愛上牛頸脊@米走雞Live

 撞著仲有微涼天氣，火鍋活動唔好比佢停住，火鍋就諗起牛肉，牛肉就令我諗起佢..................

無黎一段時間，落單已轉為手機二維碼自己搞掂; 仍然可以坐到卡座，食得輕鬆舒適

每次黎呢度打邊爐，都一定要叫份手切霜降牛頸脊 ($258/小)，夠2-3人食架啦。睇見佢肉色靚仔，脂肪分佈平均就知佢咩料啦

簡單D配個清熱又下火嘅皮蛋芫茜湯($98)，仲有埋粟米同豆腐。切成蝴蝶狀，輕輕灼幾灼轉色就食得。

點D醬油加芫茜蔥一齊放入口，油香肉嫩，一啖一片夠口感，好夠肉味，超級好味。

丸同餃又係不能缺少嘅Buddy，有半份叫的，呢客手打墨魚丸 ($48/半份)，外觀上已能一眼認知係手打類

咪講笑，入口真係食到墨魚粒，相當彈牙又增加口感，機製嘅確係無得相比。

仲有韮菜餃 ($48/半份)

烚完都唔會輕易散開，餡料有滿滿嘅韮菜，入口帶少少麻油香味。

友人想食白鱔片 ($98)，切得薄薄一片，色澤亮麗。

烚完卷成波浪型，微彈牙口感，肉味幾鮮，細骨唔太多。

索湯"油物"鮮炸響鈴 ($32/半份)出場，三秒.......浸三秒，仍然享受到外層索湯，內圍仍然保持脆度嘅雙重口感。食完2條都幾飽肚。

 #food #foodie #foodblog #KT #hotpot

手工薄餅無得輸@MANO

 友人公司搬咗黎呢幢商廈，話搵日同我黎呢間意大利餐廳食晚飯，點會say NO呀..........

主打手工薄餅，亦有意粉及肉類，手調飲品及甜品亦有提供

聽住節奏輕快歌曲，比人一種放輕鬆感覺

未開餐先黎杯甜美Mocktail，呢杯係Bellin Di Mano ($68)，主打材料係桃蓉配上檸檬汁及梳打水，桃味唔算好出，味道甜中帶微酸，清新有氣感，難怪出場率穩佔三甲位置。

餐前一點綠，養成健康飲食好習慣，是日代表就係Rocket & Pear Salad ($78)，沙律醬汁用上意大利黑醋，成件事配合主題得黎又健康

大量火箭菜，係佢FANS嘅應該會好滿足。梨連皮切成薄片，食起黎唔會有渣; 底部暗藏合桃，增加口感; 有時食到多汁車厘茄，有時又食到巴馬臣芝士，無論味道與口感都相當豐富。

呢度嘅手工薄餅出晒名，點可以唔試下?! 9款薄餅中，得Aloha ($148)係有菠蘿，應該係照顧番香港人口味。

原片新鮮菠蘿舖係火腿上，菠蘿嘅酸甜加上火腿嘅咸香

即叫即焗，夠晒熱度，批邊焗至脆口，偶爾食到燶位; 中間位係柔軟而有彈性口感

夾埋mozzarella，輕易做出拉絲效果，茄醬加車厘茄，平衡成個餅底。

感覺上呢度嘅薄餅無咁油膩，用手食都唔會手指油晒，成個薄餅二人分享岩岩好，仲有空位食吓其他食物。

試完手工薄餅，又點少得Pasta?! 食評中呢客Braised Oxtail Penne ($138)得到好評，炆牛尾? 我岩架........就要呢客啦

以蕃茄汁配牛尾，排頭上應該都唔會輸。牛尾有三件，炆得入味之餘又容易食到肉，但又唔會過腍，最緊要唔會食完一口油脂味，事前處理功夫做得幾好。

配以長通粉，中間個洞可以索汁，一咬D醬汁流出黎，若然煮腍些少就仲好。

食完再要杯"餐後啡"，溫和D就要杯Flat White ($35)，送我一個心心拉花，奶泡香滑，啡味岩口味，暖暖的完成呢一餐………

仲有幾款甜品供應，留待下次吧......................

#food #foodie #italy #dinner #kt #foodblog

巧得SET完勝@巧得鍋

 其待已久嘅秋天終於見面啦，涼涼地仲唔快D開動火鍋引擎，又黎咗呢度啦

送上涼伴蓮藕及脆花生，一路食一路睇吓食咩

開初諗住散叫，但見到有呢個巧得SET，$298位，兩位起，岩晒二人撐枱腳唔駛諗

都幾多嘢食架，先嚟個鍋物，多款選擇中(有雞鍋/烤魚/豬骨/牛雜/酸菜魚)，我哋要咗招牌鷄鍋 (半隻)

辣度要小辣，加入大量洋蔥，薑片，蒜頭及芹菜，再用惹味鷄煲醬汁一齊炒，鷄件索入醬汁，一件駁一件食唔停口。

呢個香脆魚皮送嘅，作為餐前小食又或係陣間火鍋時間都咁岩食

餐飲兩位，除咗果汁要另加$12，其餘嘅特飲都可以叫，我就叫咗呢杯檸檬青蘋果夢幻梳打特飲，香甜有氣................CHEERS!

完成鷄煲再加湯，就正式進入火鍋環節.....

套餐肉類選擇有牛/豬肉拼盤，除非唔食牛，否則見到呢個牛肉拼盤，就知道係無懸念勝出。成個拼盤係由安格斯牛肩脊，牛肩胛及牛柳粒所組成

牛肩脊雖然薄身咗少少，但入口相當夠肉味，一轉色就食得。

而牛柳粒食起黎相當有口感，軟身中帶點兒嚼口。

之得有個大拼盤，每樣都有D啦

海鮮類有帆立貝，日本廣島蠔，蜆

隻帆立貝堅厚肉，鮮甜.....

仲有丸及餃類，每人都有1隻/1粒

手打蝦丸及墨魚丸幾彈牙; 自製鮮蝦水餃有木耳嘅爽口及彈牙嘅蝦

均衡營養當然唔少得菜啦，有呢個蔬菜盤，三款菜仲有冬瓜及南瓜片，單食有份甜味。

未食時以為要加多份烏冬/紅薯粉，點知原來食晒都好飽，尤其係個牛肉拼盤，比想像中嘅多。店員招呼殷勤，不時主動加湯及換碟。

最後仲有哈密瓜作為飯後果，冰凍多汁，火鍋後就是需要一點冰凍感覺。

#ublog #food #foodie #hotpot #KT #foodblog