友人出咗花紅就身痕，陪佢換咗個新生果電話後話要帶我去食好西，重點係佢請，WOW.......有錢的人就是任性!
由生果店行過黎呢幢大廈都係幾分鐘路程，上二樓就係呢間新開樓上Cafe
由門口望入以為得幾張枱，原來係別有洞天架，行出呢個門口..................
有室外用餐區，環境都幾開揚，仲可以帶動物一齊用膳，分別有幾張枱都有狗仔
特別之處又點止咁，仲有個戶外帳篷區，可以係白色帳篷內用餐，Surprise................
嘟QR Code手機落單，食物供應由沙律薄餅/兒童餐/小食/全日輕食/主食/飲品到蛋糕都有
想開下個胃口，先叫個沙律食下，見到佢側邊有個(辣)字，就你啦........................燒牛肉紫洋蔥沙律 ($158)
顏色賣相紅黃綠都有，吸引眼球! 除咗牛肉係燒外，新鮮菠蘿粒都有燒過架，令甜度更加出，見到廚師嘅誠意
附有獨立微酸辣汁，辣度咪睇少佢，加少少落去撈均黎食，燒牛肉帶香口，肉質唔嚡乾，偶爾食粒菠蘿中和返D辣度，相當過癮。
薄餅就食得多，將大阪燒與薄餅合二為一就真係第一次食，就係呢個大阪燒薄餅 ($123)
餡料上真係用上大阪燒嘅材料，有鷄肉，椰菜絲，蟹籽及鰹魚碎，唧上滿滿照燒汁及沙律醬，分明係一個"日本人"
底部係以薄批底，口感微脆，澱粉質份量減少好多，比起真正大阪燒無咁膩，食得"亨鬆"，估唔到呢個"混血兒"混得相當成功。
呢度供應一系列Mocktail/沙冰，名字相當搞鬼，呢杯攞你命三千.粒 ($48)，唔睇相同介紹都唔知係咩東東 (哈..哈)! 原來係一杯雜果茶，主要味道係蜜桃茶，加入橙及藍莓粒，入口相當清新，配埋把紙傘裝飾，感覺相當Relax!!
主菜就點咗巨型豬扒跟薯菜 ($188)，就係想睇下有幾巨型法，實物果然同名字相符呀............哈哈
連骨豬扒燒至部份微燶，厚切無多餘肥膏，唔會最終食落入口嘅肉得好少。跟上嘅黑椒汁相當椒香，配合豬扒都幾夾，成件肉夠二人分享……
配菜方面有粗薯條，入口唔油膩，令人一條博一條; 香煎大肉茄，夠多汁加茄紅素; 仲有件煙肉包住露荀及粟米芯，全部走唔出我地個胃.......YEAH!!
當然唔少得咖啡系列，早午餐時嘆番杯拿鐵 ($35)對我黎講係一件何等美事，一口綿滑奶泡配上香濃咖啡味，回魂啡是也!
離開時經過蛋糕柜見到有瀑布蛋糕，留返下次再會你.....................
#food #foodie #kwuntong #cafe #relax #brunch #blog #香港美食
contact me : gingerszeto@yahoo.com.hk
