保持高質水準@Sabrosa

 世界杯踢緊之際，支持西班牙隊嘅友人相約食飯，佢想食西班牙菜，問我有無好介紹? 有................咪呢度囉。

昏暗燈光，最岩黎round Happy Hours，但今晚肚餓指數都幾高，留待下次。

睇番餐牌，由頭盤/小食/主菜/手工意粉/甜品都有供應

天氣忽然又變成春天咁，溫度上番去廿幾度，黎一客精選凍湯 ($78)都唔錯。今晚係蕃茄凍湯。

配以餐前香草餐包，湯質比較濃厚D，蕃茄嘅酸味幾出，凍得黎相當開胃，偶爾食到多士脆粒，飲完都微飽。

Tapas中相當歡喜炸西班牙辣椒仔 ($68)，滿滿嘅翠綠色放滿一小碟。

灑上調味粉，入口惹味; 每隻辣椒仔嘅辣度都唔同，但總括黎講都係微辣，空口食絶對無問題。

見到有水牛芝士又"睇唔過眼"要叫一客，新鮮水牛布垃塔芝士配青醬車厘茄沙律 ($118)

紅白綠三色，切開原粒水牛芝士，同佢嘅新拍檔車厘茄都夾到，微酸味道中和咗芝士軟糯，又有火箭菜嘅獨特味道。

侍應推介各款海鮮，款款唔同煮法，價錢望落合理

喜歡燒魚多過炸魚，原條燒海鱸魚 ($238)，配以檸檬及茄汁醬點食

見到條魚嘅燒紋已令我口水流出，唧少少檸汁提鮮

魚肉頗多，偶有細骨，唔會燒到乾及嚡口，呢口價有咁嘅陣容，抵食之選。

仲有配菜跟埋，有新薯，辣椒仔及蘿蔔仔，新薯及蘿蔔仔食出甜味，處埋配菜類都絶不馬虎。

呢度某部份意粉類係手工製，就好似呢一客黑松露野菌忌廉寬帶麵 ($228)

咪講笑，未食已聞到黑松露嘅獨有香味，野菌厚肉又有濃香菇味; 每條手工寬帶麵都沾滿香滑黑松露忌廉汁，口感煙韌，手工果然同機製有分別，好味道。

甜品時間又到，四選一中，巴斯克焦香芝士蛋糕 ($88)獲勝，熱辣辣香噴噴，口感似食緊布甸，甜度適中，二人開心分享。

再到回頭幫襯都仍然保持到水準，當然會下第三...四.....五六七....次啦......哈哈!

#foodblog #food #foodie #sprain #foodpics #CWB #dinner #tapas

和洋食@鷹 西日料理

 途經呢條食街，侍應姐姐係門口作介紹，又有一間新開主打和洋食餐廳進駐。裝修走民青風，兩層用餐區。

自己嘟QR Code落單，提供一次性餐具，衛生方便。

見到有牛油果，當然要叫個煙三文魚牛油果沙律 ($38)，以木碗作器皿，顏色配搭夠吸引。以油醋汁作醬汁，清爽沙律菜加上咸香煙三文魚，又有香滑牛油果(再多D就仲好.....)，清新開胃。

即叫即炸邪惡之物.............炸芝士年糕 ($28)及炸鷄軟骨 ($22)上枱啦，一軟一硬，鷄軟骨沾沙律醬，叫人點抗拒?

一口咬入炸芝士年糕，軟滑芝士"輕瀉"出黎，甜美可口。

再來串燒鷄腎 ($18)及免治鷄肉棒 ($18)。鷄腎燒得夠乾身，唔係係咁易燒兩嘢，加埋調味粉，好味; 免治鷄肉棒有埋個蛋汁一齊食會好味D。

呢度都有刺身供應，走飯唔食刺身丼，變成牡丹蝦刺身 ($88/2隻)及吞拿魚刺身 ($58/5件)

牡丹蝦略為細隻咗D，肉都鮮甜嘅; 反而吞拿魚就好岩我食，唔肥膩入口柔軟，輕鬆KO無難度。

多款意粉/飯類，點選壽喜燒牛肉溫泉蛋飯 ($78)，賣相幾靚仔，又夠大碗。

整穿隻溫泉蛋，蛋汁流入飯中，牛肉帶點嚼口，再多點壽喜燒醬油汁就仲好送飯。

唔要澱粉質，有肉類主菜選擇，來一客燒西班牙黑毛豬豬鞍配甜薯蘋果蓉 ($148)

燒至金黃色帶點焦香，以黑椒鹽作主要調味，厚度岩岩好，肉質超嫩滑，咬落流出肉汁。

嘆埋杯Latte ($32)，綿滑奶泡，咖啡味香，甜品就留待下次。

#foodblog #food #foodie #foodpics #japan #western #MK

阿媽都話正@陳儀興飯店

 今晚母親大人大駕光臨，血拼完後又係時候補充體力，問佢想食咩? 佢話想食潮州菜，好彩有呢間。

早到早食，二人安排四人側邊枱，滷水/傳統潮菜/小炒/水煮系列一應俱全

熱辣辣燉湯首先出場，今晚有蟲草花雪耳燉鷄 ($68)，可提高免疫力，雪耳潤肺養顏。超足料，面層唔會有層鷄油，味道清甜，阿媽話飲完成身䁔晒。

凍食元朗黃油烏頭王 ($188)，已起主骨，食時相當方便，有普寧豆醬點食。

話明係黃油烏頭，中間位置係見到黃油嘅; 肉質鮮甜，唔點醬汁食都好味，煮法愈簡單愈能食出原味，正呀!

潮界嘅脆物擔當，當然唔少得蠔餅啦 ($93)，送埋魚露點食

蠔仔飽滿，散滿係蛋餅漿內，入口先脆，然後有蠔仔嘅柔軟口感，用啤酒汽水黎配搭，咁邪惡得唔得架?! 哈哈.......

簡單又專一地點咗呢碟滷水鵝件 ($148)，份量夠2-3人分享，相當抵食。

鵝肉入口無渣，滷得相當入味，皮下脂肪適中，用黎送潮州粥都唔錯。底部有大豆芽，若果有埋滷水豆腐就仲正。

上菜速度快，坐得幾舒適，本想食埋糖水但已經好飽，綠荳清心丸.................你等我呀.....。

#foodblog #food #foodie #foodpics #chiuchow #TKO