台食一餐@日月堂

 想快靚正咁食餐台式食物，黎到觀塘區我會”貢”上黎呢間

 

手機落單，不設加一，相當抵食。

 

分不清紅燒同清燉嘅分別，以為呢碗清燉半筋半肉麵 ($75)係偏向清湯底 (哈哈)………

 

一碗份量又係相當多，仲有紅蘿蔔同紹菜作配菜。

 

湯底雖然同紅燒湯底顏色差唔多，但味道則較為無咁濃味。

 

牛筋煮至幾腍身，入口滿滿膠質感覺; 而”肉”即係腩位，又係煮得夠腍及入味。加$5轉刀削麵，幾有口感。

好耐無食過鴨血啦，即刻要叫碗麻辣鴨血麵 ($70)止下癮。

 

加$5轉新竹米粉，用黎索住個麻辣湯底，正呀。湯底麻辣度普通，鴨血入口嫩滑中帶少少煙韌，唔係得幾舊就算，有成半碗湯面份量。

 

多款餡料配搭係我鍾意食台式蛋餅原因之一，尤其係芝士同肉鬆呢個好拍擋。呢客起司肉鬆蛋捲餅 ($40)今晚走唔出我個肚啦， 哇哈哈……

 

一客切成件，餡料一目了然。夾起時已有少許拉絲畫面出現，味道咸中帶少少甜味，口感鬆軟。

 

亦叫埋作為甜食炸物類代表嘅梅子地瓜條 ($36)，枱上仲有樽梅子粉，鍾情嘅可以再落多D。

 

即叫即炸，入口熱辣辣，外脆內有甜薯嘅香甜棉感，帶點粗度，食起黎夠晒滿足。

 

一系列台式飲品供應荔枝紅茶 ($30)及鳯梨紅茶 ($30)，每杯都夠晒份量，飲唔晒仲可以拎走。甜度可以選擇，要咗少甜，有荔枝果甜味，有埋果肉就仲GOOD。

 

仲有台式甜品供應，但今餐實在相當飽，下次要預留空間先得。

#taiwan #food #foodie #foodlover #foodblog