高質隱世樓上Café @cafe zense

 自從港人報復式旅遊後，久唔久就會有手信交收飯局，今次交收地點係呢間隱世樓上Café進行。

 

室外用餐區有幾張枱，佈置幾雅緻舒服; 另有戶外用餐區，遲D天氣轉涼嘅日子應該會多客坐出去。

 

肚餓啦……..先食個前菜先。白酒忌廉煮就食得多，泰式冬蔭忌廉煮青口 ($158)就第一次食，仲有兩片烤麵包用黎點汁食。

 

青口細細隻但量多，每隻都有肉; 個醬汁真係冬蔭公味道，酸中帶微辣，幾惹味同開人胃口。一隻接一隻，不知不覺食晒。

 

望住呢份慢煮美國安格斯牛肋骨伴乾蔥紅酒燒汁 ($298)，不期然未食先流口水。

 

已幫你”骨肉分離”，要做嘅只需加乾蔥紅酒燒汁。

 

經過慢煮處理，令帶點厚度嘅牛肋骨肉都變得鬆軟，肉汁係口腔內流出，再加埋出色燒汁，咁好味得唔得㗎…?!

 

絶對係對㰖油蒜片辣椒意粉系列有私心，見到有㰖油蒜片辣椒大蜆意大利麵 ($148)，加埋有大蜆，仲駛諗? 即叫。

 

份量都唔細，蜆隻圍邊，蜆肉雖然細隻但幾鮮甜同無沙。

 

呢度煮法係有埋汁嘅，醬汁入面加上蒜粒，蒜味十足，每條意粉都沾滿醬汁又有口感，就咁單食都好味。

 

呢度嘅飲品選擇超多，有咖啡類/朱古力類/茶類/沙冰類/梳打類/啤酒，每類再有十零個選擇 (真心勁)。都要用D時間先諗到想飲咩，最後跑出嘅係……………….蜂蜜鮮奶抺茶 ($44)及鮮奶咖啡 ($42)。

 

兩杯都有心心拉花，前者入口勁香抺茶味，唔太甜，咁大杯可以慢慢嘆; 後者綿滑奶泡，釋出淡淡然咖啡香味，再咬一口甜餅，正。

#ublog #foodblog #foodpics #cafe #CWB

 

飽足的一餐@財記辣蟹私房菜

 同長輩食飯，地點方便易搵好重要。呢間由港鐵站行過黎只需幾分鐘，地點相當易搵。

 

係………呢間係出名食蟹，但原來小菜款式都唔輸蝕。

食中菜時，總想加點湯羹，簡單地點咗個大路野粟米魚肚羹 ($98)。

 

滿滿嘅魚肚舖滿成個面層，入口熱辣辣，有香甜嘅粟米味，又有棉滑嘅魚肚食。侍應送湯時仲拎埋支胡椒粉，加點香辣仲正。

 

飲緊第二碗時，霸皇走地鷄 ($138/半隻)就出場啦。

 

鷄件上放滿大量薑蔥絲，仲有少量芫茜及紅椒，再淋上微甜豉油。食前再將鷄件沾多少少豉油，件肉仲幾滑喎。

 

有湯有肉，當然要埋碟菜。呢碟馬拉盞炒通菜 ($88)，除咗有馬拉盞一齊炒外，仲有唔少蝦乾，唔會太濃味之餘，仲炒得清脆。

 

壓軸出場係黑椒牛仔骨煲 ($118)，上枱時仲聽到少少”嗞嗞”聲。

 

大量甜味洋蔥，半腍半爽口; 牛仔骨份量都唔少，容易咬得開; 個黑椒汁偏甜少少，用黎撈飯好快食完一碗，哈哈……………………

 

上菜速度正常，價錢合埋，侍應主動收碟加茶，坐得幾舒適，不失為食小菜嘅好地方。

#foodblog #foodie #foodpics #CWB

實而不華的一餐@千歲擔擔麵

 係呢個新商場3樓空中花園都開咗幾多食店，上次食完星馬泰菜後，走時發現係對面有間食上海嘢，仲係詠藜園字頭嘅。

 

餐牌上分好唔同種類，湯麵類/水餃/抄手/點心小食

 

亦有前菜/熱葷/海鮮/湯及甜品等，都幾多選擇。

 

今晚就簡簡單單叫D湯麵類試下先。

 

有別於廣東式個湯係分上，呢度嘅清湯炸醬麵 ($52)，炸醬係放埋上麵上嘅。

 

麵條爽彈，配埋D肉碎，簡而清。

 

呢碗橙紅色湯底嘅就係酸辣水餃 ($48)，一客有6隻。

 

唔算太大隻，餡料類似小籠包; 個酸辣湯底比較起相黎無咁杰身，若然加多少少料會好D。

 

反而呢碗嫩鷄煨麵 ($68)出奇地又幾多料，開初以為只有青菜同鷄肉，仲有草菇及荀片。

 

用另一款麵條，口感比較腍身，而湯底亦都有點厚度，味道幾鮮甜同埋熱度十足，食晒成碗好鬼飽。

 

叫多客酸辣炒土豆絲 ($63)用黎送麵，欣賞佢炒得爽口但唔油膩，酸辣度岩岩好，唔會嗆喉，好食。

 

本來想叫埋豆沙鍋餅，但已經好飽，實有機會嘅。

#ulog #foodblog #foodpics #foodiehk #KT

烤威威@烤魚工房

 友人趁暑假回港探親，當然想食D外國無咁易食到嘅菜式，就等我今日帶佢去”威威”啦。

 

就係呢度啦，號稱香港烤魚界天花板最受歡迎烤魚店 。門口長期有客等緊位，好彩有得坐著等。

 

店內裝飾走夜店風，友人話點諗到烤魚店好似落咗夜場咁，難怪咁受年輕人歡迎，成為佢地必打卡網紅熱點店。網評呢度可以媲美深圳探魚的烤魚，友人未食已相當興奮。

 

黎呢度食烤魚，今日跟住呢三步曲就可以

 

(一)  選魚 : 三選一要咗最貴嘅江團魚 ($329)

 

(二)  選口味 : 毛血旺烤魚 (另加$30)

 

(三)  選烤魚配菜 : 萵荀片 (8月優惠12:00 - 17:00，可以任食配菜)

 

未食烤魚前，有串燒及其他餐前小食，呢客鐵板包漿豆腐 ($39)係其中一款。

 

一口豆腐煎成外脆內軟，面頭再灑上香蒜，菜甫及蔥粒，可選辣度 (要咗BB辣)，咁嘅組合，仲唔夠惹味咩?!

 

食濃味食物，點可以無凍飲呀?! 除咗汽水啤酒外，仲有幾款特色凍飲，今日呢杯至尊水果茶 ($43)，打咭騙LIKE無難度，多款果肉，解辣下火之選。

 

烤魚送到，超大盤，滾起就食得。

 

未見條魚，先見午餐肉，青瓜，蓮藕片等，堆得滿滿。

 

之後再見到有黑栢葉，鴨血及黃喉及大荳芽，材料豐富。

 

團江魚先煎香先再放入湯底煮，食起黎無腥味，肉多骨少，無咩細骨。一路滾住，每一啖肉都係熱辣辣。

 

一有麻辣湯底，總要食鴨血，滾完都無散開，口感有D似食緊果凍。

 

食到尾段時，加份烤饅頭 ($15)，一串一個，切開一半。

 

將香甜煉奶倒上饅頭上，熱辣辣外脆內鬆，少少地作為甜品都唔錯。

#foodblog #foodpics #烤魚 #烤魚工房