上黎呢區工廈搵食已非新鮮事, 但就係首次食泰菜啦! 店內面積唔算大, 簡約裝飾無傳統泰菜店既金黃裝飾, 反而有D似去左西餐廳! 各枱上都已經放置留座牌, 好彩我都訂左枱姐, 唔係就要等位啦!!
侍應送上水及餐牌, 食物選擇有沙律類, 小食類, 湯類及主菜類
仲有各式飲品, 想飲咩冰呢度就無啦, 泰式飲品選擇有泰式咖啡/奶茶及紅茶系列
呢客鳯爪沙律 ($58), 材料豐富包括爽口鳯爪, 食落有D辣味而且夠入味, 配以爽口多汁沙律菜, 紅蘿蔔絲, 惹味紫洋葱, 撈埋酸辣汁, 開胃又醒神, 確係幾泰式風味!
小食有呢客脆脆鷄翼 ($56), 一客6隻肥美鷄翼, 炸得金黃色賣相吸引, 面頭灑上香口芝粒加添香味, 鷄翼味道香中帶甜味, 應該係搽左蜜糖, 皮脆肉嫩, 熱辣辣好好味!
主菜類叫了黃咖喱牛腩 ($88)另加白飯($10), 黃咖喱既辣度屬於入門初級, 咖喱汁香中帶少辣, 用黎撈飯就正配; 而個牛腩切得大細適中, 煮得好入味, 口感腍滑, 輕輕咀嚼幾下就可吞下, 仲有薯仔及洋葱作配菜!
飯粉麵類選擇有幾款, 見到有Pad Thai喎, 一於試下呢碟鮮蝦炒金邊粉 ($88), 伴碟有花生碎及青檸, 賣相幾吸引! 呢碟以蝦, 豆腐干粒, 椰菜, 蛋絲炒製而成既金邊粉, 將花生碎撈均及唧少少青檸汁調下味就食得! 蝦食落口感偏硬少少; 金邊粉炒得唔夠乾身, 食起上黎有少少漿口感覺, 雖然味道帶酸甜但都未能成功提高清晒成碟既能力!
呢度仲有甜品供應, 價錢亦只係每款$38, 但因為太飽啦, 留待下次先啦!
食物份量相當對眼, 價錢亦合理, 坐得都幾舒服, 適合二人世界或同三五知己上黎開餐!
1988 : 觀塘興業街16-18號美興大廈A座1樓A3室
contact me : gingerszeto@yahoo.com.hk
由於媽媽喜愛食龍蝦, 出街做節時好多時都會叫龍蝦, 而中式煮法離不開都係傳統既上湯/芝士伊面底, 之前行經呢頭都知開左呢間以龍蝦做主打既新式餐廳, 一於帶媽媽試下新野!
去到見到呢個燈箱就知係呢度, 同侍應講幾多位後就可上一樓安排入座
入到去以見到裝潢以粉藍色為主調, 配以淺色木枱椅, 有隻龍蝦公仔及意粉作點綴, 播住輕快節奏既歌, 感覺都唔錯!
打開醒神餐牌望下有咩食先, 原來呢度係除左以龍蝦做主打外, 都有其他日式及意式食物可選擇, 價錢都唔算貴!
今次我地為住龍蝦而黎, 當然係食龍蝦菜式啦, 芝士焗龍蝦配伊面底媽媽就食得多, 呢度都有個西式變奏版, 就係呢個龍蝦芝士Mac N Cheese ($208), 以鐵器盛載熱辣辣上枱
重量級長通粉被芝士龍蝦汁重重包圍住, 口感煙韌, 一咬落去d醬汁會係口腔內爆發, 小心燙口; 而龍蝦肉質感彈牙, 配埋個長通粉一齊食好夾喎, 媽媽表示滿意!
早前係朋友fb洗版既火紅既龍蝦包, 呢度都有得食, 當然要試下, 除了主角龍蝦包($188)外, 仲有薯及蕃薯條一籃及沙律菜, 無論份量及賣相都相當吸引
食前先淋d檸檬芝士汁落個龍蝦包上, 一啖放入口會食到彈牙既龍蝦肉及鬆軟既面包, 由於面包面有焗至微微脆身, 增加左香味, 無需拆肉就食到鮮味龍蝦, 岩晒我呢個懶人, 食完呢個包好滿足! 當然佢既薯及蕃薯條都炸得唔錯, 食完唔會一口油, 成個餐食晒...........飽晒!
有食點會無飲呀? 呢杯Peach & Lychee Tea ($48)似係呢度熱賣, 點解咁講? 我見有幾枱都有客又係叫呢杯, 飲落桃味好突出, 味道甜甜地好好味, 而且一杯份量都幾大, 同媽媽一齊分享都可以!
設加一服務費, 呢餐與媽媽既龍蝦餐之旅............取得完滿結束!
Day and Nite by Master Kama : 旺角山東街50號 1-2樓
contact me : gingerszeto@yahoo.com.hk
每日三餐都係外面搞掂, 就算唔多肉都未必一定多菜, 生果就更加未必日日都會食, 咁既飲食習慣, 腸胃又點會好呀?! 腸胃唔好就好直接引起排便問題, 肚腩突左出黎, 好似有左3個月咁, 谷住谷住都幾辛苦, 有苦真係自己知! 想方便又輕鬆咁改善問題, 我有佢..........
呢樽係JOY-IN 最新推出 K-1 超強益生群，日本製造， 蘊含 10,000 億活性 K-1 植物性乳酸菌首創配方，採用獨特技術為乳酸群提供防護罩，避免胃酸破壞活性，直達腸道發揮最大功效，更可阻截體內細胞變異，同時全面提升免疫力；再配合日本高鹼大麥若葉，能中和體內酸性毒素,解決便秘及維持定時暢便。
特點:
3日可增加益菌, 增加纖維吸收
7日排走毒素, 加強腸部蠕動, 排走積聚宿便
14日穩定腸道, 改善腸胃敏感情況
30日重整健康, 排便習慣得到改善, 肚腩胃腩收細, 皮膚質素有所改善
一樽份量 : 30粒 (每天進食1-3粒)
細細樽帶出街都好方便
每樽都有封印保護, 確保品質
無需用水送服, 是要咀嚼的, 味道係酸甜乳酪味, 好易入口!
以往大都係靠返工前飲杯咖啡幫助去厠所, 依加早上一粒, 之後都係按照平時飲水模式, 係無飲咖啡既情況下都有得去, 確係有料到, 去時係舒服暢順絶無搞肚痛! 依加發現肚仔細左D, 個人感覺輕鬆左, SO GOOD!!
產品由品牌提供, 內容純個人感受/分享
contact me : gingerszeto@yahoo.com.hk
係旺角行完街想食西餐, 呢間係我呢牌心水餐廳
店內面積唔算大, 亦有樓上用餐區, 樓下設有開放式廚房及水吧
餐牌有套餐
亦有散叫, 提供沙律, 小食, 意大利飯/粉, 薄餅及主菜式
餐飲類呢度有幾款名子非常搞野既特飲, 係叫杯普通凍飲都有十幾廿蚊既情況下, 當然要試下啦:
呢兩杯名為"可遇不可求" ($38) 同 "垃圾桶" ($38)既特飲, 以生果為主要材料, 味道酸中帶甜, 飲落醒神舒服, 係熱天日子飲返杯.......................爽晒!
芝麻醬淋在沙律菜, 伴以幾片煙三文魚煙, 就成為左呢個三文魚田園沙律 ($58), 煙三文魚食落軟滑, 與爽口沙律菜形成雙重口感
食薄餅既習慣喜歡簡簡單單, 最緊要有芝士, 呢款香草芝士薄餅 ($98), 餅底係以薄脆底, 食落香脆可口又唔會好飽, 芝士裏包含左香草,無任何肉類, 只食到脆(餅底), 香(香草), 軟(熱溶芝士), 正呀!
以木板上菜既呢一客美國安格斯肉眼 ($178), 配以粗大薯條及沙律菜, 份量相當吸引
點了七成熟, 切開時仍見到裏面帶紅色, 口感有少少嚼頭但絶對唔韌, 肉味幾濃, 無需另加醬汁, 點少少鹽提升味道, 超好味! 唔怪得之係咁見侍應送呢份餐去唔同枱號, 證明相當多客人都有同感!
賣相靚仔既呢一客南瓜帶子意大利飯 ($128), 中間以煙三文魚捲成既玫瑰花, 底下有原粒厚帶子, 醬汁以南瓜煮爛, 加埋甜椒粒, 洋䓤粒及鮮菇, 增加香甜味道, 而個意大利飯似乎未煮得太透, 若可煮耐少少會好D!
呢間餐廳出品令人滿意, 價錢親民, 侍應服務態度唔錯, 反應行動快捷, 埋單時仲送上$50 COUPON可以留返下次用, 呢張當然要KEEP啦...................哈!
Amico 1890 : 旺角洗衣街24號地舖
contact me : gingerszeto@yahoo.com.hk
友人知我喜愛花, 特登同我去呢間以花為題既西餐廳食飯! 店外放滿花飾佈置, 立下眼真係以為係花店....哈!
店內面積比較精緻, 昏暗燈光配以木傢俱, 白色磚牆上掛上各式綠色植物, 比人一種悠閒感覺
侍應送上餐牌, 見到有晚市套餐, 主菜選擇有意粉/飯, 肉類, 魚類等, 包餐湯, 沙律及飲品, 價錢都夠貼地
另有甜品供應, 咁食完飯就無需轉場搵甜品食啦!
是日餐湯係松露雜菌湯, 湯夠熱, 飲落充滿菇菌味道, 口感順滑, 配多個面包就仲正!
沙律係煙三文魚雜菜沙律, 咸香煙三文魚充滿油潤感, 配以開胃醋汁加爽口沙律菜, 清新一下味蕾!
主菜點了呢款美式特厚芝士漢堡包, 落單時侍應會詢問想要幾成熟? 點左七成熟, 咬落仍然帶有肉汁, 但邊位方面比較硬左D, 若果要4-5成熟就應該無問題 (早知聽侍應講啦!), 不過個包有埋芝士同蕃茄片一齊食係好味既, 個包本身又夠鬆軟, 唔會食左一口乾! 仲有佢伴碟既炸薯條都炸得好香脆同唔油膩, 千祈咪漏左佢呀!
餐廳推介之一德國脆皮咸豬手, 上枱時已經聞到好香燒肉味, 熱辣辣伴以芥辣及酸椰菜絲, 成隻咸豬手份量十足, 足夠同友人開心share, 已經切好一舊舊方便進食, 皮係脆, 食時仲聽到"咯洛"聲, 肉唔會燒到太乾身, 咸味適中!
呢種小店有着個人特色, 憑著對烹煮既熱誠去開創自己既天地, 實在應多多支持!
花子舍 : 銅鑼灣信德街2號百威商業大廈2-3號地舖
contact me : gingerszeto@yahoo.com.hk
