冬天滾一滾，飽肚又䁔身@馬袓

 今年終於感受到冬天嘅來臨，有咩好得過食個䁔身火鍋?! 呢間台式藥膳湯底火鍋店，全日放題120分鐘，一人一鍋。

 

自取飲品放題，有茶/汽水/支裝涼茶類，最搞鬼有荳奶類

 

提供六款套餐選擇，今晚要咗Prime Grade牛肩胛肉 ($228)套餐

 

主打Prime Grade牛肩胛肉及西班牙豬肉片，呢兩款係同侍應落單，其餘火鍋配料就到自取食物區拎。

 

頭一轉每款有2盤，薄薄一片，方便快熟，爭取每一秒展示”食力”

 

多款台灣藥膳湯底，試吓藥膳椰子清鷄湯，滾返起時，聞到陣陣藥材味道，椰子味被搶風頭。用黎配豬肉片，唔嚡並帶少少脂肪位，一次可以兩片夠口感。

 

壽喜燒湯本就應該配牛啦，牛肩胛肉入口都幾滑，又係無咩肥膏位，多食無咁易膩。

 

呢度嘅丸類選擇都幾多，有D仲未食過，好似呢粒芋泥貢丸，內裏有芋泥，一粒丸兩種口感。

點擊圖片放大

 

仲有呢粒手打牛丸都要推介，口感扎實，咬開有肉汁流出，牛肉味偏濃。

 

仲有其他台灣食材，如甜不辣，台灣腸，魷魚羹等

 

呢隻芝士小籠包，外型好似，但其實係以魚蛋當外皮，裏面係流心芝士餡，即係芝士丸D同鄉。

 

想食鷄同魚可以出去自取鷄腿肉同魚柳，有我喜歡嘅羽衣甘藍同蟹棒，當然要拎D啦。

 

蔬菜類除咗有羽衣甘藍，亦有唐生菜，旺菜，油麥菜及萵荀

 

記住要留少少位置食埋甜品呀，兩大個雪糕/雪條柜

 

仲有M記雪糕食，距離回本又進一少步，哈哈哈………

#ublog #food #foodie #foodblog #foodpics #TKO #hotpot #taiwanstyle

回頭率超高@NATA

 觀塘區食店臨立，有D餐廳你唔會諗到會係工業區開嘅，佢就開比你睇，好似呢間咁

 

只望門口以為去咗酒店西餐廳

 

入到去，昏暗燈光，配上木色裝潢，四圍已有聖誕佈置，有D似歐洲感覺

 

呢度嘅餐單好簡單，每位$398，只需係主菜四選一就可以

 

首先出場係翠綠青沙律配香草芥末籽油醋汁，焦糖合桃。材料簡單唔複雜，爽脆沙律菜配上芥末籽油醋汁，焦糖合桃脆中帶甜，比起用多士脆粒黎得有型又健康。

 

之得到西班牙鬆脆飽配香蒜希臘芝士醬，油浸蕃茄再加初榨橄欖油，二人份有三件。

 

將香蒜希臘芝士醬搽係鬆脆飽上，濃濃芝士味滲出，用黎配麵包食就岩岩好，加埋油浸蕃茄嘅汁，整體上唔會太乾同太膩。

 

呢杯泡沫烤南瓜湯，簡直係南瓜湯Espresso

 

夠熱度，拎起就飲得，香甜南瓜味充斥住每個味蕾，超好飲。

 

免費暢飲指定紅白酒呢個真係正，平時出去飲杯House Wine都要七八十蚊，呢度係任你飲，喜歡白酒酸度清新怡人，好易入口，凍凍地爽呀，Cheers………………

 

另一亮點就係薯條任食，超級邪惡，點沙律汁/茄汁，單食都得。每條入口都係熱同脆口嘅，灑上香辣粉加多份狂野 (追加時可要求要原味)， 熱氣?! 咩黎架…?!

 

每份主菜都會以蠟燭黎保持溫度，保證食到最後一件都唔會凍

 

今晚主菜選擇由一牛一鷄跑出 :

 

美國1855安格斯肉眼牛扒 (10安士)，幫你切成件，肉上面仲有炸脆咗嘅蒜片，配以燒肉汁點食

 

落咗七成熟柯打，入面仍然見到少少紅色;

 

肉質超鬆軟，略帶少少脂肪位，無論單食抑或加脆蒜片一齊食都一樣好味。

 

牛油香草燒烤全隻黃油大雞，預先幫你切成件，方便易食真貼心。

 

鷄皮下無咩脂肪，所以食起黎相當香脆; 肉質係嫩滑嘅，食到有鷄味; 有燒汁及香草汁比你配鷄食。

 

全隻鷄份量都唔細，食晒包飽晒。

 

埋單二人一千有找，食得開心又滿意，佢有甜品供應，但實在太飽啦，一定有下次嘅………。

#blog #food #foodie #foodblog #foodpics #KT #steak #wine

靜靜地享受一餐@滿天星

 朋友係呢度食過午餐話幾抵食，話要試埋個晚餐，咁就由佢帶路啦

西餐廳裝修，設有LIVE BAND位置，可能遲D有表演都未定，今晚就聽住聖誕歌曲先。仲有戶外用餐區。

提供菜式由小食/沙律/意粉/肉類都有，合理價位。

想暖下個胃，叫個是日餐湯飲吓，今晚係忌廉薯仔湯 ($28)，幾滑口，帶點薯仔香味，若然有埋片脆多士配食就仲好。

主菜係意大利扁意粉配雞肉及意青瓜蕃茄忌廉汁 ($88)，賣相及份量都吸引

鷄肉及意青瓜齊齊切成粒狀，扁意粉有口感，碟內每樣食材都被蕃茄忌廉汁包圍住，微酸味道開胃得黎又有忌廉加持咗香滑度，用黎配意粉好味道。

另一道係三文魚柳黑松露飯及蕃茄忌廉汁 ($178)，擺盤又係吸睛之作

煎香咗嘅三文魚柳，入口嫩滑，魚皮帶點魚油香; 下底嘅黑松露飯又有佢嘅獨有香味，就咁單食都好味。

我就當然選擇將三文魚放係飯上，然後一啖放入口食啦................哈哈哈。

 #food #foodie #CWB #foodblog #cafe