愈黎愈多嘢食啦@新肥泉海鮮大排檔

 不時都掛住大牌檔嘅鑊氣小菜，但熱天日子會令人有少少考慮，家下秋冬季節來臨，又可以去會一會佢啦!

今次黎，發現多咗有串燒食，豬牛鷄羊，海鮮，丸類，蔬菜及麻辣小食，用黎送酒又多一個選擇，叫返幾串試下 :

厚切鹽燒牛舌 ($23/串)

燒鷄軟骨 ($16/串

燒香脆白鱔 ($48/客)

燒好就會灑上孜然粉作調味，個人就歡喜呢客燒鱔，肉夠厚身口感彈牙，外皮有少少甜味，啖啖肉又唔錯喎!

 

至愛食燒乳鴿，呢度提供可愛BB鴿 ($52)，真係好BB，但我都係要食你啦，炸得皮脆肉仍然嫩滑。

食飯想有個湯羹飲吓，多款選擇中，清清地嘅海皇豆腐羹 ($128)就跑出啦，份量足夠4位用

食到蝦，魷魚，豆腐，菜及草菇粒，打埋個蛋白"獻"汁，飲完兩碗成身暖晒。

天氣轉涼不期然又係煲類嘅出場日子，惹味之選有呢客豬潤啫啫鮮鷄煲 ($128)

原煲上可保持熱度，唔怕好快變凍。爆炒大量紫洋蔥及蒜頭，甜美可口; 每件鷄及豬潤都被惹味醬汁包圍住...................偷飯賊又出現啦!

呢個濃湯海味雜菜煲 ($108)，份量又係勁量級

多款雜菜，金菇，秀珍菇，再加入蝦，蝦乾，魷魚，仲有大量粉絲，濕濕地易入口，可以減少一個白飯份量食佢都飽啦。

再有其他餸想叫，唯有下次同多幾個朋友上黎再食過啦!

#food #foodie #foodpic #tasty #hkig #foodpics #yummy #blog #dinner #foodblogger  #jordan #大排檔 #風味 #串燒

 

contact me : gingerszeto@yahoo.com.hk

當超清甜椰青鷄鍋遇上抵食二人餐@泰坊

 又去咗接朋友收工飯聚，身為地膽嘅佢帶咗我去呢間泰菜館，話未試過佢嘅晚市

基本上食開嘅泰菜款式呢度都有提供，價錢合理，唔想選擇困難症又出場，侍應介紹呢個精選二人餐 ($288)

呢客椰青花膠魚翅鷄鍋 ($138/細)係網上食評出鏡率相當高，原鍋再跟火爐"慶"住食，呢個轉涼日子食相當合適

細嘅份量夠二人分享，打開蓋就見到滿滿材料

材料當然有椰青，花膠，魚翅及鷄

湯面無咩鷄油係度，趁熱飲，啖湯超有椰青香味，清甜; 飲落原來仲發現有蟹肉碎，咁多料，啖湯點會唔好飲呀?! 咁受歡迎一定有原因嘅!!

飲完湯就開始進入套餐環節啦，先黎個青木瓜絲沙律，爽脆青木瓜絲，加入惹味蝦米及脆花生

呢客燒大鱔，真係即叫即燒，放低時已經聞到好香燒烤味道

鱔肉夠厚身，燒至皮香肉嫩，點埋個酸辣汁，啖啖肉真係好味喎

本來想食海南鷄嘅，但有個椰青鷄鍋，所以叫咗泰式豬手 ，鹵得入味，豬皮入口充滿骨膠原，啖啖肉之選~

飯粉麵之選由炒鮮蝦金邊粉勝出，一客份量又估唔到咁多

先撈均邊邊嘅花生碎，再唧D青檸汁，每條金邊粉都被醬汁包圍住，條條分明唔係一"糊"嘢，酸甜味道調教得唔錯，而隻蝦球食落都算爽口，開胃金邊粉加上香口花生碎，整碟又被KO了!!

仲送埋自家製甜品，今晚係熱椰汁粟米西米露，飯碗咁嘅份量，好香椰汁味，又有粟米嘅咬口，食完心都甜晒^^

全日免加一，份量對眼又幾好味道，第時黎開呢區都知去邊度食泰菜啦!

#food #foodie #foodpic #tasty #hkig #foodpics #yummy #sheblog #dinner #foodblogger #kwuntong #thaifood #thaistyle #foodblog

食完可以再食@夏麵館

 呢間上海菜店間唔中都會幫襯，除咗味道岩食，價錢都算實惠

見到呢兩張套餐宣傳，又提醒我到咗食大閘蟹嘅季節啦，網上預訂仲有買一送一優惠，喜歡食蟹嘅人士有福了...................

分別叫咗兩款冷熱小食，先出場係美味海蜇 ($60)，爽脆海蜇條配上清爽青瓜，再淋上醬汁，入口超爽!

之後到熱爆燻魚 ($58)，呢個屋企唔識整，都係出街食算罷

炸香咗嘅魚件，內含小骨，食時要小心，沾上甜味醬汁，點會唔好食呢?! 

配以肉碎一齊炒就成為呢客干扁四季豆，略帶甜味嘅肉碎與爆炒四季豆 (最緊要入口無渣)，會變成偷飯賊架^^

食上菜嘢指定動作之一 : 酸辣湯麵 ($52)

湯底酸辣度岩口味，材料有木耳絲，豆腐絲，荀絲，肉絲及蛋花; 麵條帶口感，唔係糊口，足夠二人分享一碗都得。

指定動作之二: 鮮肉小籠包 ($38/4隻)

夾得起都無穿，內裏湯汁甚多，配薑絲醋就至岩啦。

呢客砂鍋餛飩鷄 ($138)，原鍋上份量超對眼，見到奶白色嘅湯底不期然出現心心眼

半隻鷄比你，送上碟及鉸剪方便將隻鷄解體

6隻菜肉鍋餛，菜肉比例適中，加上小棠菜，整體味道幾鮮甜，唔會有層鷄油係面， 隻鷄肶仲好滑嫩。

本來想食豆沙窩餅，下次要預留D位先....................哈哈!

 

#food #foodie #foodpic #tasty #hkig #foodpics #yummy #ublog #dinner #foodblogger #夏麵館 #XiaMianGuan #上海菜 #中菜 #蟹粉 #鮮蟹粉專門店 #Shanghaicuisine #Chinesecuisine

 

contact me : gingerszeto@yahoo.com.hk

Chill住食@Med Chef

 若干年前巴士阿叔金句 : "你有壓力，我有壓力..................."作為香港人點會無壓力?!  唔知係咪咁原因，出現咗香港首間以大麻二酚 Cannabidiol(CBD)為主題的多國菜餐廳，就係呢間啦!

呢度裝潢走型格路線，掛上霓虹燈及半開放式廚房，食物方面主打多國菜美食，由前菜，小食，主食，意粉，至甜品都有!  亦有提供CBD飲品!

廚師會在食物烹調過程中會加入CBD成分，令大家食得更chill。如不需要可於落單時注明，服用CBD後，在幾分鐘至數十分鐘內身體會有輕微放鬆的感覺，大壓力的朋友仔可以來試一試喎 (哈...哈.......)。

今餐先由呢客帶子蟹肉牛油果他他配薑油黑醋汁 ($128)打頭陣，香脆多士圍邊，中間一"磚"帶子蟹肉牛油果他他，頂部再加上蟹子及黑魚籽，擺盤見得出心思。

類似鵝肝多士食法，將帶子蟹肉牛油果他他放上脆多士，豪邁D可以一口食晒，蟹肉與牛油果嘅香味係口內爆發，一綿一脆，雙重口感!

肉類代表今晚由羊架跑出，就係佢...............薩他烤羊架配楓香乳酪醬伴蘋果玉桂藜麥沙律 ($228)

一客4件都幾抵食，羊架切開後仍帶少少粉紅色

入口唔太"蘇"，肉質部份鬆軟部分帶嚼口，加入麵包糠一齊烤煮增加香脆口感!  配以乳酪醬伴蘋果玉桂藜麥沙律一齊食，帶點酸甜口感代替咗傳統嘅薄荷醬，又幾有驚喜喎!

食意粉個人比較歡喜唔太多醬汁嘅，呢客白酒金不換蜆肉意大利麵 ($138)就半點醬汁也沒有，眼見嘅只有蜆及意粉

加入香蒜及金不換與意粉一齊炒，D味入晒落意粉度，就咁單食都好好味，仲有少少辣椒粒更加惹人胃口; 蜆肉鮮甜嫩滑，零沙粒，食得放心!!

甜品時間又到啦，呢客牛油甜蕃薯蓉配甜奶法式多士 ($78)係廚師推介黎架，一大球士多啤梨雪糕再淋上同味醬汁，主色係粉紅，未食已覺得甜美可愛啦

件法式多士外圍煙韌，內裏索滿牛奶嘅香綿感; 再配以牛油甜蕃薯蓉，加埋雪糕及忌廉，一熱一凍，感覺相當過癮!

呢度上菜速度快，一邊聽住輕快音樂，一邊嘆住美食，姑勿論加入咗CBD對個人反應有幾多，都一樣令人有CHILL嘅感覺~~

 

contact me : gingerszeto@yahoo.com.hk

無味精小菜館@九鼎百味

 今晚約咗朋友交收，交收完就梗係食埋飯先散水，佢帶我上去市政大廈開餐

呢間新開無耐嘅菜館，有鷄煲火鍋亦有小菜供應，見今晚天氣又回暖返D，就叫小菜啦

小菜款式都唔少，有D仲有住家菜感覺，價錢相當實惠

我真係好鍾意食炸乳鴿 ($58)架，雖然體型係細隻D

但炸至皮脆肉嫩，鴿身亦鹵得入味，點D喼汁食，秒速KO半隻!!

火舞風雲 ($98)從碟名又點會估到究竟係碟咩餸，原來係變陣版嘅咕嚕肉..........哈哈...!

選用火龍果代替菠蘿，食起黎多一份清新，減少咗酸度; 而肉就用豬頸肉代替腩肉，口感爽口又無咁肉膩，仲有個炸漿開得唔厚，唔會成口粉都仲未食到肉嘅部份。

以煲仔上嘅薑蔥牛栢葉 ($88)，能夠保持熱度!  牛栢葉係一舊舊夾得起，並唔係D碎蔭蔭，口感腍中之餘又爽口，加入爆香嘅薑蔥快炒就搞掂，快靚正!

呢個黑椒豬手煲 ($128)，侍應送上枱時都嚇傻了眼，咁大煲嘅?!

豬手用刀叉將佢解體，豬皮未食目測已感到滿滿嘅骨膠原，柔滑而唔太肥膩

豬手肉量相當多，被惹味黑椒汁重重包圍，加上煮到有甜味嘅洋蔥，變成一個偷飯賊!

呢個豉油王炒麵 ($68)應該係我食過嘅"健康版"，麵底無油係碟上，炒得乾身之餘但又唔係乾爭爭喎，色水比起其他店嘅出品黎得淡色，味道因此而較為淡口，食完都唔會口乾!

炒麵又點少得辣椒醬?!  加咗落去惹味倍增!!

老闆主動同食客交流，聽取意見，言談間了解廚師係老師傅，對烹調有一份執著，唔用味精，真材實料，過唔到自己果關寧願唔上菜，咁客人就有口福了!

#food #foodie #foodpic #tasty #hkig #foodpics #yummy #ublog #dinner #foodblogger #hotpot #kwuntong #hongkongstyle #小菜

 

contact me : gingerszeto@yahoo.com.hk