趁住晚上天氣涼嘅日子，加多D火鍋活動。呢間上樓嘅有川菜食，亦有火鍋，有辣有唔辣。

 

店內裝修雅致，一邊設有卡座，四人坐都幾舒服。

 

火鍋進行前，必先選擇鍋底，呢度有惹味嘅麻辣雞煲，四川麻辣鍋，秘制羊腩煲外，亦有香甜椰子雞鍋及雜菌雞湯鍋。

 

今晚嚟個椰子雞鍋(半隻/$238)，先滾起椰子湯，雞件另上再落。半隻份量都唔少。

 

侍應溫馨提示可以先飲碗湯，食件雞，然後先開始火鍋。啖湯有椰子嘅清甜味，而雞件都帶有雞肉味。

 

既然露營必須酒，咁火鍋就必須牛。幾款牛肉選擇安格斯牛小排 ($238/例)。每片切得大細厚薄均一，脂肪分佈平均。

 

烚兩烚一轉色就食得，肉味幾濃，口感鬆軟。

 

丸類可以雙拼，就算人少都可以試多款。今晚嚟個手打鮮墨丸拼潮州牛丸 ($78)，每款3粒。

呢粒牛丸，口感相當劄實，一咬D肉汁流出，肉味幾香。

 

個人覺得蜂巢豆腐 ($48)真系火鍋恩物，尤其系個湯底夠正，咁就可以用黎索湯汁，但要小心”辣”親條脷(哈哈…)

 

鐘意食皇帝菜 ($48)，每條都靚仔，入口無渣。

 

邪惡之選又點少得即炸響鈴 ($48)，圓圓碌碌，烚幾秒就可以有外軟內脆。

 

呢度仲有紅糖流心糍粑，外脆內有紅糖流心，又另一種食法。

#ublog #foodblog #foodpics #foodiehk #hotpot #CWB

味蕾出走新加坡@星怡

 以粉藍及白作為主色，以大幅壁畫作裝飾，都幾有當地感覺，而大部份都係卡坐，坐得幾舒服。

呢客魚露花甲 ($168)，作為凍盤又幾過癮。

已開半殼，食得方便; 酸辣魚露淋係花甲肉上，一啖一隻，令人開了胃口。

 

想食新加坡菜，唔多唔少都諗起喇沙，咁就來一碗新加坡魚蛋喇沙 ($68)。

個人認為一碗好味嘅喇沙，個湯底要夠香濃，呢碗入口有濃香喇沙味道，加入椰漿增加香甜杰度。材料除咗有魚蛋，仲有魚片及半隻溏心蛋，偶爾食到爽脆芽菜。

圓粒魚蛋爽口彈牙，唔錯。

油麵份量都幾多，食完相當飽肚，以呢個價錢黎講，相當抵。

 

另一傳統主食又點少得”辣死你媽”，幾款選擇之中，有呢客邪惡之選，特大鷄髀辣死你媽配椰漿飯 ($78)。

鷄蛋下嘅飯粒之所以變成粉藍色，係因為加入蝶豆花，入口滿滿椰漿味道。

隻炸鷄髀確係相當大隻，含肉量豐富，皮脆肉嫩。

傳統食法係將魚乾仔，花生，加埋參巴醬一齊送飯。我就再加多舊炸鷄髀肉，加埋蛋汁，正到無朋友。

 

晚餐要加多點綠色，惹味之選馬拉盞炒通菜 ($78)，加埋蒜粒及紅辣椒，點會唔好味呢?!

#ublog #foodblog #foodpics #TST #foodiehk

無辣的一餐川菜@麻辣香鍋

 今天工作量滿滿，放工得返半條人命，好彩胃口仍在，好想食D濃味野喚醒疲勞嘅身體，近近地又可以快食嘅就嚟咗呢間。

川菜中特色冷盤籐香鷄 ($66)，鷄件上擺條籐椒作點綴。

口感類似食醉鷄咁，無酒味有少少籐椒獨有香味，唔辣。

 

呢期檸茶相當大熱，咁岩見到呢度有百香果檸檬茶 ($36)，大大杯足夠飲成餐，味道香甜，仲可似啜到百香果粒。

 

呢個招牌香鍋 ($28)，有辣有唔辣，再自選配搭五餸起，海產肉類蔬菜丸類都有 (即係火鍋配料選擇)。友人唔食辣，呢鍋係用醬香炒，味道惹味中帶微甜。自選五餸有: 鮑魚($68/4隻)，鷄件($42)，花菜 ($26)，鯛魚片 ($42)及豬皮 ($36)。再有芹菜及蔥一齊炒，搞掂。

已去殼嘅鮑魚進食方便，入口彈牙。

鯛魚片配醬香快炒都夾架喎，啖啖肉無細骨。

選擇叫豬皮係因為佢可以索醬汁，果然無叫錯。

 

叫多個小菜用黎送飯，川菜用萵荀嘅機會高過菜芯，所以今餐有萵荀炒牛肉 ($88)。兩種食材各佔一半，再加入木耳仔及薑片快炒。

牛肉夠大塊，入口幾滑; 萵荀切片炒完仍然保持爽脆，一碟餸有兩種唔同口感。

 

其實食川菜，唔一定要辣到飛起嘅，呢餐無辣都一樣點到菜同好味。

#foodie #foodblog #foodpics #川菜

小菜誇啦啦@財記辣蟹私房菜

 係附近買完海味，又到搵地方開餐時間，友人提議近近地上去呢度叫小菜食飯。雖則店名有辣蟹，但唔食蟹食小菜亦係一個好地方。

晚上天氣涼涼地，想要個湯羹暖吓個肚仔，家常大路之選，西湖牛肉羹 ($88)。呢個係例鍋，大約有4碗份量。

加少少胡椒粉調味，唔會過咸，當作湯羹岩岩好，食到牛肉碎又有蛋白嘅滑度加芫茜嘅香度，飲完一碗幾暖肚。

好耐無食過嘅豉椒炒蜆 ($98)，今餐有得食。目測隔離幾枱都有呢碟出現，應該無叫錯。

豉椒味好惹味，偶然食到甜椒粒; 九成以上嘅都有肉，肉質鮮甜嫩滑，最緊要係一粒沙都無食到，可以放心食

呢間選用嘅走地鷄，肉質比較有保證，既然係咁，就整碟蔥油走地雞 ($138/半隻)。成個碟面被蔥粒及薑蓉所遮住，勁呀。

係蔥粒下成功”救出”件鷄，肉質好滑，夾埋D薑蔥粒一齊食，夠晒味道，唔食皮嘅可輕易撕走。用黎送白飯輕易乾掉一碗。

清新鮮味嘅有上湯什菜煲 ($88)，材料除咗有幾款蔬菜如菜心，西蘭花及白菜仔，亦有蝦米，魷魚及粉絲。算係今餐嘅”清泉”。

今餐有鷄有蜆有菜仲有湯，滿足同飽肚程度係十粒星。

#foodiehk #CWB #foodpics #foodblog

高質食物出品仍在@Sabrosa

 有D餐廳你食過覺得唔錯嘅，就會久唔久再去，”測試”一下佢嘅食物出品質素有無下跌，呢間係其中一間。

 

未開始點菜，侍應送上香脆多士作為歡迎小食，加少少黑醋及橄欖油。

 

食住睇餐牌，發現好似有D轉咗新菜式，咁就試下有邊款岩食先

 

只睇呢兩種食材配搭，感覺相當健康有益，講緊嘅係羽衣甘藍牛油果沙律 ($98)。上枱時先知仲有風乾火腿舖面，豐富咗份量及賣相。

 

底部發現有藜麥，再有紅酸菜，水牛芝士，紅石榴粒等，味道有醋酸味，幾令人開胃口。

 

真係好鬼鍾意食呢度嘅炸西班牙青椒仔 ($68)，即叫即炸，外皮略為炸至金黃皮，微辣味道帶少少咸，一啖一隻岩岩好。

 

Tapas又點會只叫一款，介紹返呢客迷你墨西哥夾餅配和牛牛舌 ($128/2件)

 

唧少少青檸汁增加清新味道，和牛牛舌切成條狀，口感鬆軟，仲有蕃茄，洋蔥粒作配菜，以似班㦸口感嘅夾餅夾住食，又幾好味喎。

 

食完小食，主菜可以開始出場。

 

鷄肉類代表，焗西班牙走地黃油春鷄 ($198)，原隻燒春鷄，都唔係細隻，仲有3款特色沙律醬汁，包括黑蒜(甜)/蝦米辣椒醬(微辣)/薑黃(微酸)，仲有香甜甘荀仔及煎薯仔作配菜，呢個價錢超抵食。

 

鷄皮焗至蜜糖色，皮薄無咩脂肪; 鷄身內有香草加香味，無咩額外調味，所以有三款醬汁點食。

 

一切開鷄肶，滴出黃油(請留意木板)，肉質超嫩滑又多汁，趁熱食啦喂!

煎羊架就食得多，羊膝就真係好少食。呢客係慢煮羊膝配燉蕃茄白腰豆 ($238)，無諗過羊膝咁大隻。

 

得一條主骨，被大量肉包圍住。經過慢煮方法，輕輕用刀叉已可起出肉來。

 

入口鬆化及有”蘇”味，歡喜食羊嘅友人表示滿意。以蕃茄作醬汁主材料，仲食到蕃茄碎粒，味道有蕃茄嘅酸味，可以平衡返肉嘅膩感。

 

有點輕視咗主菜嘅份量，佔據咗甜品位置，唯有下一次啦。

#foodblog #food #foodie #CWB #spain #tasty

*本站之內容由作者所提供，並不代表本站的立場。因此本站對所有博