自從友人帶我去食過後，對串燒店產生咗好感，今晚經過見到呢間，名字幾搞鬼。
店內有個玻璃串燒房，幾個師傅不停手咁燒
串燒種類大至分為海鮮類/肉類/蔬菜類，仲有小食類及意粉類，唔駛驚只食串燒會唔夠飽 (哈哈…)，仲可以選辣度。
打頭陣係蒜蓉燒茄子 ($40)，可選原條/切片。超香蒜蓉已舖滿成隻茄子，加少少辣椒粉，連皮一齊食，茄子肉仍然嫩滑，瞬間已被食晒。
即叫即燒好彩唔駛等太耐，4款串燒一次上 : 燒鷄胸軟骨串 ($35/2串); 和牛肋串 ($42); 厚燒玉子 ($22)及串燒豆腐 ($22)
燒鷄胸軟骨串印象中好似第一次食，將鷄胸肉同軟骨隔開咁串住燒，一串中有兩種口感，過癮喎。
和牛肋串入口仲係多汁，肉味幾出。
必叫嘅仲有鹽燒牛舌串 ($30)，厚切之餘，中間位一D都唔韌，食一串都夠晒，留返D空位食其他嘢。
厚燒玉子入口夠熱，香甜可口。
串燒豆腐燒至外脆內仍有豆腐嘅嫩口感，點少少酸辣醬汁食，又係好味嘅。
加點綠，黎2串秋葵 ($38)先，燒好再加D惹味調味粉，成條食都無問題。
原本想叫池魚，可惜無貨，改為要鹽燒黃立䱽魚 ($138)，唧少少檸檬汁提鮮就起動。
魚身無咩細骨，燒至皮香肉仍帶汁及嫩口，單食都夠味，但點酸辣醬汁就仲好味。
呢客墨西哥薄餅芝士鷄肉 ($52)係廚師推介系列之一，未食已見到饀料豐富。
拎起已有拉絲畫面，薄餅香脆，配合埋熱熔芝士及鷄肉，點會唔吸引?! 每人半客其實都幾飽肚。
要確實地飽，再叫埋呢客辣椒蒜片什菜意粉 ($88)，賣相有點媽媽出品。相當多嘅蒜片，加埋什菜快炒扁意粉，食到牛油香味，每條意粉都相當油潤，要趁熱食。
本來想叫埋個朱古力香蕉作甜品，可惜實在太飽，咁就當個再回頭嘅”理由”啦。
#foodie #foodblog #foodpics #princeedward #bbq
