"湘"務餐@辣宴

 近排成日都係落雨天，心情都有少少影響。想食D濃味食物令個人無咁悶氣。有次上隔離食米線先發現開咗間湘川菜館，今晚可以黎開餐啦。

門口有個打卡位，食滿指定金額，仲可以有獎抽，幾有創意。

 

最先出場當然係涼菜，想要食爽脆口感，點咗老醋海蜇 ($68)。以酸甜醋汁作調味，加入埋紅辣椒，變成酸中帶辣，相當開人胃口。

 

香鍋都係一個幾偉大嘅發明，一鍋咩都有D，加入特色醬汁一齊炒，可辣可唔辣。

呢度有三款香鍋選擇，分別係牛肉/田鷄/海鮮。 大家一致點選牛肉香鍋 ($188)，有個火爐仔”慶”住，保持食物熱度。

 

成個香鍋用醬香炒，所以係唔辣嘅。材料除咗有主角牛肉外，仲有牛丸，午餐肉，花菜，蓮耦及大蔥，用黎送白飯就岩晒。

 

食湘川菜，除咗炒土豆絲/萵荀絲，都鍾意食花菜。咁就叫呢個農家大盤有機花菜 ($78)。簡單材料有花菜，加入辣椒快炒，味道調得唔會過濃，若然少D油就仲好。

 

除咗啤酒，呢杯大杯檸檬茶 ($38)出鏡率都相當高。真係超大杯，二人分享都仲得。用黎配襯濃味食物或解辣都相當稱職。

 

炸饅頭從來係抗拒唔到嘅，幾飽都可以食，爭在可以食幾多。呢度有黃金小饅頭 ($58)，用黎做”甜品”亦不錯吧。

 

外型走可愛路線，炸得外脆內鬆軟，點埋個香甜奶確係絶配。

#food #foodie #foodblog #mk #辣宴

 

 

一個好味嘅秘密任務@星海

 接到表妹來電邀請同佢去”睇場”，事關個衰妹終於都同男友拉埋天窗。咁重要嘅任務，當然無問題。

 

星海仲有其他分店，呢間地點超方便，呢度有茶飲有點心食，係飯局聚會嘅唔錯選擇，仲可以係相連APM購物或去工業大廈Outlet掃平貨後再開餐亦得，有咩開心得過買到心頭好再食返餐。

 

一行入去就已經見到大禮堂，背景裝飾唔老土，幾岩FEEL。

 

樓底都夠高同無柱位，仲有紫銀色水晶燈，幾有氣派。

 

上酒樓食飯，通常都會叫乳鴿，鍾意佢細細地當前菜，佐酒亦得。咁岩佢嘅紅燒皇子乳鴿 ($68)做特價，當然唔會錯過。

 

皮香肉唔乾，入口夠熱度，點埋個喼汁食就是”perfect池”。

 

枱上有呢個最Chill推介，龍蝦有其他煮法，幾吸收喎

 

芝士/上湯焗就成日食，以鐵板白胡椒煎焗嘅澳洲龍蝦 ($338)就應該係第一次食。

 

上枱後，侍應再淋上白胡椒汁，發出少少”咋咋”聲，底層有紫洋蔥，香甜好味。

 

寫住一隻大約有一斤三兩，有頭有尾。中身段肉量都唔少，入口肉質相當彈牙，啖啖充滿白胡椒嘅香辣味，幾刺激但又好好味喎，呢個煮法我鍾意。

表妹想食蟶子($40/隻)，豉汁/蒜蓉粉絲二選一煮法。我投蒜蓉粉絲蒸蟶子一票。

 

粉絲吸收咗蟶子嘅鮮甜精華，蟶子入口無沙，幾有口感，加埋蒜蓉嘅香味，一啖一隻夠晒滿足。

 

叫埋佢另一款推介，秘製瓦撐蔥油鷄 ($98)，成隻蔥油鷄比你，超級抵食。原個瓦撐上枱，食到尾都保持到熱度。

 

大量蔥油舖上鷄隻，入口滿滿蔥油味道，送飯一流。

 

咁多濃味菜式，黎個翅群海味雜菜煲 ($158)，清清地中和一下味蕾。大量粉絲及蔬菜(小棠菜，白菜仔及菜芯)，加埋蝦仁，翅群，帶子，仲有菇菌，以清湯一齊煮，份量相當對眼。

 

食晒仲有糖水送，係經典紅豆沙呀，係酒樓先煲到呢個質地同味道，唔太甜都幾好味。

我就幾滿意，有待主角決定。

#foodblog #foodie

鰻煮的一餐@鰻工房

 每次去日本，都聽友人介紹去邊度有好味鰻魚飯食，香港食唔到架。下次日本之旅要稍後先出發，今晚就黎呢間專食鰻魚嘅食店止下渴先。

店內面積一眼見晒，日系佈置，都幾似日本食店感覺。

 

望下餐牌食咩先

 

未食先飲杯玄米茶及可樂 ($12)，解一解渴先。

 

為慶祝日本傳統鰻魚祭，滑蛋鰻魚丼星期一至五中午12點至下午3點半，只需$38，真係一碗雲吞麵嘅價錢咁上下就有得食。

 

晚市時段係($58)，加$18可升級做套餐，有溫泉蛋，醃菜，鰻魚肝白貝湯及飲品。就係眼前所見咁多樣嘢啦。

 

個滑蛋鰻魚與飯係分開上，就咁單食完全無負擔，當然加埋飯食就多一重口感及滿足感。甜味嘅滑蛋與鰻魚配合係偷飯賊。

 

想講埋個鰻魚肝白貝湯，夠熱度，比起配傳統麵豉湯較為清甜，可以清空一下鰻魚嘅膩感，唔錯。

 

睇食評唔少客都會叫佢…………………. 沙羅鰻蛇丼 ($198)

 

一場黎到，點都想會下佢真身嘅………………………….出場啦! 望見佢真係傻了眼，超大條蒲燒鰻魚，要多用隻碟先可以放得到。

 

要用刀叉切開嘅鰻魚都係第一次……哇哈哈!

 

飯盒內仲有蛋卷，咁就黎一口厚切鰻魚蛋飯，超滿足。

 

仲有另一種食法 :

 

再自行加紫菜及芝麻，清空一下口腔內嘅鰻魚味，還完基本步。

 

原條巨大鰻魚之份量，一個人確實難以食晒，可以同友人分享都唔錯。

#ublog #foodblog #unagi #japan #tst