份食材都夾到。鮑魚厚肉，口感彈牙，去埋殼食起黎相當方便。
選擇豬皮同花菜嘅原因係前者索醬汁應該效果唔錯; 而花菜都常於川菜中見到嘅蔬菜，”入鄉隨俗”囉。
而豬肚同鷄件都各自沾上惹味醬汁，用黎配白飯一流。
叫多杯凍檸樂一路飲，一路食，爽呀。
#foodblog #food #foodie #foodpics #MK #川菜 #香鍋
呢間潮州菜館真係愈開愈多，今次開到黎鰂魚涌
裝修風格走典雅風，部份位置以屏風作間隔，私隱度提升
途經滷味部，一隻隻滷水鵝已準備就緒
未點餸，先送上功夫茶及咸脆花生作見面禮，先飲為敬。
歡喜飲湯，多款湯水選擇，我就要咗二十年老菜甫燉鮮豬肚湯 ($78)
熱度相當夠，味道比起胡椒豬肚湯為清淡，飲到少少胡椒味，微辛又香; 豬肚入口腍滑，飲完感覺舒服。
另一客湯係潮菜中有名嘅護國菜 ($68)，真係第一次食。顏色碧綠，中間有幾條瑤柱絲提鮮。
入口比起粥更滑，材料主要係菠菜及魚肉，打爛成蓉再煮成湯。食到菠菜及魚肉味道，感覺相當有營養。
馬友係潮州人喜愛嘅魚，經常以此入饌，整成魚飯。呢客潮州凍馬友 ($398)，亦落戶於呢度。
整條以鹽醃製再清蒸，放涼上碟時已起鱗及主骨，切成一件件，方便易食。
魚油量比其他魚略高，肉質細緻及帶魚油香味，配以普寧豆醬，再加點咸香味。
魚肉已有D咸味，用潮州粥 ($15) 配食亦岩數。
食潮菜又點少得滷水，想食多幾款，就可以試下招牌鵝三寶 ($298)，三寶即係鵝件，鵝肝同鵝腸，底部仲有豆腐。
鵝件斬至細件，皮下略帶肥膏，肉質鬆化及滷得夠入味，點蒜醋水食是常識吧。
鵝肝有四片，厚薄適中，入口軟滑無腥味，無浪費quota
仲有鵝腸，係新鮮架，仍保留少少肥膏，口感爽脆，同冰鮮比嘅真係另一個層次。
通菜配惹味醬汁炒就多數無得輸，潮菜就用豆醬炒，就變成豆醬炒通菜 ($118)，想再好味D，就落埋蒜粒，送飯一流。
本來想食埋甜品，但實在太飽，唯有留返下次。
#ublog #foodblog #foodpics #foodie
