初次遇上龍蝦天婦羅@捌加廿陸天婦羅居酒屋

 唔係友人介紹，都唔知呢頭有間長期要排隊嘅天婦羅專門店，門口搶眼燈箱令人有錯覺以為去咗日本小店。

 

店內面積唔大，分兩層用餐區。地下坐吧枱位，而上二樓係榻榻米，牆上貼滿日式漫畫圖/相片，仲有日式燈籠掛係天花上，和系指數爆燈。

 

掃二維碼落單，主打炸物，亦供應少量種類酒。價錢都大眾化。

講返天婦羅，有自選亦有天丼。叫咗個龍蝦帶子丼，跟埋麵豉湯，醃青瓜及飯後果。

 

仲有幾款蔬菜如菇，露荀，蓮耦及紫菜，炸漿夠薄，輕易食到食材。

 

即叫即製，入口鬆脆又唔會一口油。龍蝦肉炸完都唔會韌，食咗有D未夠喉。

 

發現有得單叫活龍蝦天婦羅，叫隻大嘅($128)，已幫你將身斬成2舊，方便進食。

 

呢隻超多肉，食起上黎除咗彈牙外，仲有滿滿口感。仲有個頭都有D膏，味道鮮甜，證明係鮮貨。

 

食完確係超飽，落到黎埋單見門口仲有人龍，識食嘅客人果然多。