呢間非一般越南裝修嘅越南菜餐廳，霓紅燈箱係正餐廳中間，打開升降門好難唔望佢一眼
肚餓啦就快快點菜，先叫D小食先
將米紙炸脆做成餅底，就變成呢客脆米紙薄餅 ($54)
配上爽口青瓜及蘿蔔絲，加入越式香腸粒，咸香有口感，再縱橫交錯咁唧上沙律醬，作為輕量小食都唔錯!
SHAKE SHAKE 並唔係薯條嘅專利，鷄軟骨 ($52)都得架，將辣粉隨意倒入紙袋再SHAKE
登登...................就變成帶有辣味嘅鷄軟骨，唧D檸檬汁更清新，香脆熱辣鷄軟骨帶有金不煥香味，一啖一舊，相當過癮!
食咁多煎炸嘢，又點少得唔叫返杯凍飲呀?! 微藻檸檬薑茶 ($28)及咸檸七 ($18)，一藍一黃，前者少甜帶檸檬味，薑味稍淡; 後者就香濃咸檸味，同樣清新醒神!
食越南菜好少會叫法包，但見隔離枱果客幾吸引，於是"跟機"，就係呢客NVN南越法式麵包 ($78)
切開2件容易食及分享，香脆法包一咬就容易咬開，餡料包括扎肉鷄肉，亦係配上爽口青瓜及蘿蔔絲，唧埋沙律醬，一啖有齊澱粉質，蛋白質及纖維，每人半件岩岩好!
店內有個燈箱寫住Pho Forever，越菜最具代表性之一當然唔少得Pho! 呢客招牌金邊粉 ($88)，材料舖滿咗個碗面，包括牛尾，牛腩，牛筋，牛丸，牛肉，仲有一節"索湯油物"...................油條
湯底滿滿香濃牛味，鮮甜湯味配上少少煙韌金邊粉，一啖牛肉一啖牛丸又一舊牛筋，牛氣充天呀!
上菜速度快，食完都可以叫多杯嘢飲傾下計!
contact me : gingerszeto@yahoo.com.hk
