初嚐尊貴餃子@餃掂

 呢間餃子專門店，今晚行開呢個商場先知原來呢度又開一間，開放式設計。

未試過龍鳯松茸雙湯餃 (跟狀元九鼎湯) ($92/8隻)，價錢反映用料，今晚心血來潮想試下係咩味道

龍鳯即係黑白松露，隻隻飽滿，未食已見到"黑影"

狀元九鼎湯，係以蛇果，生魚，淮山，無花果及豬尾骨煲，絶無味精，入口鮮甜，功效補氣健脾，用黎浸住D餃子一齊食又係另一種食法。入口滿滿松露獨有味道，豬肉饀料幾札實，食晒成客都好飽肚。

有D餃類係要煎先好食，例如芫茜/芝士類，所以我叫芫茜豬肉煎餃 ($52/7隻)

未食已見到外皮煎到金黃色，尤其係餃底

入口熱辣辣，外皮帶點脆度; 芫茜香味係口內爆出來，加點香醋食就仲好味。

唔想飲汽水，有益袪濕之選有檸檬薏米水 ($20)，甜度適中，又可以食埋D薏米，加入檸檬汁更加好入口。

就咁食餃子比較單調D，叫咗個蔥味酸辣雲耳 ($25)黎刺激吓味蕾。酸酸辣辣又有雲耳嘅爽度，另一種口感。

跟手見到有四川涼皮 ($32)，涼皮我都鍾意食呀，呢個份量獨食岩岩好。

醬汁帶微酸，辣度又唔太覺有，再灑上花生碎及青瓜絲，入口滑嘟嘟但又帶點煙韌口感就係涼皮吸引之處。

友人就食四川涼麵 ($30)，跟麻醬，點咗小辣，辣醬就輕手D，撈均後食，爽口嘅麵感都唔錯。

後記 : 唔見有醃蘿蔔食，有點兒失望................

 #dumpling #food #foodie #foodblog #TKO

去Bar都有好嘢食@Garden Bar & Restaurant

 行去韓國街又唔一定要食韓菜，附近都有幾間Bar，行過呢間覺得幾岩feel

入去前除咗掃安心，仲要出示快測陰性證明相片，餐廳有提供快測棒 ($20支)，未做都唔駛擔心

望住以綠草作佈置，燈櫃放滿唔同酒類，播住grovvy 歌曲，飲嘢同時開埋餐

叫杯嘢飲爽吓先，兩杯分別為Happy Ending (Mocktail) 及 Mojito (Cocktail)，Cheers................

為配合飲嘢，當然要叫D稍為濃味嘅小食，一路飲一路食先岩數嘛

先黎烤鯖魚柳 ($78)，日式整法，配以檸檬汁提鮮

件鯖魚柳燒得皮脆肉仍然帶汁，調味得岩岩好，偶然食到小骨，無問題啦…

食完日式到泰式，串燒(豬/牛/雞) ($128/6串)

每款兩串，鷄串稍為燒得燶少少，點埋香甜沙嗲醬，一啖一舊，輕鬆無壓力。

呢個賣相吸引嘅係燒牛肉沙律 ($128)，牛肉完全遮蓋咗沙律菜，配以食用花點綴，靚呀............

牛肉薄切，邊位火灸過，其他仍然帶粉嫩色，入口相當嫩滑

以獨有惹味辣汁作沙律汁，辣度都唔可以睇少，好味得黎又相當刺激，要飲多啖凍飲平衡一吓.......哈哈哈。

以不同款式蔬菜如紅黃綠甜椒，露荀等炒嘅意粉，就成為呢客意式香草有機蔬菜意大利麵 ($128)。清清地無肉之選，簡單食到蔬菜甜味，意粉有口感，加上松子青醬，少點油會更加好。

賣相成朵花咁嘅就係黑松露什菌薄餅 ($148)，送上枱未食已經聞到黑松露嘅獨有香味

中間饀料當然有黑松露及什菌，被軟糯芝士包圍住，無茄醬，無菠蘿 (哈哈....)

餅底捨棄傳統粉糰，改為薄脆底，食起黎兩種口感，食晒成個都唔會好膩，用黎送啤酒都幾唔錯。

無大電視播球賽，可以專心同輕鬆咁同友人傾下計，食吓嘢，何等美事。

#food #foodblog #TST #bar #restaurant #foodpics

chill 爆 KT@Flames

 估唔到工廠區內都有呢間咁型格嘅餐廳，睇門口裝修都已經好岩眼緣

門口有餐牌參考，係食西餐嘅，見仲有枱就推門入內。店內樓底夠高，播住輕快音樂，想飲嘢可以坐入面，用餐區就門口直入位置，感覺相當CHILL

有二人/四人套餐，當然有散叫，價錢唔係離地價

西餐指定動作............先食客沙律作前菜，今晚有香煎半熟吞拿魚車厘茄沙律(配青檸青瓜薄荷汁) ($138)

橙/紅色車厘茄上面有幾塊香煎半熟吞拿魚，口感似煙燻魚肉，帶少少黑椒味，伴以酸酸地嘅沙律汁，作為開胃沙律，岩數。若果有埋沙律菜無論顏色/口感就更加好。

咁CHILL嘅地方，當然有酒類飲品，各式紅/白酒，Cocktail/Mocktail，咖啡/茶類都有。炎熱日子，最岩飲杯果味飲品，呢杯荔枝紅茶 ($38)，價錢公道，一飲香甜荔枝味，爽呀!

主菜方面，除咗肉類，仲有意粉類/薄餅 (下次一定要試下薄餅，見隔離枱食得好滋味)

首先出場係蟹肉巴馬臣芝士蕃茄忌廉汁通粉 ($138)，送上枱後未食已經聞到芝士香味，趁熱快D將佢同醬汁一齊撈均先

忌廉醬汁即時再變得creamy D，每條長通粉都"披"上呢一身綿滑醬汁，口感煙韌，唔會過腍; 偶爾又食到絲絲蟹肉，增加鮮甜味道，好味!!

長通粉尾聲之際，呢客葡式香辣焗春鷄配薯條 ($238)隆重登場

原隻春鷄開邊，香味飄入我鼻腔中，口水流緊.........

皮薄無脂肪，焗到香脆，一咬落去真係會有少少"嚓"一聲; 鷄肉仍帶少少肉汁，配特色辣椒醬點食，增加香辣刺激感。

下次一定要黎試下呢個二人晚餐，飲品仲買一送一，仲有自家製蛋糕作甜品，目測份量唔細件，賣相都幾吸引

#foodblog #foodpic #KT #foodie #foodpics

火紅餃子@滾餃

 睇咗YT美食頻道介紹餃子店，咁岩有間係觀塘，評語仲唔錯，當然想試下係咪真係咁正

就係呢間，可能出咗街之後，未行到店門口已經見到一堆人等緊位，好彩好快都有位

多款餃子，有D一定要煎，例如芝士系列。而生餃要三日前預訂。

今次初試蒜芯鮮蝦豬肉餃 ($56/8隻)，因為有蒜芯，所以我選擇煎嘅

餃子體積唔算話好大隻，煎得外皮夠香脆

點D醋食煎餃係指定動作，趁熱快D咬一口，食到蒜芯鮮蝦豬肉，蒜芯味幾出，鮮蝦仲係原隻，調味得唔錯。

餃子加$8可配上海麵/米線，湯底為特濃豬骨湯底，唔油，份量適中。

有辣菜圃碎試食，用黎送上海麵都唔錯，咸香有辣度。

供應冷盤小食，試咗手拍青瓜 ($24)，蒜泥淋上青瓜上，醬汁為酸辣味道，食起黎相當清新醒胃。

星期五開多一個鐘至九點關門，但到八點已經截客，想食嘅記住睇鐘。

(今晚坐正垃圾桶隔離，感覺有D唔太好，見到店員冚返個垃圾蓋後，隨即去傳菜.................希望店主多加留意)

#foodblog #kwuntong #dumplings #foodpic #food #foodie

食全餐@時代冰室

 又係花墟買完花，近近地係附近食埋先返屋企，經過見到呢間茶餐廳燈光通明，唔駛諗就掃安心入去開餐。

面積都幾寬敞，裝修比較時尚，比呢個光管宣傳字句吸引住

最先出場係無骨海南鷄飯 ($67)，賣相整齊，湯變成老火湯

無骨食起黎相當方便，三款醬任你選; 唔食鷄皮可輕易撕走，碗飯夠大碗，食晒成份相當滿足。

加$20可轉套餐，凍飲唔駛再加錢，即叫杯凍檸茶飲吓，不銹綱杯夠晒一餐飲; 暖心湯(即係時日例湯); 迷李胡麻沙律及牛角包，四樣野都係加$20，真心超值。

打開餐牌就首先見到招牌蔥油三眼煎蛋系列，係豬扒/巨人鷄肶/生煎肉餅中，巨人鷄肶 ($61)成為入選佳麗。三眼煎蛋(採用日本蛋)連為一體覆蓋咗係飯上面

巨人鷄肶坦白講與平時食到嘅差唔多大細，入口皮脆嫩滑，應該係生炸，醃得幾入味，加埋有蔥油香味，啖啖肉都唔錯。

煎蛋有少少蛋汁流出，加埋甜豉油一齊撈飯食，點會唔好食?!

茶餐廳都有甜品時間，紅豆雪糕一口西多士 ($38)，二人分享岩岩好

西多士已經邪惡，要一致甜味，中間無夾花生醬，加埋香滑朱古力雪糕球同甜美紅豆，一凍一熱，一口半件，為呢餐加上一點甜。

有湯有沙律有餐包，連埋主菜同飲品，仲有埋甜品，食全餐呀:)

#food #foodblog #foodie #foodpics #foodpic #cafe #太子 #times