想食私房菜, 通常都會多幾個飯友一齊食, 今次少少地2個人就上左去呢間私房菜
早已預備好餐單, 名為"精心配"2人餐($338/位)
呢3款精美頭盤, 材料都係有益健康: 有機沙律菜伴芝麻醬, 顏色吸引, 口感爽脆既沙律菜配以微辛辣既芝麻醬, 夠醒神; 涼伴黑木耳, 爽脆口感; 紫薯配鮮淮山, 紫白小方粒灑上花生碎粒, 增加香味之餘亦能提升味道!
另一款既小食係呢個賣相吸引既茶燻流心蛋伴黑魚子醬配厚切茄子, 流心蛋黃汁上有少少黑魚子醬, 侍應提議先食隻蛋先, 軟滑流心蛋食到少少煙燻香味; 跟住到個厚切茄子, 泡油到外皮脆口, 內裏仍然保持嫩滑, 個醬汁濃味之餘亦好惹味, 配搭淡口既茄子食係好岩數!
跟住到我最喜愛既燉湯出場, 原盅燉姬松茸淮山甘荀黑毛豚肉湯 (位上), 一放底係枱上已經聞到香味, 原盅上見到材料豐富, 包括姬松茸, 淮山, 甘荀黑,毛豚肉, 仲有螺片, 啖湯味道清甜唔油膩, 熱辣辣飲完感覺好舒服!
名字好靚既蝦球水芙蓉, 原來係鮮蝦球係滑滑水蛋上, 蝦球爽口, 水蛋蒸得滑口, 就咁食都可以, 食到蛋香味!
肉類出場啦, 夏天最岩以生果入饌, 呢味士多啤梨豚肉伴草莓就正正係咁, 肥瘦適中既豚肉配以味道酸甜既士多啤梨醬汁, 底層伴以香脆窩巴, 口感上軟下脆, 幾特別的一味餸!
侍應推介呢款蒜香極佳級PRIME牛仔柳 ($60), 牛仔柳切成片狀, 入口幾嫩滑, 配以大量炸香既蒜片, 但被惹味醬汁整"淋"左, 如果唔係會更好食!
食完肉類, 點都要食返D菜均衡下既, 呢客米王湯浸碧綠溫室菜苗, 以米水底煮成個湯底, 飲落有米香, 質感似飲緊忌廉湯般滑身, 而個菜苗色質嫩綠, 食起黎鮮嫩及甜, 感覺清新!
確實需要點飯氣, 呢客荷香蒜蓉海斑片原籠蒸鴛鴦飯, 滑身蒜蓉海斑片放係紅白米上一齊蒸, 籠內有塊荷葉墊底, 飯粒索晒佢既荷香味, 配以海斑片一齊食都好岩口味, 而且一客份量都唔少, 兩個人確係需要點"食力"去完成!
最後以呢個精心甜鮮果匯拼作為呢餐既完滿句號, 火龍果, 菠蘿及西瓜切成粒狀, 粒粒都甜美多汁, 用叉吉住食都幾過癮!
總括黎講呢餐私房菜無論食物配搭及餐單設計都看得出有心思, 由淡轉濃再由濃變淡, 層次味道有所轉變, 令人"食力"得以繼續, 腰胃吋數增加多少少都無所謂啦~
contact me : gingerszeto@yahoo.com.hk
今個月份既公眾假期係無既, 咁唔開心既日子當然要搵個好地方食一餐靚BRUNCH, 呢度位處18樓, 個景觀都算幾開場, 場內播住輕快流行曲, 係度食一餐海鮮都確實唔錯!
打開餐牌見到食物由頭盤小食, 湯/沙律, 意大利飯/粉, 主菜及甜品一應俱全
飲品類亦有唔少選擇, 由紅/白酒到COCKTAIL/MOCKTAIL都有, 係咁風和日麗既午餐時間, 飲呢2杯Peach on the Beach及Orange Squash, 顏色搶眼, 飲落清新,作為呢餐既開胃飲品都唔錯!
是日生蠔有來自美國及法國, 揸唔定主意時, 侍應會因應你既口味喜好而推介
今次叫左呢兩種, 包括美國既Pacific Rock, 體型較為大隻, 淡口D但食落較爽脆; 而另一款為法國Majestic, 體型嬌少但蠔味濃D, aftertast仲有鮮甜味, 兩款都唔錯, 食得出係新鮮貨!
小食點了呢款好受歡迎既路易斯安那特色蟹餅, 以鐵PAN送上保持溫度, 成個蟹餅係由蟹肉組成, 加入洋䓤粒增加香味, 配上少辣醬汁, 惹味得黎仍然食到蟹肉既鮮甜味, 喜歡食蟹但又唔想剝殼既友人表示相當滿意!
賣相靚仔既芝士煙肉焗薯皮亦係呢度既招牌小食之一, 香脆既煙肉粒灑係焗透既薯皮上, 伴以清新香滑既酸忌廉或微辣既Sa Sa醬, 各式其色!
黎度呢到當然要食以新奧爾良煮法既熱船長海鮮拼盤, 可選3, 5或8種海鮮, 加自選醬汁
即叫即煮, 上枱時會以一個藍色網袋包住個膠袋, 賣相相當搞鬼! 同佢影完相後, 侍應會將個膠袋搖晃, 作用係將醬汁同海鮮一併撈均, 哈.....幾特別既做法!
我地就點左3款:八爪魚仔, 扇貝, 翡翠螺另加虎蝦配卡彊蒜蓉汁，3款海鮮都有咬口及食落鮮甜, 而最欣賞係隻虎蝦夠大隻, 蝦肉彈牙, 點上惹味帶微辣既醬汁, 辣味加上鮮味=好味!
枱上備有膠圍裙, 夾同小叉及盛殼桶, 方便客人食海鮮時過程順利, 相當細心!
除左自選海鮮外, 拼盤內仲有粟米, 腸仔及薯仔, 同樣滋味, 食晒都好夠飽肚!
甜品有法式西多士配自選雪糕, 浸滿牛奶而煎香既西多士, 口感外脆內軟, 再加上焦糖既香味, 誠意之作, 淺藍色既雪糕球係海鹽味, 嗒落有少少咸味, 幾過癮的!
有飲有食, 環境坐得舒服, 回頭率相當高!
The Captain House : 尖沙咀厚福街8號H8 18樓
contact me : gingerszeto@yahoo.com.hk
友人相約於呢區黎個飯聚, 呢間係佢之前食過向我推介, 店內面積唔算大, 昏暗燈光配以木製餐桌椅, 似走工業風格!
見到個餐廳名有Coffee呢個字都估到店主應該會係一個咖啡愛好者, 其中一幅牆寫上呢組字句就令我更加相信我既推斷係正確!
侍應送上餐牌, 食物種類大致分頭盤, 沙律, 主菜, 意粉/飯類, 甜品及飲品, 基本上全套西餐用餐項目都包括晒係度!
將紐西蘭青口, 以茴香, 羅勒, 意大利蕃茜, 茴香酒汁一齊煮既呢客菜就成為今晚既頭盤, 每隻青口都算幾飽滿, 排列整齊地上菜, 口感幾有咬口, 食到青口味, 個汁味道帶點咸鮮味, 兩者係幾夾!
估唔到係呢間西餐廳會出現呢客泰式青芒果沙律(加鷄肉另加$20), 將青芒果, 青瓜, 甘荀及鷄肉切絲, 再灑上香脆花生碎, 內裏仲有金不換絲一食就知係泰式沙律, 甜酸味道, 咬落各種配料都係口感爽口, 最正係鷄肉唔嚡口, 好岩呢種悶熱天氣食, 開胃又醒神!
主菜係呢客燒本地鮮魚柳配燒波士頓龍蝦半隻伴香蒜牛油汁, 擺盤精美, 雪白龍蝦肉配上橙紅色龍蝦籽, 份外迷人, 肉質頗彈牙; 件魚柳薄薄一片燒得皮脆肉嫩, 食落有少少咸鮮味, 好好味; 另外個香蒜牛油汁搽左落個食材到先燒, 增加佢既誘人程度!
為左增加飽肚感, 叫左呢客紅酒慢煮牛尾燴意大利飯, 講真要煮好食意大利飯真係唔容易, 要控制佢既軟硬程度都頗考廚師既經驗, 呢客可算係合格之上, 飯粒完全索左個醬汁味道, 食落充滿牛肉味道, 而配料亦都包含蘿蔔及甜椒粒, 加添香甜味; 件牛尾雖然得一件, 但可能就係物以罕為貴, 要你記住佢濃香牛肉味及肉質, 紅酒煮牛尾從來都係好拍檔!
食到呢度, 當然唔少得要埋甜品啦, 呢客係餐廳招牌甜品 : 咖啡煮啤梨配朱古力金寶及開心果碎, 賣相靚仔
原個啤梨以咖啡煮, 咖啡香味滲入去啤梨, 切開係"內藏"雪糕, 食落有香甜多汁啤梨口感, 再加上甜美雪糕及香脆開心果碎一齊食, 幾重口感, 滋味無限及帶來驚喜喎!
呢間餐廳以咖啡為主打, 梗要叫返杯Cappacino同綠茶Latte, 兩杯入口感覺細滑, 食完呢餐再慢慢享受咖啡, 沉醉於店內播住既輕快歌曲, 慢活一晚............................
Urban Coffee Roaster : 尖沙咀碧桃仙路7號美麗都大廈地下44號舖
contact me : gingerszeto@yahoo.com.hk
首次上黎位於銅鑼灣既SHISEIDO Beauty Centre進行皮膚免疫力測試, 中心內放滿全線產品, 令人目不暇給!
點解要進行皮膚免疫力測試? 因為佢而黎囉.........................新產品, 早用早享受!
首先利用呢部儀器進行大約5分鐘既皮膚免疫力測試, 分別於面部幾個位置作測試
再得出幾方面既數據(包括: 眼, 面頰防禦力, 皮膚水份, 彈性及黑色素), 嗚呀...............與良好仍有一大段距離!
好彩嗚呀過後專業既美容顧問就拎出今次主角, 連精美禮盒一齊送上, 好靚呀! 教埋我點用後我就帶佢回家LU!
就係呢支ULTIMUNE Power Infusing Concentrate 紅妍肌活精華 ($860 / 50ml)
全球首支激活肌膚免疫力的再生精華，獨有31項專利配方，當中的ULTIMUNE ComplexTM激活免疫力複合物，能直接激活朗格罕氏細胞機能，重設肌膚免疫保安系統，回復緊緻、亮澤和年輕的膚質。可與其他精華素同時使用!
早晚清潔面部爽膚後使用
唧咀設計, 揼取份量容易
質地超柔滑, 非常容易推開, 帶有少少香味, 推均後皮膚即時回復亮澤
揼2下份量就足夠全面, 將精華以向上打圈動作塗勻全面, 之後再塗取後續護膚品(如用開既精華素及面霜)
用後皮膚重拾應有光澤, 望落明亮精神有活力感
用左個幾月後, 又再次上去Beauty Centre做多次皮膚免疫力測試, 哇.............今次數據結果明顯有好大進步呀, 呢支紅妍肌活精華果然幫到手呀! 愛死呢支紅色小物^^
有關產品由品牌提供, 內容純個人感受/分享
contact me : gingerszeto@yahoo.com.hk
