意菜好風味@Babbo Trattoria

難得約到閠蜜係咁好天氣既日子食個午餐, 當然要搵間坐得舒服又可以傾到計既餐廳啦, 根據吃貨組員提供既情報, 呢間似乎頗岩水心!

呢間餐廳係食意大利菜, 店內環境燈光昏暗, 播住悠揚歌曲, 侍應安排我倆坐於圓型卡坐, 好舒服呀!


打開餐牌, 見到食物選擇都唔少, 包括頭盤, 窯烤, 湯, 沙律, 意粉, 薄餅, 甜品及飲品類, 要花點時間諗下想食咩, 好在問侍應有咩好推介? 佢都樂意介紹!  由於我地兩個人未能叫太多, 就試下佢既推介啦!


先黎呢款辣味蕃茄鑲蛋佐特製麵包 ($108), 原隻半熟蛋置於頂部, 內有蕃茄碎及少量辣椒作調味, 食時再將半熟蛋撈勻整碎變, 內裏既香滑蛋汁混為一體, 再塗於特製麵包上食, 口感煙韌既麵包配以呢個"醬", 味道好好, 辣辣地刺激你既味蕾, 又有蕃茄既酸味中和蛋汁既膩感, 要推介!


食意大利菜, 又點可以唔叫薄餅呢?!  呢款卡拉布里烏魚子薄餅 ($188), 面頭舖上菠菜及灑上烏魚子, 味道咸香, 而呢度既餅底係有別於薄脆, 取而代之係口感煙韌, 食落都幾飽肚!



意粉亦係當然要試啦, 呢款紙包窯烤茄汁鮮蜆鮮蝦意粉 ($188), 煮好再以錫紙包好放入焗爐再焗一焗, 增加香味; 而佢既醬汁以蕃茄烹煮, 酸酸地又有辣椒既惹味, 幾能調起胃口; 佢既蜆肉食落嫩滑又無沙, 蝦食落鮮味, 仲好細心已經去除中間蝦殼, 食落方便; 意粉軟硬度岩口感, 整體黎講係好味既!


侍應反應夠快又細心, 不時主動加水及換碟, 令我地享受呢個美好既Girl's Talk時刻!
Babbo Trattoria : 銅鑼灣羅素街2-4號二千年廣場5樓

contact me : gingerszeto@yahoo.com.hk

一定會再來@Amico 1890

吃貨友人話發現呢度有間"疑似"新餐廳, 問我有無興趣去試?  難得唔駛諗開餐地點, 當然SAY YES啦!

入到去見到開房式廚房, 牆上配上餐廳名字畫像, 以為面積唔大, 原來樓上仲有一層, 我地早入座, 所以樓下仲有位可以坐!

餐牌設散叫或晚市套餐, 價錢望落合理, 一於試下叫個套餐再加少少散叫!


套餐包餐湯, 沙律, 主菜及甜品, 是日餐湯係磨菇湯, 質感濃稠, 食到磨菇粒, 飲落好香磨菇味!

意大利風乾火腿沙律, 沙律底包括粟米, 車厘茄, 青瓜, 沙律菜, 面頭有片咸香風乾火腿, 捨棄傳統既黑醋, 改為配以芝麻醬汁, 新式mix and match!

想食多D菜, 叫左呢款日本刺身帶子沙律 ($68), 沙侓底照舊, 配以芝麻醬汁, 超大碼日本刺身帶子, 外面稍為煎一煎, 內裏仍然軟身, 先食到香味再食到鮮味, 咬落非常有口感!

好牛既友人點了呢款美國安格斯肉眼扒 (10安士) ($248), 七成熟肉眼扒, 伴以粗薯條及沙律菜一齊以木板上枱, 見到肉眼扒上一條條"燒紋", 已經引得我口水流, 用刀叉一切開, 未食已經感受到佢既肉質鬆軟!

切開後仍然見到內裏有血紅色, 火候控制得唔錯, 食落肉味夠濃, 又多汁, 水準唔錯, 喜歡食牛既友人表示相當滿意!

身為芝士控的我, 對於呢款香草芝士薄餅 ($98)係難以抗拒既, 9寸薄餅配以芝士及香草醬, 看似簡簡單單但味道有蕃茄醬既酸味, 芝士既奶香味, 當然唔少得係香草味道啦; 薄脆既餅底食完唔會好飽肚, 仲有位可食其他食物, 正呀!

佢既飲品單上見到名字好搞鬼既特飲, 分別叫左呢款"Amico" ($43), 以荔枝, 檸檬, 橙汁加雪碧, 味道偏向荔枝味, 甜甜地幾好飲; 另一款係叫"求其" ($38), 係雜莓, 檸檬加梳打調製而成, 紅紅地幾靚仔, 飲落有氣好GUR呀!

有少少意猶未盡, 侍應推介呢款龍蝦汁蟹肉意大利粉 ($108), 份量足夠二人分享, 蟹肉份量普通, 但食落有鮮味, 配以濃香龍蝦汁, 每條意粉都沾滿左醬汁, 若有龍蝦味Fans黎度呢度就推介食呢款意粉!

套餐包甜品, 雖然係包埋但絶不欺場, 賣相似甜品店單賣出品, 二人一齊分享呢客乳酪雪糕配窩夫, 軟滑又酸甜味乳酪雪糕, 配上硬脆既窩夫, 口感一軟一硬, 為呢餐寫上一個完滿既句號!

呢度侍應服務態度好, 反應夠快, 食物水準唔錯, 唔怪之得全場爆滿, 下次黎都係早D訂定位好D!!
Amico 1890 : 旺角洗衣街24號地舖

contact me : gingerszeto@yahoo.com.hk

清甜椰子鷄鍋@Hey

係呢區睇完半日傢具開倉, 行到肚都打鼓, 好想去大食一餐, 友人就諗到呢間火鍋放題店
店內面積都幾大, 一入門口就己經見到火鍋配料區, 設有卡位, 坐得幾舒適

任飲任食90分鐘, 價錢由$84-$298, 另加$39/位仲可以刺身放題(不適用於$298/位), 當然愈貴就愈多食物選擇, 我地點左$298/位既餐, 可以無限添加澳洲和牛, 美國特選牛小排, 海鮮拼盤, 特選牛脷, 美國黑豚肉及黃金鷄, 都好多野食喎............

侍應推介黃金鷄木瓜湯, 材料包括新鮮椰子水, 水滾後可以落埋木瓜及鷄落水, 煮5分鐘就食得! 頭啖湯飲落好香椰子鮮甜味, 以木瓜原來係用有機種, 食落非常有鮮甜既木瓜味......不禁飲左一碗!


而鷄肉可以伴以沙薑/青檸作調味, 鷄肉煲完都唔會變韌, 幾有鷄味, 唔錯唔錯!

其實係煮緊鷄既同時, 我地係出面拎左一D 熟食返黎, 有飯卷, 鴨胸肉沙律及荳芽, 味道一D都將就, 作為前菜都唔錯!

話明任飲, 當然要出去拎返D凍飲舒緩下啦, 有我喜愛既烏龍茶, 唔駛一味飲汽水, 感覺健康D...........哈哈.....(自欺欺人MODE......)

出面既自助火鍋配料區, 有丸類, 腸類

而令我眼前發亮既係呢個蔬菜區, 陣容之頂盛係我食過咁多火鍋放題中最勁既一個, 選擇勁多, 連秋葵都有, 簡直好似搬左個街市黎呢度咁.................

先食左個海鮮拼盤, 食材包括魷魚, 蠔及青口, 最喜歡佢個魷魚, 食落有咬口之餘又食到少少鮮味

之後就開始肉類時間, 每款肉類會先黎2盒, 薄薄一片, 岩晒火鍋時間, 無需烚好耐就食得, 最驚喜係佢既牛脷烚完都好味, 好彩佢無限任食, 可以食過夠本!

之後又烚D丸食, 炸魚旦及黑椒牛丸都好味, 藕片食落爽口!
好啦......見佢蔬菜類咁多選擇, 當然要食返D啦, 有我至愛秋葵, 連福花都有, 真係唔食都對唔住自己, 用鮮甜既椰子湯烚, 令原本鮮甜既蔬菜食落更好味!


食左咁多野已經超飽啦, 但若然你有第二個胃放甜品既就可以出去唧乳酪食, 仲有幾款TOPPINGS比你任加, 真係超顧週到!

侍應服務反應夠快, 不時主動為你加湯及收碟, 計埋加一每人三百零蚊就可大吃大喝一番, 自此係呢區又多個開餐點!
地點: 觀塘偉業街223號宏利金融中心1樓13號舖

 contact me : gingerszeto@yahoo.com.hk

香港有韓牛食啦@炑八韓烤

每次韓國自由行, 梗會留一餐去馬場洞狂食韓牛, 除左價錢抵之外, 韓牛仲係只供內銷, 要食就要係國內食, 一知道呢間韓燒店為韓牛主題店, 推出多款韓牛套餐及食品, 身為韓牛粉絲既我當然要去朝聖下

店內裝飾以淺色格調為主, 播放住流行韓文歌,  店內更放置2隻短角金毛韓牛模型, 仲有韓國發出既証明文件, 保證呢度食到既係真正韓牛, 嗚..........好期待呀!

 

擺明沖住韓牛而黎, 餐牌上亦有幾款韓牛重點介紹, 一於韓牛到底

係諗緊食邊款之際, 反應敏捷既侍應已經送上幾款前菜,  佢既泡菜唔酸仲帶甜, 好好味呀; 仲有芝麻醬沙律及生菜藍, 一時間張已經放滿一碟二碟!

 

一於試下呢個韓牛珍貴部位拼盤 (貝身肉, 西冷扒, 肩胛肉, 牛五花肉) ($568), 等級為1++級, 等同A5和牛質素, 一個拼盤可以試到幾個唔同韓牛部位的油花及口感

 

 

每款有3-4件, 個人喜歡半生熟程度, 只需將外面燒熟就食得, 入口肉味濃, 唔韌; 試晒後個人比較喜歡肩胛肉, 肉質唔太肥之餘, 入口D肉汁爆出黎, 超正!

 

爐邊既芝士泡菜蛋及前菜仲係無限添加, 未食肉前可先食下呢D先

 

上放置調味架, 分別有醬油, 海盬及大醬, 亦有建議點樣配搭為適合, 又長知識啦!

 

生牛肉石頭鍋飯 ($128), 唔抗拒食生牛肉, 見到呢款石頭鍋飯即時諗到熱辣辣, 配料包括菠菜, 紅蘿蔔, 芽菜, 冬菇絲等, 食時將牛肉與配菜及醬汁拌勻, 燒熱左既石鍋將飯變成香脆飯焦, 一碗飯有雙重口感, 2人分享每人可有2大碗, 味道滋味!

 

韓牛牛胸大醬湯 ($78), 個人十分喜歡飯大醬湯, 濃香既豆醬味湯, 先飲一啖湯然後食一口飯, 好似韓國人咁 (韓劇場面入晒腦),  有2片韓牛牛胸肉在湯入面, 以熱湯再浸熟D, 肉味果然濃郁, 然後再食其他配料如豆腐, 蘿蔔, 菇, 翠肉瓜, 洋䓤及蜆等, 材料咁豐富, 個湯味道唔鮮甜就假囉..............大滿足! 

 

草莓塔 ($68)及海洋特飲 ($38), 2杯都能減淡肉類既肥膩感, 前者為底層係士多啤梨沙冰, 中間及頂層有香滑忌廉及韓國新鮮士多啤梨, 飲落好香士多啤梨甜味; 而後者為荔枝味特飲, 面層加以一個雲喱拿雪糕球, 賣相相當靚仔, 呢2杯特飲只限呢間分店先有架咋, 點可以唔叫返杯呢?! 哈...................

 

 

相比起係韓國食, 價錢當然無咁抵啦, 但係終於可以係香港隨時都食到韓牛喎, 條數當然又係另外計法啦!

 

 

炑八韓烤(韓牛專門店) : 黃大仙中心南館地庫

 

 

 

contact me : gingerszeto@yahoo.com.hk