找"素"在工廈@EFG Eat for Green

 朋友係呢幢工廈訂咗波鞋有貨返，拎完順便係度搵野食，行到三樓見到呢間主打素食及海鮮嘅餐廳，個名好易記喎。

門口有餐牌參考，由前菜，小食到主菜飲品都有，價錢都OK，就試試啦

晚間溫度都仲有三十度，真係會影響人胃口架，好彩有呢客香橙牛油果藜麥沙律配柚子汁 ($78)，另加$20有煙三文魚，就咁睇個名都想像到味道應該係酸甜啦。

有我歡喜嘅牛油果，大大粒豪不手軟，咸香軟滑嘅煙三文魚，健康有益嘅三藜麥"埋藏"係脆口沙律菜中，淋上微酸柚子汁，仲唔係開胃之選?!

小食方面，係薯條同甜薯條之間做決定，秒殺一定係炸甜薯條 ($36)，熱度十足，炸至外脆內綿，香甜蕃薯味，不禁令我一條駁一條，再配埋杯熱情果芒果梳打，有氣果甜飲品，爽呀!

兩款主食不約而同都係素，首先出場嘅係牛油果素雞肉闊條麵 ($108)，份量無諗過都幾大，主色係牛油果嘅綠色呀.....哇哈哈.....對於身為牛油果控嘅我表示流口水中

件素鷄肉似係用豆乾製，外層似煎炸過處理，口感都幾似鷄肉; 另外其他材料有洋蔥，粟米仔粒及牛油果粒，每條闊條麵都掛上香滑牛油果醬汁，幾creamy，味道唔錯。

跟住緊出場就係南瓜忌廉燴飯配風乾蓮藕片 ($108)，賣相吸睛，似高級餐廳出品

南瓜打至滑溜與忌廉結合煮成醬汁用黎燴飯，入口超香甜南瓜味，偶爾食到粟米仔粒，再加埋風乾蓮藕片，豐富咗口感，唔會整客都係同一個質感。

今晚就無食到海鮮類，唯有下次先啦，仲可以叫埋另一素食朋友一齊開餐，各色其式。

#food #foodie #KT #green #seafood #foodblog #相機食先 #sheblog

美妙的一個西班牙之夜@SABROSA

 又多個朋友即將移民，主角想食西班牙菜，上網搜查呢間評價唔錯，位置方便，就呢間啦

昏暗燈光配上groovy 歌曲，感覺相當Chill

黎得西班牙餐廳，無理由唔飲番杯Sangria ($98)，呢種炎熱天氣就最岩飲D生果味嘅飲品，另外非酒類飲品就係Lemonade ($48)，清新微酸，相當醒神又解暑。

未正式開始飯餐，係Tapas類叫咗客炸西班牙青椒仔 ($68)，侍應未放低我已聞到好香青椒仔味，吞咗少少口水 (哈哈.......)

熱食好好味，看似簡單，但入口有椒香味，唔辣，用黎送凍飲相當好。

西班牙人係炎熱天氣中開胃之選定必有凍湯，熟悉嘅有蕃茄凍湯，今晚精選凍湯係紅菜頭湯 ($68)，有助降低膽固醇及抗衰老

紅菜頭放入攪拌機，攪打至幼滑狀態，飲得出紅菜頭獨有香味，另加入適量黑椒及酸忌廉，飽肚得黎又幾開胃。

呢份63度溫泉蛋凱撒沙律，加$38有慢煮鷄胸 ($136)，份量絶對可以當一份主菜，有脆口多士，慢煮鷄胸，爽脆沙律菜及溫泉蛋

除咗將溫泉蛋加入沙律菜中伴食外，仲可以用多士黎沾蛋黃汁食; 鷄胸以慢煮方法一D都唔嚡口，減淡番少少味道就仲好。

擺盤吸引嘅香煎西班牙走地黃油春鷄 ($168)出場啦，配上三款唔同醬點食 (香蒜油/蘋果/蛋黃醬)

春鷄黎講都唔算細隻，足夠二人分享; 皮帶脆又無多餘脂肪，切開已經見到肉汁流出，肉質嫩滑，即使係胸肉位都唔會乾爭爭，好味呀!!

另一個都見多人叫嘅係黑毛豬肋條肉燴西班牙飯 ($228)，以鑊仔上菜，原汁原味

熱度非常夠，豬肋條切成細粒平均舖係飯面上，油脂滲入飯粒上，香味撲鼻; 有心思地加上蕃茄乾，中和咗肋條肉同飯嘅膩感，難怪出鏡率咁高。

一餐美好嘅飯，點少得甜品?! 提拉米蘇 ($68)係意大利文嘅意思係"帶我走"，即係寓意好味程度係食完飄飄然，如上了仙境。 呢客絶對合格有餘，面頭嘅朱古力粉入口唔會嗆喉，甜度岩香港人口味，食到中間位置就感受到咖啡酒與海棉蛋糕嘅結合，為呢餐加上一個完美句號。

#CWB #spain #dinner #food #foodie #goodbye #foodpics #foodblog #sheblog

行遠少少就有好嘢食@鶴崎居酒屋

 朋友係呢幢金融中心返工，午飯時食過覺得唔錯，就想搵機會試下晚市

裝飾佈置主打居酒屋感覺，天花掛上日式燈籠及雨傘; 木製餐牌作為牆飾，仲有一個大鼓坐陣

 

安座於卡位中，侍應送上熱茶及蒜頭漬，睇吓餐牌有咩食後就用QR CODE自己落單

夏天總係愛食沙律作頭盤，多款沙律中，呢客鰹魚沙律 ($82)跑出無懸念

爽脆沙律菜與香軟鰹魚，配上酸甜沙律汁，兩者一齊放入口，一啖有兩種唔同口感，好開胃口，超推介。

想試下串燒，就隨心叫咗串鷄心 ($30)及牛舌 ($38)，兩串都唔會燒得太過乾身，喜歡可以加少少檸檬汁調味，食得輕鬆。

睇餐牌有呢客雲糖壽喜燒 (安格斯牛小排) ($208)，外形相當特別，雲糖即係棉花糖，當加熱煮溶咗後，甜味會落入湯汁中，為壽喜燒汁加入甜味，個人覺得湯汁無咁濃烈，味道清淡D，甜味比起其他店出品無咁甜，食起黎無咁膩。

安格斯牛小排有6片，脂肪分佈平均

燒鍋中放滿蔬菜，雜菇，豆腐及粉條; 湯滾起就落牛肉先

附有麻醬點牛肉食，肉質嫩口，油脂係口內流出，好味。

仲有隻生蛋，本應係用黎點牛肉食，但我哋就倒落個鍋度，略為煮到溫泉蛋狀態，用黎撈飯 (白飯另叫$15)，再加少少壽喜燒汁，正呀!!

自從食過一夜干後，從此愛上，去到有得食嘅餐廳都會試吓，呢客花魚一夜干 ($92)一條開2邊黎燒

唧少少檸檬汁落魚身提鮮，再加蘿蔔茸落個汁度點住食; 風乾同醃製過嘅魚肉帶有咸香味，肉質實淨得黎又鬆軟，用黎送飯都得。

侍應招呼有禮，主動加茶及關顧上菜速度; 朋友話始終坐落地點問題，晚市較午市人流少，但深信好嘢會有人欣賞及支持，至少我係其中之一。

#food #foodie #foodblog #kwuntong #居酒屋 #相機食先 #sheblog

下次再幫襯@泰開心泰菜館

 入坐後，店員送上熱水比我哋洗餐具，斟咗冰水，再送上免費炸蝦片，一路食住蝦片，帶點胡椒味，幾好味，一路睇下餐牌揀嘢食

食泰國嘢，最先又必食嘅當然要叫個沙律系，今晚捨棄了柚子沙律，黎個泰式酸辣鳯爪沙律 ($78)

份量都嚇了一眼，酸辣鳯爪堆得滿滿，加埋紫洋蔥及芹菜，醬汁就酸得黎愈食愈辣，好惹人胃口。

肉類擔當有串燒 (豬牛鷄各2串/$88)，真正即叫即燒，都要點時間等待............但值得嘅

每串份量相比起其他店都大D，無論豬牛鷄都入口鬆軟，唔會燒得太乾身，點埋個沙嗲醬好好味。

最後黎個澱粉質，呢度無湯河類，乾炒料豬鷄同海鮮都係同價，既然食咗串燒，咁就叫個乾炒海鮮河($68)，(無河粉轉金邊粉)

海鮮材料有魷魚，青口同蝦，雪藏貨式無咩味道

反而個金邊粉最有味，開頭擔心會炒到一團團，但又無喎 (好彩)，加咗鷄蛋一齊炒多咗陣蛋香味，份量都幾多，夠飽肚。

甜品只有芒果糯米飯，今餐太飽，留待下次再會一會佢

呢餐無加一，仲有個精美椰汁綠豆糕送比你食(忘記影相，呢個相當好味，可惜餐牌上係無嘅)

#thaifood #food #foodie #foodblog #九龍城 #泰開心泰菜館 #sheblog

抵食台菜@一起食堂

 呢排睇電視成日見到關於台灣嘅節目，介紹特式酒店之外，當然唔少得係當地美食，未飛得，又令我諗起呢度

主打台灣食物，亦提供日本餐，價錢相當實惠

台式飲品唔一定要珍珠奶茶嘅，清甜解渴之選有..................愛玉荔枝綠茶 ($24)，"隱型"咗嘅愛玉係綠茶裏面，一啜就食到，香甜荔枝果味，平衡返呢輪係咁落雨嘅心情。

上次食過呢客酥炸地瓜條 ($38)，令人掛住。掛念之處係外層不留半點油膩，莫非係經氣炸處理?! 入口外脆內軟，有住蕃薯嘅香甜味，趁熱食，又令我一條駁一條。

食台灣嘢，滷水系列都唔可以錯過，拼盤份量驚太多，就咁單叫滷牛腱 ($38)。每件有相當厚度，滷得幾入味，口感鬆軟，輕鬆易食。

上次無食到，見網評唔錯嘅花雕麻油鷄湯麵 ($78)，今次就識叫啦

花雕酒另上，隨你鍾意倒幾多，我就倒晒嗱。 隨即傳來陣陣酒香味，仲有杞子圓肉薑及冬菇，相當符合台灣湯類養身要求

鷄件變成鷄卷，啖啖肉食到少少酒味

湯麵似係扁烏冬，幼滑易入口，食晒都幾夠飽。

估唔到原條鰻魚飯 ($118)真係咁大條，原條放上去飯面同隻溫泉蛋度，何其霸氣呀............

鰻魚汁滲進魚肉內，將蛋汁撈均後，三者一同放入口中，好一個偷飯賊呀。

全店免加一服務費，邊位特設卡坐，四人坐都舒適。

 

#sheblog #food #foodie #foodblog #kwuntong #taiwanfood #japanfood #tasty