唔辣川菜同樣好味道@川滿居

 血拼完，又係時候搵地方開餐，肚餓指數屬於中高等，雙腳不由自主地行咗黎呢度。

 

涼伴小食有秘製拍青瓜 ($46)，加有少少辣椒增加刺激，青瓜厚切，食起黎爽脆度十足。

 

食濃味食物，叫杯凍檸樂 ($26)爽下先。

 

今次呢碟清炒萵荀絲 ($66)無咁油令令，緊加食到佢嘅清甜味，空口食都無問題。

 

聯想唔到蕃茄牛肉炒蛋 ($78)跟川菜有咩關係，唔係普通家庭餸黎咋咩? 唔通有川菜版?! 上枱後就知外觀係無分別…

 

酸酸甜甜汁，炒蛋唔老，加埋牛肉片，超級好送飯，係經典蕃茄炒蛋嘅味道。

 

叫咗個招牌香鍋，有香辣/麻辣，唔辣有醬香，自選五餸材料起，超多選擇，海鮮有(蝦/花甲)，肉類(羊/牛/豬頸肉/內臟)至蔬菜類都有，價錢由廿幾至五十幾不等。

 

今晚自選牛舌，牛肚，豬皮，花菜及牛肉片，加埋大蔥一齊快炒，超大鍋。

 

醬香汁唔辣但味道偏少甜，食起黎都覺惹味。牛肉片幾軟滑兼食唔到梳打粉味; 豬皮就歡喜佢可以索醬汁; 牛舌及牛肚亦掛滿醬汁味道，正!

 

只有食川菜嘅地方先有紅糖糍粑 ($58)食，即叫即整。

 

外脆內有糯米嘅煙韌感，本身無咩味，所以就要點紅糖漿一齊食，香甜又脆軟，兩啖一條真滿足。

#blog #foodiehk #foodblog #foodpics #CWB

 

有新菜式呀@Outdark

 今晚突然收到通知去食炸鷄，旺角店去過，呢間分店就去過，估唔到門口已經掛滿鎖仔造成”特色牆”，彷彿重遊南山塔。

 

店內裝飾與旺角店差唔多，昏暗燈光中掛滿星星燈，用黎打卡無難度。

今次黎發現有新菜式，菜包肉及水冷麵

 

正! 終於係度食到水冷麵 ($138)，有三款肉任選其一。

 

選擇咗豬肉，已經調好味嘅炒豬肉，味道係可以配白飯口。但今餐係配口感煙韌嘅蕎麥麵，放於冰涼嘅高湯之中，伴以蘿蔔泡菜及青瓜絲，又帶點爽脆口感。又可根據喜好加醋及芥辣，夏天食真係可開胃口同暑氣全消。

 

歡喜呢度嘅紫菜飯捲，尤其係烤牛肉紫菜飯捲 ($98)。

 

一啖一舊夠滿足，紫菜飯包住嘅牛肉及醃蘿蔔有甜甜地嘅味道，又有蘿蔔絲及青瓜嘅脆感，成件事好平衡。

 

友人唔”酒”得，想飲嘅馬格利酒要留待下次。生果味嘅梳打從來唔會輸，西柚梳打 ($48)同莫希托梳打 ($48)就成為今晚嘅特飲。

 

友人提議叫泡菜煎餅 ($128)，話無泡菜食又點似食緊韓菜?! 又岩喎。

 

全蔬菜做，就算係素食者都無問題。除咗泡菜，仲有金菇菜及辣椒。邊位煎得香口，中間位置材料滿滿，口感札實。加分位仲有個煎餅汁，點埋甜甜地仲好味。

 

壓軸出場呢度必食嘅炸鷄，幾款口味，今晚試香蒜蜜糖 (半份)，仲有薯條及薯格。

 

炸好嘅鷄件再”賜”佢一件香蒜蜜糖”聖衣”

 

炸漿唔算厚，先食到蜜糖嘅香甜味，蒜香味唔會太濃; 鷄肉唔會到乾柴，仍然保持到嫩口。

 

用餐時間90分鐘，食物出餐時間都可配合，唔會食得太趕，仲可以邊食邊傾計。

#foodblog #foodpics #TST #koreanfood

 

回本食足150分鐘@初心

 呢幾日天氣好似秋天咁，舒服得令人興奮，而晚上仲覺得少少清涼，仲有興致去食火煱。加上假期前夕就想食餐火鍋放題，任飲任飲夠滿足。

 

呢間除咗有茶飲，晚市仲有150分鐘任食任飲火鍋放題。

 

各式凍飲可以自己去雪櫃拎，罐裝紙盒都有。

 

未食火鍋，先食招牌鷄煲 (可追加)，辣度入選，唔辣又唔係幾好食，就BB辣啦。

 

除咗鷄件，仲有紅綠椒加大量洋蔥及蔥去爆香，加埋豬皮去索惹味醬汁，呢一煲，好快被我地食晒。

 

再黎五款小食，每天不同，今晚有松露蝦多士，涼伴雲耳，麻辣鴨血，椒鹽三文魚頭腩及漬牛膀。

 

食緊麻辣鴨血之際，三文魚刺身送到。港人對佢又點可能抗拒?! 一啖一塊過吓口癮。

 

跟住就可以轉做火鍋時間啦，多款特色湯底選擇，最後都係還原基本步同下火之選，芫茜皮蛋湯是也。

打邊爐點少得海鮮?! 六款不定時轉款湊合成為海鮮拼盤。今晚”佳麗”為鮑魚，廣島蠔，龍躉片，蜆，蝦及翡翠螺。每款2隻/件，以冰底墊住保持鮮度。

鮑魚帶點厚度，入口夠彈牙。

 

廣島蠔烚完雖然變細咗，但蠔味幾出。

 

之後嘅任食類包括肥牛，黑豚肉，丸，菜，菇類，薯粉烏冬等

 

肥牛及黑豚肉肉色靚仔，脂肪比例平均，薄薄一片好快熟。

 

頭轉唔駛自己落單，侍應送上心水推介，例如年糕福袋，黃金魚腐，各式丸類及魚片頭。

 

呢款手打牛丸，大大粒

 

入口超濃牛味，肉汁爆射，推介。

 

仲要個蔬菜籃，色彩繽紛，菜心同娃娃菜都好甜。

 

食完幾轉都好飽，咪忘記仲有雪米糍做甜品呀。

 #foodie #foodblog #hotpot #allyoucaneat #TKO

晚餐食好D食平D@維港冰室

 呢區嘅茶餐廳/冰室數目比美旺角，途經見到呢間門面明亮同大間，望下電子餐牌晚市套餐都幾岩食。

 

內裏裝飾比較”金碧”，出菜位上放滿式日式威士忌，多卡坐位，坐得幾舒服，地面都幾乾淨。

 

小菜套餐包埋湯及白飯，是日餐湯係紅蘿蔔煲豬骨，好有親切感。

 

另加$12就有特飲，分別叫咗柚子及青檸梳打，大大杯又夠氣感，爽呀。

 

飲完湯，最先上枱係去骨水門海南鷄 ($129/半隻)

 

去埋骨啖啖肉，鷄皮唔食可輕易撕走，鷄肉幾嫩滑，點埋特色鷄醬汁一齊食，唔錯。

 

蔬菜類穩打之選，海皇什菜煲 ($93)，清清地有菜又有海鮮類。

 

有菜芯西蘭花，魷魚，厚切魚塊，蜆肉及蝦，加埋金菇粉絲大大煲，味道清甜。

 

平時少食魚，叫餸食飯蒸條魚都唔錯，茶餐廳多數都有豉汁蒸倉魚 ($99)，同樣即叫即蒸。

 

滿滿芫荽下就係豆豉，成條倉魚二人分享都夠食。倉魚唔多細骨，魚肉點豉汁好好送飯呀，趁熱快D食先。

 

無限用餐時間，小菜味道同酒樓出品唔差好遠，但價錢相宜好多，難怪入坐率都唔低。

#foodblog #foodiehk#CWB