呢幢商廈食肆臨立，呢間位於八樓嘅新開西餐廳主打音樂掛帥(睇個店名都略知一二)
門口位就設置咗打碟區，可惜當晚未有DJ獻技（員工透露黎緊平安夜及除夕會有安排），今晚就專心食嘢先。。。。。。。哈哈！
眼球被呢個二人晚餐吸引住，由餐湯頭盤主食甜品到餐飲都有，一個價錢包晒咁多野食，唔係仲要傷腦筋呀嘛?!
先送上新英倫周打蜆湯
濃稠的湯充滿牛奶和忌廉的香味，口感細膩順滑，灑上少少香脆煙肉片，增加口感; 蜆肉連殼一齊煮，半粒沙粒都食唔到，加埋片蒜香牛油多士，滿足感提升!
呢個二人餐可算係"大蜆神威"，又有蜆嘅出場啦，就係呢客香蒜牛油煮蜆，滿滿嘅蜆堆起來，絶對足夠二人分享。
製作呢道菜嘅秘訣是加入蜆水，唔落鹽調味，蜆嘅天然鮮甜味令湯底味道更鮮美，偶然食到辣椒粉，惹味之餘層次更豐富。
碟邊圍上幾塊蒜香牛油多士，就咁單食都好味，用黎點個牛油白酒湯就仲更加好味，估唔到配角都咁搶FO呀!!
欣賞呢度上菜嘅速度，食完一樣先上一樣，唔會一次過同你ALL IN! 主菜之一就係呢客草飼澳洲肉眼牛扒，份量係10安士
柯打五成熟，外面嘅燒紋令佢多一份"硬朗"，切開見到內裏仍帶紅色，肉汁流了出黎
可以點鹽/燒汁食，個人黎講鍾意用鹽，肉質帶有嚼口，脂肪含量低，食得相當健康
伴菜有薯粒及鮮菇，反而用燒汁點食都幾襯喎!
澱粉質擔當有鵝肝松露意大利粉，整件鵝肝放係意粉塔上，幾夠霸氣
每條意粉都掛滿松露醬，偶爾食到菇菌片，而鵝肝入口即溶，鵝油嘅香味入侵我嘅味蕾，與松露香味黎個大對決!
精選蛋糕係紐約芝士蛋糕，大路之選，配上藍莓及草莓作裝飾，簡約之作，入口芝味甚香，甜度適中。
有芝士蛋糕，可以上埋杯餐飲，呢個時候梗要黎杯熱咖啡，芝士蛋糕嘅香甜味與咖啡甘香味互相配合，為呢一餐寫上一個圓滿嘅句號!
contact me : gingerszeto@yahoo.com.hk
沒有留言:
張貼留言