味蕾心靈慰藉@東京街

 新年過後，陸續收到去完日本嘅同事手信，東京，大阪，福崗………。搞到我已經決定晚餐要食日本菜嚟平衡返個心理。

 

就去東京……………………….街啦 (哈哈….)，門口裝飾已好鬼和風

 

打開木門，店內面積唔算大，但入座率已經有八成，好彩仲有張二人枱。

 

友人主食點咗個三文魚海膽籽盛丼 ($188)，有埋蒸蛋，沙律及麵豉湯，相當豐富。

 

成個丼被厚切三文魚及海膽覆蓋咗一大半，玉子及蟹柳仍能佔領當餘位置，成個丼顏色配搭搶眼。

 

厚切三文魚入口鬆軟，又夠口感; 至於海膽啦喎，當然要配飯及魚籽一齊食啦。海膽嘅鮮甜味與脆卜卜又咸香嘅魚籽係味蕾先後爆發，正呀。

 

小食要串燒當然唔少得，就叫燒牛舌 ($28)及燒雙椒一口牛 ($28)啦

 

推介呢客燒牛舌，有一定厚度，入口有燒烤香味，而件牛舌亦相當嫩滑，加少少少黑椒調味，一串唔係幾夠喉………哈哈。

 

而串燒雙椒一口牛就給比下去了，但都係正常水準啦。

另一客主食出場…………………菊 壽司定食 ($178)，亦有蒸蛋，沙律及麵豉湯。

 

壽司種類包括魚類，貝類及海產類都有D，幾多樣化。

 

佢地就係三文魚，原隻北寄貝，油甘魚，鱆紅魚，甜蝦，帶子，赤身，八爪魚，池魚及加州卷

 

壽司細細舊，絶對可以輕鬆食晒全部，可以有空間叫其他嘢食。帶子壽司係我嘅至愛，飯粒鬆軟醋度適中，一啖一舊快靚正。

 

二大枱枱面唔大，建議可以之後加單，咁就食得輕鬆啦。

 #japan #foodpic #foodie #foodblog #sushi #don

味味都係”偷飯賊”@麻辣香鍋

 寒冷天氣值班於新春日子，食辣可驅寒，又係附近睇完賀歲片，行經呢間川菜館，今餐就係呢度開啦。

 

菜館提供大路川菜，如酸菜魚，水煮系列，孜然牛/羊，川式小炒及香鍋等，辣度隨你喜歡。

 

前菜先黎客夫妻肺片 ($66)，份量以前菜黎講算幾多，加入甘荀及青瓜絲中和麻辣度之餘仲加一份清爽。

 

無肺但有牛舌及牛肚，牛舌切成一大片入口軟滑，配以麻辣醬汁，麻香辣度可接受，用黎送凍飲，食住等熱炒上枱。

 

一向都鍾意食干煸四季豆 ($72)，材料簡單但肉碎炒得夠乾身，加入醬油蒜蓉米酒一齊炒，四季豆掛到少少油之餘又唔會太過油膩，單食或送飯都唔錯。

 

要食魚片，唔一定要叫酸菜魚，可以考慮叫呢碟蓮藕仔炒鯛魚片 ($98)

辣椒指數係一隻，味道偏酸辣; 無骨鯛魚片，入口偏爽口

 

第一次食蓮藕仔，迷你身型好得意，口感食落似食荀般爽脆，幾過癮; 仲有其他配料如洋蔥，木耳，甜椒及蔥段，豐富咗顏色賣相及口感。

 

呢客川香鮑魚鷄煲 ($168/半隻)，好岩新春日子食，有鮑魚又有鷄，豐衣足食。

 

連殼鮑魚有4隻，起肉都唔算太麻煩; 入口彈牙，唔係食緊香口膠;

 

選擇唔辣，半隻鷄件份量相當對眼，加入其他配料一齊炒，幾惹味，又係好岩送飯。

 

食川菜指定甜品，當然係紅糖糍粑 ($58)無走鷄。一客有成10條，相當抵食。

 

每條炸至金黃色，沾上紅糖漿一齊食，入口先係外脆，之後有糯米嘅軟糯感，兩啖就KO一條，香口味甜，邪惡度爆燈。

 

上菜速度快，熱度夠，味道岩口味，下次可以試下其他菜式。

 #food #foodpics #MK #malahotpot #foodblog

排檔風味@九鼎百味

 依加想食大排檔真係買少見少，通常係熟食中心都仲可以搵到。呢間就係觀塘區嘅。

 

主打鷄煲小菜，今晚黎到都坐無虛席咁劑，好彩仲有張二人枱。

 

手寫菜牌但無寫價錢，望下枱上餐牌，價錢都係親民價，菜式選擇量會令到有選擇困難症嘅客人”病發”。

 

就咁簡簡單單叫幾樣大牌檔必有菜式

 

首先出場有呢碟京都骨 ($88)，顏色鮮艷，刺激食慾

 

選用排骨帶點軟骨，豐富多D唔同口感; 外面帶少少香脆度，肉質唔鞋口; 個酸甜汁包圍住每件排骨，減底肉類嘅膩度。仲有綠紅椒，紫洋蔥及菠蘿件，紅黃綠紫包羅萬有。

 

有肉當然要有菜，呢客蒜蓉炒豆苗 ($98)大碟得令人懷疑人生(哈哈…)，成坐”豆苗山”咁。

 

印象中豆苗價錢都唔平，呢碟份量足夠4人食; 以蒜蓉快炒豆苗，唔會過老又有蒜香味，最好就係唔會食完成口油。

 

壓軸出場就嚟個金菇肥牛粉絲煲 ($98)，份量又係對眼嘅

 

肥牛藏身於金菇粉絲中，薄薄一片，一夾輕取2-3片

 

仲有金菇粉絲都唔可以錯過，沙嗲汁”賜予”佢地味道，用黎送飯，添飯都仲得。

 

要食大排檔就係想要佢嘅風味同鑊氣，呢度出品每樣即叫即煮，入口熱辣辣，份量又大碟，絶對合格有餘。

#ublog #foodblog #foodpics #foods #kwuntong

上海菜之夜@夏麵館

 要我諗起性價比唔低嘅上海菜店，我會即時諗起呢間

 

多數食開太子店，估唔到呢區都有一間。面積幾大，樓底又夠高，坐得幾舒服。食物價錢大多數唔過百，由前菜/飯麵/小菜/飽點/甜品都有。

 

食上海菜要叫酸辣湯，就好似食泰菜要叫冬蔭公一樣。不過今晚就叫咗酸辣湯麵 ($55)做麵食。

 

個碗真係幾大個，好彩份量都有半碗; 材料有肉絲，木耳絲，荀絲，豆腐絲，冬菇絲及蛋絲。酸辣度對於我黎講係可以接受，麵條偏軟身，食晒成碗都幾飽。

 

友人無飯不歡，簡而清有呢個老上海炒飯 ($65)

 

材料除咗有蝦仁，加入蛋及蔥粒一齊快炒，加多點香味; 飯粒乾身分明，但又唔會食到一口油，咸淡適中。

 

幾喜歡食佢嘅糖醋魚塊 ($72)，配以青紅椒，菠蘿及洋蔥，顏色吸引。

 

酸甜度岩岩好，略嫌外皮脆多一D會好味D，入口夠熱，啖啖魚肉食得開心。

 

想食炒菜呢度都有，又係簡單咁叫碟蒜蓉炒白菜 ($52)，份量足夠2-3人食。熱辣又有蒜香味，無沙，空口食都唔錯。

 

侍應主動加茶收碟，上菜速度都快，QR Code / 點餐紙落單都可以，照顧客人不同需要。

#ublog #foodblog #foodpics #food