一人主理日本菜@山系本舍

 終於有得飛，但就仲未飛過日本，唔想同人一齊迫，都係遲些少先。唯有係味覺上飛轉先，所以又再一次幫襯呢門日食小店。

 

拉開門就見晒整個食店，裝飾全係和風系，而店主加主廚係你面前即席烹煮，放心………………抽氣系統做得唔錯，食完唔會一身油煙味。

 

就咁憑食材名嘅配搭，手工櫻花蝦醬伴凍豆腐 ($48)以為台灣嘢多D。實物加咗木魚碎及香蔥，日系感覺配增。

 

只有豆味嘅凍豆腐，與咸香櫻花蝦醬聯盟，口感幼滑，涼快感覺作為凍盤前菜都幾唔錯。

 

叫咗客燒香蔥玉子 ($48)，比起平時食開嘅玉子燒薄身D，味道帶甜及有少少香蔥味。

 

係食緊玉子時，聽到炸野嘅油聲，無幾耐就見到呢客黑毛和牛可樂餅 ($58)送到枱上。一客2件，炸至金黃色，再唧上千島醬及沙律醬，未食已感邪惡 (哈哈哈)

 

入口外皮脆度十足，真係一咬就有”嚓”一聲; 裏面相當熱辣，有薯蓉嘅綿滑口感，偶爾見到少少牛肉碎粒，係咪有和牛味已經唔重要，最重要係炸得好好味又唔會一口油。

 

若要我推介呢度嘅必叫佐酒菜，呢客燒鰈魚 ($78)一定入三甲

 

將魚身起肉再燒，入口啖啖肉無骨，再加上係魚身唧上由店主自家創作嘅醬汁，惹味得黎又帶少少辛辣，係有D計仔嘅。

 

而個人覺得條魚骨仲好味過魚肉，點解?! 因為炸至脆卜卜，成條食晒都無問題，脆口食物用黎佐酒，從來都無咩輸過。

 

多款晚食主打選擇，咁樣會再飽肚D囉

 

咁就叫咗呢碗加拿大藍青口鰹魚湯手打烏冬 ($108)。藍青口覆蓋咗烏冬，頂部又再加上木魚碎及香蔥，份量都夠2人分享。

 

藍青口肉身飽滿，入口無渣

 

而個鰹魚湯清淡中帶少少甜味，甜味應該來自湯中嘅大根及南冬瓜; 而個手打烏冬口感順滑，一口烏冬一口清湯，令呢一餐飽暖而滿足。

#foodblog #foodlover #foodpics #japan #太子小店

 

澱粉質大作戰@意粉狂熱

 呢間好耐之前食過，今晚係樓下買完運動用品，上返幾層就到，相當方便。

 

一開波梗黎個沙律先啦，三款選擇當中，有我至愛嘅牛油果沙律 ($48)

 

半個切成片，加入沙律菜，車厘茄及甜橙肉粒，醬汁係甜中帶酸及少少黑椒碎，二人分享岩岩好。

 

見到枱上其中一個餐牌介紹日本首間製造明太子嘅FUKUYA用咗佢製造出嘅鱈魚子，只有呢度先食到。

 

其中一款菜式就係日本產魷魚配鱈魚子忌廉製意粉 ($98)，魷魚圈圍住意粉，中間有一堆鱈魚子，顏色配搭幾吸引。

 

將鱈魚子與忌廉意粉撈均，佢嘅咸味同意粉平均返，加埋忌廉汁，與魷魚圈一啖放入口，整體配合係唔錯嘅。

 

來自日本嘅白桃有品質保證，用黎配合梳打水黎調配特飲，就變成呢杯日本產白桃果肉梳打 ($48)。甜味係來自白桃果肉，梳打嘅清新有氣感，呢D初夏日子好岩飲。

 

鍾情於蒜香白酒汁海蜆意粉 ($78)，加$10有意粉增量1.5倍

 

每隻海蜆都開同有肉係入面，仲食到少少酒香味，加入香蒜炒嘅意粉確實無得輸，而意粉係有口感嘅，就咁單食都好好味。

 

呢度除咗有意粉/意大利飯外，仲有多款薄餅供應，突然間有點選擇困難症出現。直至望到佢………………………………黃金四重芝士薄餅 (配蜜糖)，就唔駛再諗。兩種尺吋，呢個係正常版10吋 ($88)，仲有個細版就 ($58)。

 

材料有4種芝士，茄醬都唔加，完全芝味滿滿。餅底唔算厚又唔算薄，邊位帶脆口，加埋蜜糖落去，咸中又帶甜，咸咸甜甜但係好味嘅，食完一件都唔膩。

 

仲有特色咖啡及甜品，但實在太飽啦，唯有下次先。

#foodblog #food #foodie #foodlover #pasta #pizza #cheese #pastaholic

 

川菜不息@見見面

 係附近大型商場血拼完，撞正開餐時間，又唔一定要係場內搵地方。係佢附近原來都好多唔同餐廳，今晚友人又帶我試新店。

 

一樓係食川式小菜，上二樓就係火鍋放題，自己對號入座。

 

打開餐牌除咗有大路川菜菜式，仲有提供刺身生蠔

 

川菜中冷盤選擇都唔少，友人提出想食紅油豬耳 ($48)，我又點會反對呢?!

 

雖然係紅油，但只屬於微辣，每條豬耳大細厚度適中，咬落爽脆，加埋芝麻嘅香口感，好吃。

 

見侍應擺好卡式氣爐，就知道胡椒豬肚鷄煲 (例牌/$168)跟住上枱。

 

煮返滾起就可起動，煲內除咗有豬肚同鷄外，仲有胡椒，咸菜及蒜頭加味

 

先飲啖湯，胡椒味唔算太濃，多飲亦唔會話太口渴; 鷄件斬得比較細件，豬肚煮得軟硬適中。全程有火慶住，食到最尾仍然保持熱辣度。

 

京川菜中常見嘅蔥爆牛肉 ($88)，呢度當然有。蔥同牛肉嘅比例真係50/50，兩者都係主角。

 

用濃味醬汁快炒，各自披上醬汁，兩者一齊食，用黎送飯確岩數。

 

自從認識咗萵荀，每當係餐廳見到佢嘅蹤影都多數會叫嘅。呢客清炒萵荀絲($78)就咁清炒，落單時可以要求少油，實物又真係唔多油，入口有清脆感，亦食到清甜味道，難怪咁得我地歡心。

 

不能忘掉甜品有紅糖糍粑 ($38)，一客有8條，呢個價錢相當抵食。

 

炸至外脆內軟糯，加埋個紅糖糖漿，又脆又香甜，一條接一條食唔停。

#ublog #foodie #food #foodpics #mk #川菜