係呢個商場報復式消費後，又係時候坐低開餐，行過呢間食店，被呢個得意卡通人物吸引住，望真D原來係食韓餐，對於我呢個哈韓人當然無問題
場內好多位置都有佢嘅蹤影
連餐紙都有佢呀，POSE仲要相當抵死.....哇哈哈..........
首先出場係泡菜煎餅 ($108)，差唔多大部份食韓餐嘅店舖都有，橙紅色圓形煎餅灑上芝麻及大蔥
邊位煎得帶點焦脆，中間部份較為濕軟，泡菜辣度輕微，點埋泡菜醬汁加添味道!
友人想食炸鷄，呢度有4款不同口味選擇，既然呢個肥仔咁得意，就叫客奇太朗原味炸鷄 (跟鐵板芝士) ($198)支持下!
鐵板芝士送上枱時仲好似熔岩咁"卜下卜下"，趁熱即刻將件炸鷄放上去為佢加件"芝士戰衣"，我最期待嘅畫面出現啦..........係拉絲呀，仲要係好多拉絲 (心心眼中)
無骨炸鷄外皮夠晒香脆，被軟綿芝士包住，一啖有兩種口感，鷄肉仍然保持肉汁唔乾，食一件相當有罪惡感.........
食緊熱辣辣炸鷄，當然要杯凍飲，多款特色飲品中，呢杯荔枝烏龍茶 ($48)可謂出鏡率相當高，全場差唔多有八成枱都有呢杯嘢飲出現! 飲茶感覺健康D，淡淡嘅烏龍茶味中帶點甜味，初夏日子飲好岩FEEL!
又係因為奇太朗而點左呢客雙重芝士牛肉辣泡菜堡 ($158)，請找亮點..............
係啦，就係個飽面啦，又有佢嘅出現呀，太可愛啦
講返主角先，頂部有炸洋蔥圈，熱熔芝士包住塊漢堡牛肉，中間有蕃茄，生菜絲仲有泡菜，即刻變成美韓混血兒; 牛肉有相厚度，咬落唔會散開，帶有濃香芝士咸香味道，另外加入左泡菜，酸辣中可中和牛肉膩感! 而個飽身略為煎香過，幾鬆軟，一個可以同人開人分享!
仲有薯格代替薯條，加埋三款韓式前菜，特別過癮!
估唔到韓餐份量相當夠照 (飽到甜品都食唔落)，上菜速度快，下次可以逐樣落單，慢慢嘆，奇太朗...............我地下次再見啦!
contact me : gingerszeto@yahoo.com.hk
