喜歡係中環出入既友人好事近, 相約一班姊妹團商討細節, 女生多數對日本菜都唔會抗拒, 準新娘就訂左呢間同我地"開大會"!
店內面積唔算大, 入內有居酒屋既氣氛, 牆身設有餐牌, 亦設有吧枱, 可近距離同廚師互動!
餐牌提供食物菜式選擇多, 有選擇困難症既朋友又發作啦!
呢款係餐廳主打招牌菜特級S2海膽杯, 全杯總共有十層, 由頂至底層包括燒白飯魚脆片, 黑魚子, 北海道海膽, 沖繩海葡萄, 吞拿拖羅蓉, 三文魚子, 白蝦, 北海道海膽, 松葉蟹肉, 北海道海膽及鮮海帶碎, 顏色賣相相當吸引! 侍應教先食頭四層先, 然後再以匙更一"畢"到底, 哇............鮮甜味好出, 軟滑既海膽配搭其它海產類食一定好夾, 好似食緊成個海洋咁, 好勁呀!
食開左條刺身癮, 再點埋呢個精選3點什錦刺身, 包括魚, 帶子及牡丹蝦, 魚及帶子厚切, 食起黎相當有口感; 隻牡丹蝦都幾大隻, 肉質夠彈牙
友人係"沙律控", 只要餐單上有沙律佢都佢點, 今餐比佢搵到想食既呢兩款: 三文魚他他海膽沙律, 材料包括爽甜香梨粒, 三文魚粒, 爽口沙律菜及一版海膽, 將鮮味海膽撈均入沙律內, 食起黎口感梗加滑溜, 當然鮮味亦都有所提升啦!
另一款係牛油果帆立貝洋風沙律, 亦有一版海膽提供, 帶子刺身切成薄片, 加入沙律汁, 伴以牛油果及海膽一齊食, 口感綿滑, 味道幾特別!
食到呢度, 想叫返D飲品沖下味蕾, 見佢DRINK MENU都有酒及非酒類飲品提供, 呢款梅子酒及巨峰有氣梳打都好岩飲呀!
人就係咁心多架啦, 食完凍又想食熱, 呢款S2特色火燄卷就真係夠晒熱啦, 玩埋真火, 係食前一刻, 侍應會係碟底點火燒一陣, 好等飯粒外層有層焦香, 卷物頂層有蟹籽, 海膽及特製醬汁, 飯就包住旦及青瓜, 味道唔錯!
有梅子酒飲, 叫返串燒日本茄子, 鷄腎及秋葵黎送下酒, 最LIKE佢個日本茄子上面有既廚師特醬汁, 為淡口既茄子加添味道, 咬落亦都JUICY!
一客兩件既清酒鮑魚鷄翼, 燒鷄翼去骨, 釀入以清酒煮既鮑魚, 一啖咬落去最先食到香嫩鷄肉, 之後就食到煙韌彈牙既鮑魚, 啖啖肉好味道!
呢客紫芋年糕, 以紫菜包住食, 年糕外面燒到香脆, 咬入裏面又有軟糯感, 夾住紫芋芯, 甜度適中, 食完好有幸福感!
一客兩隻磯燒岩蠔, 岩蠔都幾大隻下, 面頭搽上白麵豉醬, 食落好惹味, 與蠔味都幾夾!
名字搞鬼既日本婆海膽沾竹炭烏冬, 只睇名字係唔會知道究竟係咩黎, 有時心思思期待既心情又幾得意! 當侍應送上枱時, 原來係玩FUSION概念, 以麻婆豆腐配以冷竹炭烏冬, 亦係有一版海膽伴食!
味道微辣既麻婆豆腐伴以冷烏冬, 食落味道都可以, 亦可再另加海膽一齊食, 又比佢諗到咁既配搭, 驚喜創意度加分!
熱辣香脆既鯛魚燒, 細細條相當得意, 咬落入面係紅豆餡, 份量岩岩好!
呢餐真係好豐富, 食物種類亦都幾全面, 廚師喜歡以海膽入饌, 鍾意食海膽既朋友表示相當滿足, 咁又過左一個輕鬆而又滿足既一個吃貨時間!
S2 Kitchen : 中環威靈頓街51號地舖
contact me : gingerszeto@yahoo.com.hk
每次想食不同種類既和食就會諗到呢度, 日式裝飾環境舒適, 今次安排係房間, 又另有一番風味
餐牌食物選擇夠多, 刺身, 壽司, 燒物, 炸物, 天婦羅, 串燒, 和風料理, 甜品一應俱全, 有選擇困難症既朋友會出事架...................
蟹籽沙律 (小/$38), 超大碗, 足夠3-4人份量, 面頭灑上超多蟹籽, 好似唔駛錢咁, 爽脆多汁既青瓜絲及生菜與脆口既蟹籽一齊食, 口感清新, 每次黎呢度都會必叫呢樣!
活赤貝刺身 (2件/$84), 賣相靚仔, 連殼一齊上, 一隻可以切成3件
點少少芥辣豉油一齊食, 食到爽脆感及鮮味, 唔錯!
軟殼蟹手卷 (2件/$36), 紫菜唔淋, 包住熱辣辣炸好既軟殼蟹, 咬落唔會食到一口油, 而且飯既份量適中, 食完都唔會好飽肚, 可以試埋其它野!
炭火燒河豚干 ($32), 味道甜甜地, 雖然話係干, 但食落口感軟硬適中, 點埋附送沙律醬, 食落仲滋味, 用黎送酒既佳品!
土佐豆腐 ($38), 一客三件, 每件比起坊間食到既仲大件D, 個外皮炸到香脆, 包住滑滑既豆腐, 食落都幾有豆腐味, 而佢濃味既醬汁襯住淡口既豆腐, 味道岩岩好!
大蝦什錦天婦羅 (6件/$58), 炸蝦有成3隻, 其餘有南瓜, 小青椒及茄子, 炸漿有少少厚但都幾脆, 蝦肉幾爽口, 南瓜香甜!
鐵板牛柳粒粒燒 ($55), 一口牛柳粒, 肉味有及夠腍; 中間有球薯蓉及面上有D炸脆絲, 一硬一腍, 口感特別!
炭火燒泡菜鷄翼 ($48), 一客三隻, 漲卜卜既鷄翼去左骨, 釀滿鷄肉及泡菜碎, 再點少少辣椒醬一啖咬落去, 泡菜及鷄肉填滿口腔, 食完一隻滿足感爆燈!
赤板魚蛋紫菜手打烏冬 ($42), 一碗份量好足, 煙韌烏冬有咬口, 配上鮮蛋撈埋一齊食, 加添蛋既香味及滑度, 個湯底又夠清, 食完真係超級飽!
一口朱古力芝士年糕 ($38), 最喜歡呢個甜品, 每次都必叫, 外脆內軟既質感, 配合芝士既香甜味道, 真係好正呀!
菠蘿雪芭 ($48), 食完熱又想食凍, 呢個咁精美既雪芭, 用匙更慢慢"刮", 食到好香甜菠蘿味, 用黎清清呢餐既味蕾都好岩數!
食物水準味道不俗, 價錢亦好親民, 每次黎呢度開餐都可以開懷咁食, 仲有............減肥期間千祈咪去呢度呀............會出事架! 哈..哈...!
contact me : gingerszeto@yahoo.com.hk
根據非正式及科學化統計, 對食德國菜既慾望, 通常都係半年內梗會產生, 今晚就黎到呢間有波睇既德國餐廳開餐
水吧位設置大電視, 播放著精彩球賽, 岩晒一班球迷係度飲野睇波, 內裏佈置成德國feel, 又唔會以為自己去左Bar!
餐牌上有頭盤, 熱湯, 主菜及甜品供應, 散叫/二人晚餐各式其色, 今晚試下散叫, 確保每樣都係自己想食既
先黎頭盤希靈魚柳伴紅菜頭青蘋果他他 ($128), 賣相精緻, 一口一件, 帶點咸味又口感爽脆既希靈魚柳, 伴以紅菜頭青蘋果粒, 味道酸酸, 三者既結合, 無論口感或味道都豐富起來
跟住分別點左兩款熱湯, 黎到德國餐廳, 當然要試下呢款德國經典薯仔湯 ($58), 果然好香濃薯仔味, 似飲緊液體版既薯蓉, 薯不簡單; 另一款係傳統匈牙利熱燉牛肉湯 ($58), 開初飲有少少辣味, 可能材料有紅椒, 其他材料包括薯仔粒及牛肉粒, 感覺有D似飲緊羅宋湯但走酸版, 隨湯附送麵包一片, 飲完湯都已飽了不少!
黎食德國菜, 好大程度都係沖住呢款招牌脆皮燒德國咸豬肘伴酸椰菜烤燒薯角 ($198)而黎, 上枱時已經聞到好香燒肉味, 相機先食完後, 侍應就會幫忙起肉, 好貼心既服務; 豬肘燒得皮脆肉嫩, 食皮時會聽到"咔喳"聲, 肉味道又唔會過咸, 點少少傳統醬或芥辣, 滋味滿分, 飲啖德國清啤 ($68), 真係大杯酒, 大塊肉! CHEERS...............
估唔到係呢度都有得食Risotto, 呢款露荀牛肝菌忌廉汁意大利飯 ($198), 份量夠多又夠晒熱辣辣, 每一粒意大利飯都索滿忌廉汁, 煮得夠腍身又入味; 飯中配以牛肝菌粒, 入口食到好香菌味, 清清地無肉都唔錯!
由頭盤熱湯開始食到主菜, 無理由唔食埋個甜品架?! 呢款傳統德國蘋果卷伴雲呢拿汁 ($88)又點睇呢? 由於即叫即焗, 需要點時間等待, 一客兩件既酥皮蘋果卷, 外脆酥皮內面係以蘋果做餡, 配以少少提子乾, 好"外國甜品" feel; 蘋果餡味道帶酸, 配以香甜既雲呢拿汁就岩岩好!
埋單九百幾元, 年青侍應服務態度幾好, 反應又快, 不失為享用德國菜既好地方!
Schnee German Restaurant : 銅鑼灣駱克道447-449號中威商業大廈1樓
contact me : gingerszeto@yahoo.com.hk
對於一D開設在小街內, 嘗試在離晒地既租金中找尋自己一片天既餐廳, 都有一種特別既情意結, 心想應該對於烹飪有熱誠, 中伏既機會率都應該低D!
室內環境走簡約路線, 令人感覺舒服
餐牌主要供應套餐, 散叫, 飲品及甜品, 各種選擇數目唔講得話好多, 但望落都幾吸引, 價錢仲幾親民
晚飯時間到, 一於叫個SET DINNER試下, 頭盤五選二，我地二人只需諗唔要邊一樣就ＯＫ啦。。。。哈！
主廚濃湯(蕃茄湯)配麵包, 食落好香蕃茄味, 仲食到佢既籽, 將麵包條點落湯到食仲滋味!
巴馬火腿配希臘沙律, 賣相幾吸引, 頂上放了一片巴馬火腿, 食落唔太咸帶少少油潤感, 沙律菜伴以黑醋汁一齊食, 口感夠晒清新!
藏紅花茴香柚子魷魚沙律, 食到好香魷魚味, 質感柔軟, 其餘既沙律菜就爽脆可口!
金銀魔鬼蛋配煙三文魚, 以皮蛋咸蛋加菠菜伴以蛋黃醬撈均再釀入烚好既鷄蛋內, 豪氣D將半隻蛋放晒入口, 滿滿既饀料填滿我既口腔, 食到香滑既口感, 半隻份量作為頭盤就岩岩好, 當然唔好忘記仲有片煙三文魚, 下次可以試下包住一齊食, 睇下會唔會仲好味D先?!
係5款主菜中點左全月早餐, 係全月並唔係全日, 食物相當豐富, 包括茄汁豆, 炒白菌, 昆布蘭腸, 牛仔腸, 黑松露炒蛋, 窩夫, 蕃茄, 煙肉, 沙律菜, 煙三文魚, 賣相都幾靚仔, 以木板奉上, 最欣賞佢既煙肉, 夠晒香脆, 唔係求其煎一煎比你就算數; 但對於佢既炒蛋就幾失望, 食落嚡口, 就算加左黑松露都係咁話!
另一樣主菜係野菌汁蝴蝶春鷄配甘荀牛油飯, 所謂既蝴蝶春鷄即係開邊斬, 望落靚仔D又方便食客用餐, 幾唔錯呀, 而春鷄燒得皮香肉滑, 味道唔會太濃, 點少少野菌汁食都幾好味, 要挑剔既係個醬汁係凍既, 煮返熱會好D囉; 另外個牛油飯係食到香濃牛油味既但又唔太油膩, 幾特別亦好岩胃口呀!
包埋甜品 : 我投了焦糖燉蛋一票, 甜脆既焦糖面配以香滑燉蛋, 雙重口感, 教我如何不愛它; 友人就投左佢果票比草莓奶凍, 原因係香濃奶味加夠滑身, 當然佢自己係草莓FANS都係加分理由之一!
加$25可轉特飲, 呢杯就係冰雪奇緣 (Frozen), 係熱情果加蘋果Smooththie, 好大杯飲落好香蘋果味, 又香又甜又夠凍; 加$10轉飲LATTE, 夠晒大杯, 沖得幾岩口味, 抵加錢!
散叫食物點左呢款芝士焗薯條配意式黑醋汁 ($45), 身為芝士控既我, 每次見到芝士+薯條都唔會放過, 薯條先炸然後放上芝士加黑醋汁再焗, 上枱時已聞到芝士香味, 食落口有薯條既香脆感, 繼而有芝士香味, 黑醋既酸甜味中和左兩者既膩感, 所以..............................咁既份量我地都食得晒!
全店免收加一, 真係相當抵食, 食物水準唔錯, 侍應服務夠細心又主動, 不時幫你加水及清理枱面, 呢D就係喜歡幫襯小店既理由!
