有時放假唔想出街, 夜晚開餐時就會過去附近搵食, 尤其係去觀塘, 未必要係地標商場先有野食, 附近工業區一帶都有好選擇! 之前係呢座活化左既工廈其中一層食過飯, 係大堂已經見到呢間出名食芝士鷄煲既火鍋店原來係呢到都開左間新店, 名字加多左個"Live"字, 咩葫蘆賣咩葯呢? 一於試下!
佔地全層, 面積相當寬敞, 新開張關係, 店內未完全開放晒, 行入少少已經被呢部籃球機吸引住, 火鍋配籃球機, 係咩玩法呀? 好玩囉! 你試過食食下可以出去玩舖先未呀?! 我未試過, 我真係未試過................但呢度就有得試啦! 唔知遲D會唔會仲有多D遊戲機玩呢?!
見到呢SET樂器, 就知道"Live"係咩意思啦, 根據侍應透露, 呢度逢星期二及五晚會有音樂人係度玩Live, 火鍋配Live Band，我諗得呢度至有, 真係地方大就是任性!
燈光環境昏暗, 有別於一般火鍋店, 設有卡位, 坐得幾舒適!
我上黎係為搵食, 講返呢度既食物先, 最出名當然係黃金芝士鷄煲, 仲有火焰麻辣鷄煲
火鍋配料選擇種類都唔少, 欣賞佢蔬菜, 菇菌及丸類設有半份, 可以試多幾款!
今晚想只食火鍋, 所以就叫左呢個皮蛋芫茜湯 ($68)做湯底, 開初以為只係得皮蛋芫茜, 原來仲有粟米, 紅蘿蔔及豆腐, 材料十足, 湯底清甜都唔錯!
呢碟手切新鮮牛頸脊 ($208/小)係我至愛, 小既份量都唔少呀, 足夠2-3人食, 肉色靚, 每片切得大細適中, 最怕烚完得返好細片! 食落口充滿肉香味又唔肥膩, 超愛吃!
手打鮮墨丸 ($68), 一客有8粒, 夾落去烚時, 感覺軟綿綿, 但烚熟放入口時就感到無比彈牙, 仲食到墨魚粒係入面, 食到鮮味墨魚味!
脆鯇片 ($58), 每片切得相當薄身, 烚完都無咩走樣, 口感爽脆, 唯食時要小心肉內細骨!
粟米 ($18), 如果知個湯底有粟米既就應該唔會再叫, 但好在甜度夠, 食多幾舊都無問題!
食度下半場個湯底已經夠鮮甜味, 加埋呢款鮮製冰豆腐 ($22), 索晒D湯入內, 質感鬆軟, 食時小心被熱湯燙傷呀!!
只設加一服務費, 不設醬油費(提供豉油及辣椒絲), 侍應為年輕人, 服務反應夠快, 不時主動加水及湯, 食得舒適, 冷氣夠勁, 下次要夾岩有Live Band表演時再黎過!
米走鷄Live : 觀塘興業街4號The Wave 3樓
contact me : gingerszeto@yahoo.com.hk
睇飲食節目介紹台式火鍋就見得多, 最為人熟悉既當然係麻辣火鍋, 但有次經過呢坐大廈見有個大燈箱, 有間係食台式火鍋, 除左大路既麻辣湯底外, 仲有幾款特色鍋底, 一於試下!
店內環境佈置得幾古色古香, 昏暗燈光加上播住好有"禪味"既純音樂, 幾特別, 特設二人枱, 枱邊設有放食物架, 就算叫到一枱食物都唔怕無位擺!
出面有個醬汁自助吧, 一起來混醬吧.............
打開落單紙, 先選擇想要既鍋底, 總共有六款鍋底; 火鍋配料都唔少, 有D仲幾有台灣特色, 另設有台式小食類(如甜不辣, 鹽酥柯仔等) 未開始火鍋可以先食呢D先!
最後比呢個名為"美人鍋"($188)既鍋底吸引住, 材料包括原隻烏鷄,桃膠, 配以杞子, 南棗, 元肉及金南火腿等, 味道清甜, 滋陰補虛勞, 而桃膠含膠原蛋白, 食落口感似雪蛤膏, 飲完呢碗湯, 當堂覺得自己靚左...........哈!
食火鍋當然唔少得一碟靚牛, 想叫既牛頸脊咁岩今晚無貨, 改為叫呢碟上選美國安格斯肉眼肥牛 ($158), 一客份量都幾多, 油脂分佈都幾平均, 切成薄片輕輕灼一灼就食得, 肉質幾滑但肉味就無牛頸脊咁濃!
叫左呢款鵝肝墨魚丸 ($38/半份), 好想試下鵝肝墨魚合埋一齊會係咩味道?! 墨魚丸咬落超級彈牙, 每啖都食到墨魚粒, 而內裏就包左粒鵝肝, 會見到佢既油流出, 食落又唔會覺油膩, 兩者既結合係好味既!
通常對於"自家製"呢三個字會有D要求, 話明自家製, 若然整得唔好食都會扣幾多分, 叫左呢客自家製極品水餃 ($38/半份), 皮薄餡料足, 咬落食到原隻鮮蝦, 食落夠彈牙, 其餘材料有木耳絲及香滑豬肉, 味道相當唔錯!
台式特式火鍋配料鴨血 ($48)呢度都有, 一客已切好一片片, 灼一陣等佢翻熱就食得, 口感超級嫩滑, 淋少少醬油加上䓤粒一齊食超好味!
習慣若然個底係岩口味既, 會叫呢個索湯至勁既千層凍豆腐 ($38), 吸收晒湯既精華, 一咬D湯汁"咇"晒出黎(幾住唔好"辣"親個口), 好過癮!
最後叫埋呢個寬粉條 ($28), 無需灼太耐, 口感煙韌, 似食紅薯粉但口感更滑溜, 食完超滿足!
食物質素唔錯, 侍應反應夠快, 不時為你加湯及茶, 難怪客似雲來!
養心殿台式養心鍋 :旺角彌敦道６０７號新興大廈１樓１０６號舖
contact me : gingerszeto@yahoo.com.hk
如果我話比你知有個地方可以用一個價錢, 食盡3個不同款式既食物, 係咪聽落都吸引呢? 我見個呢個宣傳........我真係見過呢個宣傳!
我講緊既係呢個由北角海逸酒店為慶祝香港特別行政區成立20週年而設既"Mega 星級美酒佳餚自助晚餐", 只設一場於6月30日, 用餐時間由晚上六時至十時, 共有4小時可遊走3個不同格調的餐廳 (The Points, Greens Cafe, 海逸軒)享受美酒佳餚, 又幾特別喎!
可以先同友人係The Point大堂酒吧輕鬆下, 備有各式美酒/特色鷄尾酒, 設有現場樂隊演奏1997年的經典樂曲, 仲特設點唱環節, 保證聽出耳油, 與三五知己飲住野, 食住小食, 一邊欣賞歌手美妙歌聲, 一邊寫意傾計, 何等美事呀...........
胃口一開就可以去到隔離既Greens Cafe享受不同時令美食, 今期係主打海鮮, 上次食過確係唔錯 (詳請可睇返有關博文)
反而今次想重點介紹海逸軒中餐廳
係門口已經見到中餐廳既威水史, 尤其係點心就更為出色, 有D期待喎...................
供應多款指定精緻中式點心, 美食及甜品, 只需係落單紙落單就OK
既然點心組拎過獎, 當然要試下點心先, 先點香麻叉燒酥, 上枱時仍然係熱辣辣, 焗至金黃色既酥皮, 咬落去十分鬆化, 有芝麻更加增添香味, 內裏饀料份量我覺得OK, 唔會有太多叉燒令你覺得好"滯", 加埋焗完後仍然食到有少少醬汁, 唔會食到一口"乾"!
另一款係我至愛既蘿蔔絲酥餅, 件件外形飽滿, 咬落鬆化, 欣賞佢既蘿蔔絲仍然食到少少爽脆感, 唔會整到腍晒一PAT野咁, 仲可以食到佢既清甜味道, 相當唔錯!
稱得上"皇", 外型一定要有番咁上下, 呢籠龍蝦餃皇, 四隻漲卜卜既身型差唔多迫爆個蒸籠, 外皮煙韌, 饀料有主角彈牙龍蝦肉, 雙重口感, 餃上加上金片作點綴, 更添貴氣!
另一款回本之選係呢個賣相精緻既原隻椰皇松露燉鮮鮑湯, 一個椰皇內放滿左所有材料, 飲落清甜, 聞落有香甜椰皇味, 加埋隻鮮鮑魚, 滋味無比, 平時少湯水既我不禁要黎多個!
回本之作首選呢客焗釀鮮蟹蓋, 蟹蓋內全是絲絲蟹肉, 配以洋䓤粒, 再舖上麵包糠拎去焗至金黃色, 外香內軟, 食到蟹肉既鮮甜味, 真係啖啖蟹肉無花假, 喜歡既可以伴以少少醋汁再提鮮!
能夠以人名去冠名既應該都有返咁上下水準, 呢碟傑哥叉燒, 充滿光澤既叉燒雙行並排而至, 每件大小厚薄適中, 肉質有少少嚼勁, 口感幾好, 咀嚼中肉汁係口內爆出, 肥瘦亦適中, 加多碗白飯就perfect啦!
另一款燒味脆皮燒腩仔, 切成一口SIZE容易食, 皮脆肉多汁, 點少少芥末刺激一下味蕾, 減底肥膩感!
蝴蝶乳豬件, 賣相精緻, 好似食緊北京填鴨咁, 以薄飽皮包住乳豬件, 軟熟既飽皮加上脆香乳豬, 雙重口感!
外出食野都喜歡係屋企煮都有難度既餸, 呢隻脆皮炸子鷄係其中之一款, 賣相相當誘人, 外皮炸到香脆, 皮與肉之間不帶有過多肥膏, 肉嫩就唔在講, 就算連鷄胸肉口感都唔太嚡, 調教既味道亦濃淡適中, 果然係一隻好味既炸子鷄!
甜品都有幾款選擇, 包括薑汁燉鮮奶, 蛋白杏仁茶, 柚子凍糕, 最回本既當然係呢款天山雪蓮木瓜川貝燉秋梨, 料足味清甜, 滋潤身體就最岩食!
想像到食晒3個地方既各式美食會有幾咁滿足, 只做呢日, 實行用"肚滿腸肥"既姿態去迎接呢個咁特別既日子啦!
溫馨提示 : 頭50名賓客於酒店網上商店訂位仲可享85折優惠, 早訂平幾舊! (星級美酒佳餚自助晚餐名額: 180位)
北角海逸酒店 : 北角英皇道665號
contact me : gingerszeto@yahoo.com.hk
食力女子組又係時候"開會", 大家都未能有共識想食咩, 突然有人提出去食自助餐, 咩都有得食又岩我地各組員既"食力", 係鰂魚涌返工既組員提議去呢間:
主題係嚐"鮮", 鮮係指海鮮既鮮, 非常大路, 應該大部份人都喜歡食海鮮既, 我地當然唔例外啦..............
去食自助餐好多時都被忽略既係沙律, 呢度有多款特式沙律, 有其他沙律菜配料, 可以比你自家製喜歡既沙律, 我呢款簡易版凱撒沙律配煙三文魚及凍火腿都唔錯呀!
回本必食之一當然係生蠔啦, 每日新鮮精美生蠔, 今晚係黎自紐西蘭, 細細隻但食落口感嫩滑多汁, 輕輕咀嚼已可以從喉嚨滑下, 唔好講咁多, 先食半打為敬!
回本必食之二係各類凍海鮮, 呢度有蝦, 蜆, 小龍蝦及長蟹腳, 每款能保持凍度, 食落滋味醒神, 睇下呢條長腳蟹肉, 拆完殼不出3秒內已經係我口中, 肉質鮮甜美味, 各組員食得相當滋味!
港人最愛既刺身壽司款式多樣化, 刺身唔會太大舊但又仍能保持口感, 幾鮮味; 見到色彩繽紛既壽司, 好難忍唔住唔試下, 始終日本嘢係好難令人抗拒既!
仲有精緻凍前菜, 係呢D悶熱日子食就最爽皮
食完凍盤, 當然係時候食熱野, 呢度有自選即煮意大利粉, 多款配料比你自己Mix and Match, 想食碟熱辣美味既意粉, 零難度!
係等緊意粉既同時, 比我見到有呢款名為紅燒碧綠花膠, 當堂心心眼出現左, 香滑既花膠食完個口"痴"住晒, 煮得夠透又入晒味, 可以任食, 我當然唔客氣要encore啦, 食完覺得個人皮膚充滿膠質呀.........哈哈!!
再去熱食區見到有好多熱盤等待我去開佢蓋
其中包括有豬腳薑, 紅酒燴牛尾, 燒羊胺等, 個人推介有燒完仲係鮮嫩多汁既羊胺及香辣惹味既避風塘炒蟹, 用手食就仲滋味!
食物種類太多但我點都有保持少少克制, 點解? 當然要留D位置比甜品啦! 睇下甜品種類有幾咁多款選擇, 每款試少少都唔得了
誠意推介芒果柚子味蛋糕, 味道酸酸甜甜好岩夏天食, 仲有中式糕點, 唔講唔知, 佢地既合桃酥都出名架, 友人係咁叫我要試下, 食落果然係幾鬆脆又唔太甜, 果然無介紹錯!
友人食完2 round甜品後, 見佢拎住Haagen Dazs既雪糕批入黎, OH MY GOD.......................原來仲有雪糕杯, 係我掙扎左5秒後, 出去拎多支雪糕批入黎慢慢嘆! 最多食完餐返去跑多幾個圈! 無理由有食唔食架, 咁會罪大惡極架嘛!!!
呢餐食得相當盡興, 黎緊既父親節, 我諗到可以同老豆黎呢度再食一次, 咁多野食, 一定滿足到佢, 好野當然要同家人開心share啦! 仲有有獎問答遊戲玩, 獎品都幾吸引!
老豆.....................父親節果日記住留肚呀!
綠怡咖啡廳 (Greens Cafe) : 北角英皇道665號北角海逸酒店2樓
contact me : gingerszeto@yahoo.com.hk
