之前有朋友食過呢間川菜館, 覺得味道唔錯, 見佢地新推出左粥底火鍋, 當然要召集鍾情烚下烚下既食腳(即係我啦! 哈......)! 地點係油塘大本營對面街地舖, 唔難搵! 見門口已擺放一大個粥底火鍋易位架, 包無去錯!
粥底有分大蜆蟹, 大蜆蝦或大蜆龍蝦, 想食龍蝦見價錢($238)都唔貴, 就一於大蜆龍蝦粥底啦, 仲教埋你粥底火鍋點食法
落左粥底火鍋單後, 等食之際諗起門口個易位架下面有推廣原隻野生活刺身墨魚($288/大; $198/小), 大家都表示有興趣喎, 咁就仲等咩呀? 落單啦!
一隻細既份量切成薄片都鋪滿成個大碟, 白雪雪鋪在冰上面, 保持著冰凍感覺, 點少少刺身豉油及芥苿, 口感非常爽口及食到鮮味, 食唔停口呀!
冰完就火啦, 大蜆龍蝦粥底鍋上枱, 材料包括大蜆, 食落唔韌仲好鮮甜; 龍蝦斬成細舊更加易出味, 食落肉唔算太多但都鮮甜, 收貨!
食完大蜆及龍蝦, 就可以開始剔火鍋配料, 食材選擇相當之多, 唔想做大嘥鬼, 叫左以下精心之選:
特大日本廣島蠔 ($98/8隻), 隻隻肥嘟嘟, 烚完都唔會變左"蠔士", 食落幾重蠔味, 喜歡蠔味既朋友可試呢款!
火鍋必然主角, 本地手切牛頸脊(例/$158), 份量都唔少, 厚薄適中, 只需烚十零秒即可入口, 牛肉味相當濃, 肉質唔會嚡口, 又唔會食肥牛咁油膩, 不禁要比個LIKE佢!
牛筋丸(半份/$24), 牛肉味亦都濃, 大細適中及幾有咬口
脆炸響玲($32), 當個湯底咁"精華", 又點可以唔叫返客"索湯恩物", 烚5秒就食得, 一咬D湯就係口腔內爆發出黎, 必叫!
鯇魚骨腩($68), 烚完完全感受到佢魚肉既嫩滑, 骨腩部位唔太多骨, 魚味又係好重, 烚完佢個湯底變得更加鮮味!
話晒係粥底火鍋, 侍應早前已送上粥膽一碗, 食到最後再倒落湯底中再煮一陣, 加埋少少䓤及薑絲一齊食, 哇...........鮮味到爆, 就算食完火鍋好飽都不禁食左2碗! 超滿足....................
蜀府川鍋: 油塘四山街2號油塘工業大廈3座地下
contact me : gingerszeto@yahoo.com.hk
去開荃灣探朋友, 當然要食埋晚飯先打道回府啦, 問主人家呢區有咩好食, 佢話不如試下呢間新式潮州菜, 我話打冷都有新式? 都想見識下喎
打開餐牌, 食物款式都唔算少, 見到有D菜式都幾過癮, 例如炒饅頭, 家常牙求籤鷄, 見到醬醃海鮮類, 呢D真係比較係傳統潮菜館見唔到, 但友人唔"好"生食, 咁就叫返D熟食類
先叫左呢款香辣魚仔炒蟶子王, 2隻起, 呢碟份量係4隻, 惹味豉汁配以大量洋䓤, 青紅椒, 加埋香辣魚仔, 令爽口彈牙既蟶子肉更好味, 廚師已預先起好肉再放返上個殼上, 方便易食, 正呀!
見到餐牌上有呢款椒鹽剝皮魚, 又係香口食物, LIKE呀, 一碟份量唔少, 甜味既剝皮魚干, 細條但幾鮮味, 連骨都可以食埋, 咪睇佢面頭咁多紅辣椒絲, 但食落一D都唔辣喎, 用黎送酒真係一流呀!
點都估唔到打冷居然可以有牛雜食, 呢個十七香牛雜鍋(細), 用火爐熱住食, 滾起就可以食得, 材料包括牛腩, 牛肚, 牛柏葉, 牛腸及蘿蔔, 炆得幾入味, 每件切得細細件方便進食, 呢鍋牛雜用黎送飯都好岩數, 遇著天氣凍D既日子食就就仲滋味!
友人提議呢款家鄉粉絲線兜亂, 炒粉絲食落感覺有D似韓國粉絲般有咬口, 配料有豬肉粒, 蝦干, 芽菜及蛋皮, 炒得幾香口及唔油身, 友人表示滿意!
食打冷炒粉麵, 點少得潮式辣椒油, 咪講笑, 加左當堂再好味D, 辣辣地更加香口惹味, 千祈咪錯過!
友人介紹呢間新式潮菜店果然唔錯呀, 以後係呢度食打冷可以唔駛例叫鵝片呢D傳統菜式, 仲有好多新花款, 下次又再試下先!
心夜來潮： 荃灣三陂坊30號地舖
contact me : gingerszeto@yahoo.com.hk
之前同朋友食過呢度既德國式燒咸豬手, 友人對佢念念不忘, 成日問我幾時再去食? 哈....哈......好啦好啦, 就今晚啦(當然我係一早訂左位先啦!)
侍應送上餐牌, SET DINNER價錢算相當抵食, 最重要係有德國式燒咸豬手on the list嘛...........一於一人一份!
套餐包括餐湯, 是晚係菜湯及磨菇湯, 加$38可升級至呢款黑松露菌忌廉湯, 未飲先聞到黑松露味, 飲落湯質比較杰身, 因為內含菌粒, 加添少少咬口, 食埋片小多士都岩數!
前菜選擇有沙律, 見到有大蝦占米多(另加$58), 當然選擇後者! 蝦確實唔算細隻, 起左肉再切成細件, 方便易食, 配合埋鮮蝦味醬汁及菇菌, 作為前菜都係一個唔錯選擇!
友人期待已久德國式燒咸豬手出場啦, 以木板盛載住既咸豬手, 伴以一籃炸薯條, 賣相相當吸引人; 豬手已經切好一件件, 岩晒我地呢D懶人, 豬手皮燒到香脆, 咬落去時會發出"咔咔聲, 而肉就食到應有既咸味, 友人對此表示滿足! 而個炸薯條都唔好忘記喎, 炸得唔油膩, 幾有薯味, 最終比我地二人合力KO埋!
另一個主菜為燒紐西蘭肉眼(7安士), 選擇七成熟, 上枱時聞到肉香味, 其實七安士都唔細塊, 肉眼外面燒到微焦, 洒上少少黑椒粒增加香味, 切開望見中間部份仍帶有少少紅色, 火候好似控制得唔錯, 肉味幾濃亦食到肉汁, 唔會以為自己食緊"柴皮"!
套餐包飲品, 友人選擇凍桃茶, 解渴一流; 我就叫左杯凍cappuccino (註:兩款都無需另加錢), 侍應送上時我都不禁叫左一聲，以泡沫整出3D得意猫仔, 有D唔捨得飲佢TIM............相機飲先, 之後就到我, 味道合格, 但外型上我已經加左唔少分啦..............哈!
食物升級左, 二人埋單都唔駛六百, 以今時今日出外食好西黎講, 相當抵食及超值!
contact me : gingerszeto@yahoo.com.hk
轉左工作地點後, 係港島區開餐既機會大大提高, 今次選擇左呢間食多國菜餐廳 Aroma, 試下新口味! 餐廳有兩層, 樓下係Bar區, 而樓上供客人用餐地區!
二樓既用餐區面積唔太大, 場內佈置充滿玩味, 比人一種放輕鬆感覺
至到八點都係Happy Hour, 酒精類飲品買一送一, 當然唔好錯過啦! 但我還是選擇呢杯Strawberry and Coconut Mojito, 醒下個胃先
餐牌上提供Tapas Main and Side Dishes, 食物選擇以煎炸類為主, 可能岩送酒卦, 一於叫幾款Tapas食下先
呢度既食物主要特色係以中式醬料混入去西式煮法, 好似呢款Cheese Pumpkin Cake ($58), 以中國臘肉碎代替煙肉, 食起上黎更加香, 質感有嚼口既咸臘肉配以軟腍既甜味南瓜餅, 口感同味道混合起黎相當特別!
XO Mushroom ($58), 以你我雪柜應該都有一樽既XO醬炒雜菇, 味道食得出XO既香味, 面頭再灑上瑤柱絲, 但略嫌D菇妙得油左D!
呢款Deep-fried Chicken Wings with Preserved Egg Yolk ($68), 超推介, 簡單黎形容即係我地食開既黃金蝦D朋友, 濃香惹味既咸蛋黃汁液舖上去炸到金黃香口既單骨鷄翼, 單骨鷄翼容易入味外, 進食時又相當方便, 一客好快比我地KO啦, 真係超好好好味呀................................!
呢個Side Dish Tasty Fries ($48)就咁睇落去咪只係炸薯條, 最多加多少少芝士碎好未?! 有咩咁特別先? 今次個亮點就係個醬, 呢個醬係用豆辦醬混入蛋黃醬, 你無睇錯呀, 係豆辦醬呀, 味道比較偏向咸辣味, 但質感就係蛋黃醬既軟滑, 真係帶比人驚喜, 配薯條食係好味同夾既, 唔知係點諗到咁既配搭呢?! 不禁要比個"勁"字佢!
話晒係開餐, 點都要返個主菜先夠既, 呢個Red Fermented Beancurd Chicken ($228), 即係南乳鷄卷, 一客四件, 鷄肉先焗, 以鷄皮就再煎一煎香再包返件鷄肉, 肉質食落嫩滑, 而由於中間係包左D南乳, 食落口充滿佢既咸香味, 即係嫩滑版既南乳吊燒鷄; 個配菜係粟米仔, 豆腐干粒加香肉粒, 黎一個中西合壁!
呢餐中西混合煮, 食物水準相當唔錯, 又帶到驚喜感比客人, 每次上菜時, 侍應會簡單講解返個菜式既特式之處, 令我相當滿意呀!
Aroma 地址 ： 灣仔石水渠街６４號地下１號舖
contact me : gingerszeto@yahoo.com.hk
旺角真係一個卧虎藏龍的地方, 咩地方既菜式都可以搵到, 今次初嚐土耳其菜既經驗就係發生係呢間食店!
係大廈既一樓, 門口貼左大大塊土耳其咖啡既宣傳板, 包無搵錯地方!
食店面積唔大, 估計可容納二十人內, 燈光昏暗, 播放著經典歌曲, 展開我地今晚既土耳其餐之旅
侍應送上餐牌, 見到有套餐或由廚師發辦既餐單, 未接觸過土耳其食物, 由廚師發辦應該無走鷄
1) 特色沙律配白芝士 - 材料包括新鮮爽脆既生菜絲, 伴以青瓜粒, 蕃茄片及白芝士, 撈均一齊食, 食到滿口清新感覺, 咸咸地既白芝士調下味都幾得意
2) 茄子薯仔配自製乳酪 - 油泡過既茄子食落香口, 薯仔片食落相當有薯仔味, 配以自製乳酪 , 味道好夾, 當係一款小食都幾唔錯
3) 自家土耳其乳酪芝士炸物 - 亦都係用乳酪芝士入饌, 好岩我呢個芝士控口味, 熱辣辣外脆內面有芝士作餡料, 加上少少番茜碎增加香味, 好味道
4) 梅爾辛紅飯釀烤鷄 - 半隻烤鷄內裏釀滿充滿香草味既飯, 鷄件肉質超嫩, 香脆薄鷄皮唔會食到一口油, 超推介呢款菜式
5) 阿拉斯加狹鱈魚 - 炸香左既阿拉斯加狹鱈魚肉, 配以千島醬汁, 再夾上面層既桃片及底層既蕃茄片, 一件放晒入口, 香甜軟身既桃片混合埋脆口既炸魚, 口感同味道都大不同, 增加左食物味道既層次感
6) 特色甜品 - 包括開心果千層酥, 味道頗甜, 細意品嘗都食到開心果既香味; 另一款為土耳其著名軟糖, 呢款一食就知係玫瑰花味道, 甜度適中
初試土耳其餐發現都幾岩食, 有時放膽試下新菜式都會有得著, 同場加映今晚伴食主角: 可愛又貪睡肥黑猫一隻.....................
我愛伊斯坦堡 地址 : 旺角通菜街9-15號1樓A室
contact me : gingerszeto@yahoo.com.hk