抵食味美中菜@小城大廚

 友人即將離港，好唔容易先約到佢食呢餐，就當做冬兼餞行，中菜係佢提出想食嘅，咁就同佢黎呢間。

門口見到易拉架，新加入任飲任食無限時養生鷄煲

入座率都有一半，好多大枱都坐滿，好彩細枱都仲有少量。

呢度有D由東主親自下廚嘅特別菜式，有D要預定先有得食。今晚都係普通小菜就可以。

自肥項目，叫隻紅燒乳鴿 ($48)作餐前小食。皮香有鴿肉味，細細隻又咁香口，過口癮之餘又唔怕食唔落飯。

 

咬緊隻乳鴿肶時，一大盅瑤柱粟米羹 ($98)就上枱啦，醒目侍應仲拎埋楜椒粉，正。

 

食開都係配魚肚多，今晚配瑤柱，入口除咗有粟米嘅香甜味，仲偶爾食到瑤柱絲，飲完一碗都幾飽肚。

星期一至日都有每日特價精選，今晚有蒸魚及鷄，兩樣都岩食喎。

 

呢條清蒸沙巴龍躉 ($98)，約重一斤，兩三個人食岩岩好。

 

蒸得岩岩好，骨肉輕易被分離，皮同肉都滑，無咩細骨，食得輕鬆，魚當然要趁熱食。

 

另一客特價菜式，客家蔥油鷄 ($78/半隻)，睇鷄皮顏色都似樣。

 

隻鷄醃得夠咸香入味，唔食皮嘅可以輕易撕走; 鷄肉肶位位置相當滑溜，加埋蔥油，變成偷飯賊。

 

當然要加碟菜，惹味之選有椒絲腐乳炒生菜 ($78)，快炒可以入口仍然帶爽脆感，又係好送飯嘅。

 

呢餐有湯/魚/鷄/菜，簡單平凡唔花巧，食完希望友人係另一地方有美好新生活。

#foodblog #foodie #foodpics #kwuntong

有水準有驚喜@Four O Five Coffee & Eatery

 踏入十二月並就黎聖誕，好自然咁會諗起食西餐。駐觀塘扮工人士分享呢間食過午餐嘅西餐廳，話要我陪佢食埋晚餐。

 

推門入去，環境幾寬落唔嘈炒，周圍放上聖誕佈置。

 

食西餐指定動作……….叫沙律!! 之前係其他餐廳食過慢煮雞胸，感覺唔錯，咁岩呢度有慢煮十勝雞胸沙律配蘋果柚子汁 ($98)。

 

淋上蘋果柚子汁後，令沙律味道整體變得甜中帶微酸，令人開胃口。件慢煮雞胸入口幾嫩滑，爽脆沙律菜及脆麵包粒，亦豐富咗沙律嘅”內涵”。

 

歡喜食蟹但唔歡喜拆蟹過程，呢客蒜香蟹肉意粉 ($138)就幫咗我忙啦。

 

蟹肉放於用香蒜炒嘅意粉上，每條意粉都有蒜香味 (吸引!!); 蟹肉已準備就緒，一啖放入口，香蒜味及蟹肉已沖擊我嘅味蕾，食得開心又滿足。

 

一段時間無食過漢堡，咁就叫客手工日本和牛漢堡配薯條 ($128)

 

驚喜位係由一個變兩個，無論同人開心分享抑或獨食，都唔會食得論盡。

 

漢堡嘅餡料都係應有嘅都有，反而想講係個飽，預先煎香咗，入口外脆內鬆軟，件漢堡唔會一咬即碎，整體黎講都幾唔錯。

而藍炸薯條入口唔油膩，真係漢堡嘅黃金拍檔。

友人話呢度嘅梳乎厘班戟可算係招牌甜品，由於製作需時，建議食到咁上下就落單先。今晚就試吓伯爵茶珍珠梳乎厘班戟 ($118)，三大件梳乎厘班戟，鬆軟程度令頂部之旗都側埋咗一邊 (哈哈)

淋上伯爵茶味奶漿，配埋珍珠同Oreo 碎，增加唔同口感。

件梳乎厘班戟本身幾香蛋味，好鬆軟，估唔到伯爵茶同珍珠都幾夾，果然係招牌甜品。

 

杯Flat White (跟餐價$32)留待食甜品先上，未飲已聞到咖啡香味，夠熱度，入口有奶嘅香滑口感，一口班戟，再呷啖咖啡，絶配。

 

臨近聖誕，有二人聖誕套餐，價錢相宜，可以考慮下喎。

#foodblog #foodie #foodiehk #foodblogger #KT #cafe

旅行後要潮食@陳儀興飯店(將軍澳嘉悅)

 去完旅行返黎，大部份都係燒肉同炸物，有D掛住中國菜，又想飲D湯水，行下行下就推門入去。

 

經過滷水部玻璃窗，見到滷水鵝已經流緊口水

 

好彩仲有張細枱，潮式三小碟已經擺好個陣。

 

最快上枱嘅係韮菜豬紅 ($70)，份量相當大碗。豬紅夾得起同有滑嫩口感，加埋注韮菜一齊食就仲惹味。

 

歡喜呢度嘅是日燉湯，不定期轉款，每盅都熱度十足。

 

今晚分別有蟲草花雪耳燉雞湯 ($68)，比埋湯料你睇/食，蟲草花可增強免疫力，岩晒呢D流感高峰期。

 

呢一款係姬松茸燉雞湯 ($68)，味道清甜唔油膩，D鷄骨都燉到軟晒，夠晒火喉，飲完除咗半飽外，感覺舒服。

 

食潮州嘢點少得滷水鵝，有人鍾意啖啖肉會食鵝片，我地就鍾意有D骨仲香D，所以滷水鵝件 ($148)就上咗枱啦。 百幾蚊有咁嘅份量相當抵食，底下用大荳芽代替滷水豆腐，加少少炆花生。

 

有下裝位，件件都相對黎講係多肉食嘅。滷得相當入味，肉質有嚼口，點少少醋汁食，幾好送飯。

 

係呢間開飯，除咗有打冷嘢食，仲有D港式小炒，就好似呢碟脆盞咕嚕肉 ($108)，賣相都靚仔。

 

話明咕嚕肉就梗係啖啖肉啦，咬落個炸粉漿唔厚，輕易食到舊肉; 個酸甜醬汁酸甜度岩岩好，開胃之餘又係好送飯。

 

今餐食得相當滿足，埋單走人出外行一行先得。

#ublog #foodie #foodpic #tko #打冷