食住玩又玩住食好西@AnyMomentCafe

 家下想搵間唔限用餐時間嘅餐廳要做D事前資料搜集，鬼叫租金貴咩，尤其係地舖果D，限時可以做多張單嘛!

想同朋友開餐時可以傾耐D計，佢帶咗我去呢間樓上Cafe

大量Board Game任玩，有我最愛嘅"桶大叔"呀........

好客老闆仲會有私心推介.......哈哈

主食主要係七款意粉/螺絲粉，即叫即煮，呢客係羅勒海鮮意粉 ($119)，賣相絶對唔輸蝕得過西餐廳

海鮮配料主要有蝦及大量蜆肉，加埋香蒜片及羅勒調味，未食已聞到蒜香味; 意粉係有口感嘅，略為油咗D，整體味道配合得唔錯。

鏡頭一轉就去咗呢客韓式牛肋條 ($119)，以生菜作配菜，莫非配合番韓式食肉會用生菜包住食?! 有趣....有趣!!

兩條牛肋條煮得夠淋同入味，意粉亦沾上醬汁嘅甜味，就咁單食都好味。

加$20有田園沙律，簡單地用黑醋橄㰖油撈均沙律菜，為呢餐加多一點綠

有食當然有飲，大量飲品選擇，加錢叫咗杯柚子梳打及特濃朱古力特飲，前者係非常適合係咁熱嘅日子黎一杯清爽梳打，仲要有埋香甜柚子; 而後者超香朱古力味，香滑但又唔會好甜，飲到尾仲有少少碎冰，好好飲呀!

身為芝士控嘅我，見到餐牌上有芝士薯條 ($62)，點可以唔叫?!

呢度嘅醬有D特別，唔係單純芝士醬，係加埋千島醬，食落多份酸甜味，無純芝士咁膩; 粗薯條配惹味醬汁，雙重邪惡。

浸得相當入味嘅瑞士鷄翼 ($61/6隻)，隻隻肥嘟嘟，味道無出面食到嘅咁甜，熱辣辣趁熱食啦喂

有兩個Party Set，適合4-8人或9-14人，炎炎夏日，有咩好得過有個地方可以同班friend有得食又有得玩，任Hea任坐

#桌上遊戲 #到會服務
#BoardgameCafe #包場
#Boardgamehk #樓上Cafe
#mkcafe #Partyset #桌遊
#派對 #美食推薦 #吃好西

#food #foodie #foodblog

夠份量的海鮮小菜@財記辣蟹私房菜

 呢間新開張嘅辣蟹私房菜館有專屬電梯，位置相當易搵

燈光柔和，魚缸有龍蝦海鮮，肉蟹超大隻，仲有咁大個螢幕邊睇住新聞

餐牌分好海鮮及小菜類，動腦筋時間又開始.................

香口食物好難令人抗拒，尤其係椒鹽系列，睇吓呢碟椒鹽九肚魚 ($105)就知啦

外層炸脆又粉漿又唔會好厚，椒鹽味配上軟滑九肚魚，再加點喼味汁中和油膩感，趁熱食啦喂!!

食飯總想有點湯羹，諗起好耐無食過呢個海鮮豆腐羹 ($128)

食到嘅海鮮包括有蝦粒同帶子粒，再加入菜粒增加口感，豆腐味偏重，清清地之選。

想食蜆多數都會選擇豉汁炒蜆 ($98)，放低未食已聞到豉椒嘅香味

係呢個成碟嘅蜆蜆肉命中率有九成，肉質甜滑，驚喜位只食到一隻係有沙，可以無負擔咁食。

呢客脆皮炸豆腐 ($78)嘅出鏡率相當高，目測差唔多每枱都叫，我哋都唔例外

椒鹽外皮炸至香脆，入口食到嫩滑豆腐，相當夠熱度，一邊食一邊配凍飲簡直一流。

有別於係川菜館食到嘅京蔥爆牛肉 ($98)，呢度除咗大量京蔥外，仲有甜椒一齊炒，色香味俱全

牛肉大件得黎夠嫩滑，濃味醬汁將配料同牛肉"混熟混熟"，用黎送飯要KO一碗飯絶對無難度。

呢度嘅出品份量相當對眼，無論想食海鮮或小炒都有唔少選擇，下次再同朋友黎可以叫隻蟹食吓。

 

#sheblog #food #foodie #seafood #CWB #dinner

邪惡金沙餃你試過未?!@豐信餃子店

 想食好味餃子，太子一帶從來都係不異之選，好似呢間就係其中之一，只係睇門口等位人頭就略知一二

先拎飛等入坐，店內面積唔大，一眼睇晒

天口咁慶，叫番支正氣又下火嘅青檸蜜及羅漢果甘草茶 ($10支)飲下先，有益過飲汽水，味道唔會太甜，飲完喉嚨都幾舒服。

黎呢度一定係餃子主打，湯同炸都要食唔駛傷腦。餃子選擇愈出愈多，但有D款式已賣晒，但總會有其他心水之選

先黎碗雲耳椰菜鮮肉餃 ($49/10隻)，配椰子海帶鮮雞豬骨濃湯 (絶無味精)，大大碗又夠熱

奶白色湯底飲到香甜椰子味，就算有埋雞同豬骨都唔油膩; 隻隻餃子都超級飽滿

餃子皮薄同口感帶點煙韌，椰菜同雲耳嘅爽度，令口感豐富咗D; 枱面上有盒辣菜甫碎，甜中帶辣，加少少一齊食令餃子變得狂野D。

好耐無食過海蜇，炎夏日子食呢個涼拌海蜇 ($22)確係爽，落咗麻油一齊撈，唯味道變淡口返少少會好味D。

呢客香煎豆腐 ($15/3件)，鍾意食淡口D可以就咁食

我就會加埋豆辦醬，惹味好多。

想樣樣試D，叫呢個招牌秘汁拼盤 ($45)就岩啦，包括有鷄翼，滷蛋，牛展及腎片，2-3人分享岩岩好

秘汁味道偏甜，腎片口感偏腍; 件牛展反而有D嚼口，軟硬度適中，滷得夠入味。

壓軸出場係.......................

見到宣傳有邪惡金沙餃，以為係咩東西，原來咸蛋黃醬加係任何煎餃上面 ($15)，未試過又試下佢有幾邪惡。

點咗韮菜鮮肉餃 ($37/7隻)作試驗品，大部份嘅煎餃都被咸蛋黃醬覆蓋

入口係有咸蛋黃嘅味但唔算太濃，唔會搶晒隻餃嘅餡料味道，配煎餃係夾嘅; 皮唔厚同食到韮菜嘅香味，香香脆脆好味道。

 

#sheblog #dumplings #food #foodie #foodpics #太子

"潮"食@陳儀興飯店

 上次禁晚市堂食叫過佢嘅外賣，水準唔錯，但某D菜式始終係堂食岩D，所以今晚一於再會呢間潮州菜店

鵝仔裝飾已經係門口歡迎你，陪住等拎外賣嘅客人

滷水食物，凍蟹，小菜，甜品都有供應，唔少選擇可以慢慢睇

呢度有燉湯供應，對於無咩湯水嘅我哋，餐飯有湯，仲要係燉湯當然趨之若鶩啦。呢個時候要增強免疫力，飲呢個姬松茸無花果雪耳雞湯就岩啦 ($68/位)

熱辣辣原盅上，打開見到湯料滿滿，加埋圓肉多一份清甜，養身又養心。

呢度嘅潮州蠔餅 ($85)，賣相搶眼球，第一眼望落似蠔餅天婦羅

炸得熱辣香脆，尤其係個炸漿位，真係"霎霎"聲，食到蠔仔嘅鮮甜味，亦食到少少蛋香味，點魚露係大路食法，個人覺得點醋汁食仲好味喎......哈哈。

呢碟滷水鵝件 ($128)，份量十足，以大豆芽墊底

鵝肉鬆軟，滷水汁嘅味道唔會過濃，亦唔會被香料搶位，點醋汁食係好味嘅。一間潮州菜店，滷水出品靠得住，食客當然會回頭。

食潮州嘢，蔬菜類KOL除咗係春菜外，呢碟沙嗲芥蘭炒牛肉 ($98)都人氣相當高

沙嗲配牛肉，牛肉配芥蘭，三者無形中聯成一線; 沙嗲醬汁唔算好濃，完全覆蓋件牛肉，用黎送飯都岩數。

呢度多街坊家庭客，侍員反應快，不時主動收碟加茶，難怪坐坐下都見有九成入座率。

#foodblog #food #foodie #chiuchow #goose #TKO