舒服之露營餐@營足四季

 夏天早系露營收季，要等幾個月後秋涼先再開季。營友發現呢間以露營為主題嘅餐廳，止住渴先。

 

全店傢俱都系以露營為主題，中間放置露營車，成為打咭熱點，車內仲可以用餐。亦有戶外用餐區，涼D子坐出去應該都幾有FEEL。

 

一邊欣賞泰國年青歌手MV (原來都幾岩聽，雖則唔明佢唱咩，哈哈……)，一邊用手機點餐。

 

未開餐，先飲杯。呢杯賣相唔錯嘅系叢林的秘密 ($48)，店主推薦之一特飲。茶底配以水蜜桃，藍莓，檸檬及西柚，充滿香甜果味，炎夏日子飲岩曬。

 

開講都有話；露營必須”酒”，酒精類飲品呢度都有提供，黎杯Highball ($78)，淡淡酒味配以清新梳打水，一飲透心涼。

 

肉類主菜選擇有牛/豬/雞，侍應推薦呢客巨型豬扒配薯條沙律 ($188)，話應該足夠我地分享。

 

件豬扒真系相當巨型，占咗半個碟嘅位置，亦有相當厚度，煎得幾香。

 

雖然有骨，但肉嘅份量都唔少，入口相當松化，配以黑椒汁點食，幾惹人胃口。

 

仲有薯條及其他配菜，D瓜片有甜度又多汁，好味。

 

系意粉與薄餅二選一中，友人鍾情清新柚子煙熏鮭魚洋蔥薄餅 ($138)

 

薄脆餅底，鹹香煙鮭魚與甜蜜柚子醬結合在一起，甜中帶鹹，又有紫洋蔥嘅爽脆度，每人兩件輕易搞掂。

 

胃部仲有空間，當然要食埋甜品。呢客阿華田脆脆奶蓋瀑布蛋糕配提拉米蘇雪糕 ($108)就系為呢餐寫上個美味句號。

 

侍應幫忙拉開膠圍圈，內裡嘅奶蓋如瀑布咁傾瀉，完全覆蓋咗個蛋糕。

 

最好味食法，當然將所有食材集在一起，然後一啖放入口。奶蓋嘅香滑，鬆軟嘅蛋糕，冰凍嘅雪糕再加阿華田脆脆，呢一刻仍然回味中。

 

睇漏眼仲有串燒供應，下次可以一邊飲一邊食，吹吹水。

#foodblog #foodpics #foodiehk #KT #camping

世一燜豬腳@Outdark

 韓劇停不了，召喚追劇組員一齊開餐傾吓劇情。當然要韓食，今晚唔燒肉，早到的人兒有好嘢食。

 

尚早未見人龍出現，仲有少量枱，可以坐到四人枱，舒服。

 

用餐時間為90分鐘，肚餓時又想慳時間，叫飯卷不失為一個好主意。四款中(豚肉/牛肉/炸蝦/鷄蛋)點咗烤牛肉飯卷 ($88)

 

整條切成十件，材料有主打嘅醃蘿蔔，甘荀絲，青瓜，蛋及烤牛肉，碟面唧上少量沙律醬，一啖一件，醫到肚又好味。

 

黎呢度十居其九都會叫炸鷄，我地就反其道而行(其實之前已經食過，係好味嘅)，叫…………………..燜豬腳 ($288/450g)。

 

整隻豬腳已被”骨肉分離”，底下有炒雜菜，另有生菜，辣椒，生蒜片及豆醬，陣容強勁。

 

食佢就係鍾意佢D膠質，成舊骨膠原”啪”晒入口。D醃料完全被”注入”晒落隻豬腳，味道唔會過濃。

 

傳統食法係以生菜包埋豬腳件，再點少少豆醬，食得辣嘅仲可以加少少辣椒及生蒜相片，包好後一啖咬落去，滋味爆燈。

 

除咗韓國米酒，呢度仲有唔少特色飲品，用黎打咭絶無難度。就好似呢2杯藍檸檬梳打 ($38) 同 Mojito 梳打 ($38)，成隻啤酒杯份量，相當抵飲。消暑解渴又有氣感，Cheers………….

 

友人唔食得海鮮，咁就叫客泡菜煎餅 ($118)，都無問題。將個圓型煎餅剪成四小段再分成小件，食時比較方便。

 

叫得做泡菜煎餅，呢到相當對眼，啖啖都食到爽口泡菜，邊位煎到少少燶脆，與中間軟身口感成對比，點埋個煎餅汁，熱辣辣好味呀。

 

臨走時侍應話星期一至五只有晚市時段 (1700-2400)，依家新增設星期六日有午市時段1200-1600，應該可以疏導到D人龍，唔駛等咁耐就有位，相當好呀。

#ublog #foodblog #koreanfood #mk #foodpics #foodie

走辣的川菜@麻辣香鍋

 之前同友人講起呢間川菜館，佢聽完之後就話要同佢黎，當然無問題啦，地點咁方便。

 

友人話想食烤魚，有鱸魚及魽魚兩款魚($298)選擇，少食魽魚咁就佢啦。已有六款鍋底料，分別為薯粉，木耳，支竹，蓮藕，大荳芽及青瓜條，陣容強勁。

 

口味有麻辣, 香辣，酸菜，醬香或鮮青椒，選擇唔辣嘅醬香，真係丁點紅色也沒有。電鍋滾起就食得。

 

已煎香嘅魽魚多肉無細骨，原條上，肉質唔韌; 魚頭煎香咗都好好”輪”。

 

可以叫其他配料加落去個鍋

 

係咁易叫兩款啦 : 新鮮鮑魚 ($62/4隻)及鴨血 ($32)

 

鮑魚煮熟都唔韌，仲幾彈牙，一啖已咬開兩半。

 

而鴨血滑溜得黎又有少少嚼口

 

薯粉份量都幾多，索咗D醬香汁已經夠晒味道。

 

想要個簡單D嘅炒菜，不作他想就係清炒萵荀絲 ($68)，清甜中帶點脆度，愛上了……………

今次專登留少少肚食甜品，當然係留比紅糖糍粑 ($58)，一客有六條。

半煎炸至外層香脆，內裏又有糯米嘅煙韌口感，點埋紅糖漿食，增加甜味。

 #foodblog #foodiehk #川菜 #旺角

*本站之內容由作者所提供，並不代表本站的立場。因此本站對所有博客的

舌尖上的星馬泰@東羅泰館

 黎開觀塘，好自然選擇開餐地點係一係港鐵站嘅大型商場， 一係就走過去工廠大廈區。原來呢個商場都有選擇，就好似開係3樓空中花園嘅呢間星馬泰菜館。

 

入座時都有八成滿，好彩埋邊仲有枱，仲可以坐係窗邊位

 

店內裝修比人感覺都幾舒服，有卡位亦有單邊二人枱

 

呢輪有D熱氣，巧炒地避開煎炸食物，好在有牛油果米紙卷 ($68)呢度清泉。

 

帶點煙韌嘅米紙卷，包住甘荀絲及青芒果絲，再有幾片牛油果，頂部再有香甜芒果粒，而驚喜之處食到中間位置有片酸薑，甜得黎帶少少微辣。

 

食馬菜都不忘自家用餐”規矩” - 叫客沙律。有D蔬果類食之餘仲係好快有得食(哈哈….)。友人提議燒牛肉配青芒果沙律 ($118)，以青芒果絲作底部，再舖上燒牛肉。

 

估唔到燒牛肉咁大片，入口唔韌喎

 

個人食法將佢用黎包住青芒果絲一齊食，甜甜地又爽脆嘅青芒果絲與燒牛肉係幾夾嘅。

 

原壺上嘅香茅斑蘭茶 ($38)，浸到佢有少少”出色”就飲得，香茅與斑蘭嘅獨有香味散發於口腔內，甜甜地又暖暖地，好岩女士飲。

 

友人叫咗呢杯手作氮氣冷泡檸檬茶 ($48)，佢話夏天飲就岩晒，茶色比起普通檸茶為深色，茶味適中唔會苦，微酸中帶點清新感覺。

 

本來想叫炒棵條，可惜無貨，就轉咗做馬來菠蘿鷄肉炒飯配串燒 ($118)

 

原來個鷄肉係變咗做串燒，鷄肉醃得相當入味，無需點沙嗲醬已經夠味，燒得唔會變乾，唔錯。

 

跟住到個炒飯，有菠蘿，提子乾，臘腸粒，肉鬆同腰果，係個簡易版嘅菠蘿炒飯。欣賞佢飯粒炒得夠乾身，一D都唔油，愈食愈想食。

 

印象中好似未食過怡保蝦湯麵 ($92)，咁就今晚叫碗試吓先。材料有大蝦，半殼青口，豬肉札片，油荀及豆卜。

 

蝦隻已去殼，D殼應該拎晒去餚個湯底，入口有濃濃蝦味，再加入馬菜常會用到嘅參巴醬，微辣中令湯底變得惹味。

 

麵條幾有口感，就算之後先開始食都唔會變腍。

 

仲有甜品供應，但實在有D飽，唯有下次先。

#foodblog #foodiehk #KT