從轉左工作地點後, 係港島區開餐既機會又相對多左, 友人介紹下呢間名字幾特別既餐廳, 不期然令我聯想起"豉油西餐"?! 哈.....
見到門口佈置幾特別, 仲有報紙報導過, 一於試下咩料先
店內面積唔算十分大, 但某部份位置有窗口位, 昏暗燈光伴著首首懷舊歌曲, 情調氣氛都唔錯
望下餐牌, 見到佢呢個精選二人晚餐($888)都幾吸引, 加上侍應都推介, 就咁話啦~
先送上海鮮拼盤, 份量夠晒睇頭, 底層舖上大量冰粒, 確保海鮮維持低溫, 食落口感都好D啦! 食材包括生蠔4隻 (每款2隻), 鮑魚2隻, 日本刺身帶子2隻, 鮮蝦4隻,及紐西蘭聖子刺身
配以3款不同味道醬汁, 包括: 酸甜醬汁; 柚子芥苿汁及日本刺身Wasabi豉油, 見到生蠔都唔細隻, 食落JUICY有蠔味; 鮑魚幾厚身食落有咬口; 帶子及蝦鮮甜; 聖子刺身好爽脆! 個人好歡喜個酸甜醬汁, 同D海鮮都幾夾, 炎夏食呢D好開胃呀!
海鮮拼盤
海鮮拼盤
跟著到餐湯, 係黑松露磨菇湯, 好香黑松露味, 飲落就食到磨菇粒, 若然配埋個餐飽就仲好D
之後再送上兩款熱前菜, 分別係燒牛脷配蜜糖芥辣, 份量係前菜Size, 牛脷燒到好香, 質感好腍, 用刀一切就切開, 點少少蜜糖芥辣醬令人食慾大增
燒牛脷配蜜糖芥辣
燒牛脷配蜜糖芥辣
另一款係黑松露年糕, 似乎個賣點係個黑松露醬, 醬汁杰度恰當, 每片年糕都可沾滿個醬汁, 食落煙韌, 又可增加澱粉質
黑松露年糕
黑松露年糕
好啦, 主菜黎啦, 呢款係侍應推介既美國慢燒牛肉眼(約4成熟), 見到粉紅色肉質就覺得應該幾嫩滑, 食落果然無估錯, 肉味幾濃, 配以燒汁更加香滑, 果然無介紹錯
美國慢燒牛肉眼
美國慢燒牛肉眼
另一款係紐西蘭羊T骨, 兩件份量, 見到燒既坑紋係羊肉上, 上枱時已經聞到好香, 點左七成熟, 切開見到有粉紅色, 肉質比牛肉眼帶點硬身, 羊肉味唔算太濃
紐西蘭羊T骨
紐西蘭羊T骨
值得一提既係呢兩款主菜既伴碟薯蓉, 並唔係坊間用薯粉開, 而係食到有粒粒薯仔, 口感雖然無咁滑, 但薯味好夠, 好想講廚師用咩料煮, 食客係食得出既, 就憑呢D咁細微地方都見到廚師既心意, 好想比兩下掌聲佢...................
加埋個是日甜品, 今晚係菠蘿芝士蛋糕, 賣相精緻, 食落食到菠蘿果肉粒, 個人都係首次食菠蘿芝士蛋糕, 又幾好味喎
菠蘿芝士蛋糕
菠蘿芝士蛋糕
套餐包餐酒2杯, 由於唔酒, 可轉其他飲品, 呢杯Latte為呢餐劃上了完美句號!
LATTE
LATTE
發現侍應會因應食客進食進度而上菜, 食完一款先上另一款, 唔會一次過上晒枱, 呢點值得加分, 雖然名字叫大排檔, 但食物質數及服務當然唔係啦^^
短頭髮可以變化性唔太大, 最易搞既係造色, 但每次造色都對頭髮造成無可避免既傷害, 加上吹頭既熱力, 頭髮變成易斷及乾旱, 希望從每日既護理程序可以幫到佢回復健康!
Dove推出全新系列，創新髮質重建科技，深層修護受損秀髮，持續潤澤避免再受損傷，助妳重建年輕髮質，每一次使用都有驚喜。
全新Dove Nutritive Solutions系列添加6倍髮絲纖維修護因子(Fibre Actives)，能立即修護髮絲損傷，強化受損髮絲。每天使用，持續修護及潤澤，從此，髮質改善不止於初次使用，而是持續進步，日覆日令秀髮重拾如同未受損傷前的潤澤柔順，重建年輕髮質。
深層修護洗髮乳 (680 ml)
揼取2-3下份量已足夠, 加水容易捽出泡沬, 香味清新
洗完頭就用埋深層修護潤髮乳 (660 ml)
同一種香味, 避開髮根位置塗搽於中段至髮尾位, 按摩後即可沖洗, 沖洗容易, 摸望柔順感大增
兩款產品同樣含角蛋白修護因子(Keratin Repair Actives), 能立即修護秀髮表面受損, 同時深入滲透髮芯、持續補充流失的養分
只要每日持續使用, 睇下.......髮絲真係有明顯改善, 變得有返光澤及順滑, 就算keep住造色都問題不大~
有關產品由品牌提供, 內容純個人分享!!
產品於各大萬寧、屈臣氏、百佳及惠康有售。
contact me : gingerszeto@yahoo.com.hk
適逢天生係海鮮宿敵既朋友生日, 而佢又一直好想試韓式海鮮塔, 要同佢食生日飯, 順理成章就去食呢間評價幾高既韓式海鮮塔專門店 (心裏暗喜 : 唔駛諗到頭都爆都唔知食邊間....哈!)
大家係港島區放工, 選擇呢間位於大坑既分店都好方便, 係地下門口已經有個宣傳易拉架係度, 好易搵
行上樓梯, 自動門除除打開就見到食店面積唔算十分大, 裝潢得幾有韓FEEL, 但每枱位置又唔會坐得好迫, 好在有訂位, 現場去到已經坐滿九成客人
餐牌上有3款套餐供選擇, 價錢由每位$328至$568, 朋友生日一於食豪D, 點了最貴價及海鮮種類最多既濟州塔, 等食之前, 飲了侍應推介最新韓國出品既桃味氣酒, 岩晒夏天飲, 當然唔少得可以添食既前菜, 味道都唔錯
二人分享有七層塔, 當塔頂既紅色溫度計去到85度就可以開始食第一層, 第一層為泡菜和牛卷, 薄薄一片, 底層以泡菜包住和牛, 食到和牛既鮮味肉汁, 若果覺得唔夠泡菜, 可以自加前菜中既泡菜! 亦可追加和牛($168/8件)
第二層為韓國象拔蚌及蟶子, 象拔蚌已處理成一條條, 進食時就方便D; 蟶子都幾大隻, 兩隻食落都有彈牙感及鮮味
第三層為海蝦及元貝, 兩者亦係重量級, 蝦肉彈牙無比; 元貝厚肉但唔會韌, 超鮮甜
第四層為開邊龍蝦, 見到肥美既龍蝦肉就二話不說將佢起肉, 放入口既鮮甜彈牙, 到呢一刻都仲記得, 唔係生猛生鮮絶對做唔到呢個效果
第五層為新鮮花尾龍躉腩及北寄貝, 龍躉腩超肥美, 咬一口魚油係口內爆發; 北寄貝就爽甜
第六層為沙巴肉蟹, 鑽石蚌及大花蛤, 肉蟹雖然唔算大隻, 但果真係肉蟹, 睇下隻蚶就知無騙人
最後一層為南非鮑魚及海螺, 鮑魚都唔細隻, 厚肉夠晒口感, 一咬就咬開, 唔會拖拖拉拉, 爽口彈牙無得彈; 海螺面對咁強勁既對員只好默默無言................
每層都有日本蔬菜作配菜, 另追加為$58一盤, 個人最為欣賞係木瓜, 蘿白及南瓜, 甜度十足, 尤其以蒸既方法最能食出佢既甜味
最底層為一開始已煮緊既魚湯粥(每位另加$30, 另有其他不另收費湯選擇: 如人蔘鷄湯, 韓式豬手湯, 韓國泡菜湯), 所有海鮮精華已完全落入去呢個粥入面,點會唔鮮甜呢? 由於食晒以上七層海鮮都已經好飽, 肚皮只可容得下一碗魚湯粥, 不過唔緊要, 侍應早已預備外賣碗供客人帶走, 服務體貼細心, 咪做大嘥鬼呀!
基本上枱上既調味料我地都無點過, 就係為左要食到海鮮既原味, "鮮甜彈牙"呢4個字係我地口中都唔知出現左幾多次................................友人對此生日飯表示極度滿意, 豪一點又有咩所謂呢?!
地址 : 大坑浣紗街1-5號浣紗閣1樓
contact me : gingerszeto@yahoo.com.hk
約左朋友行街, 行到身水身汗, 當然要搵個地方坐底過下冷河兼差差電啦, 食個甜品就最岩, 知道呢頭開左幾間甜品店, 多一點選擇, 上次食過覺得幾唔錯, 一於再ENCORE呢間!
打開餐品牌見到有新款甜品上場, 朋友選了焙茶鬆餅配金莎朱古力脆脆雪糕 ($58), 賣相相當靚仔, 有3件相當厚度既鬆餅, 配以抺茶醬/糖漿, 而碟上裝飾既綠色係綠茶味醬, 紅色係士多啤梨醬, 總共有4款醬用黎配襯鬆餅!
講返個主角鬆餅先, 好軟熟, 面頭灑上少許糖粉, 而個金莎朱古力脆脆雪糕球都好香金莎朱古力味, 喜愛食金莎既朋友應該好LIKE! 朋友最喜歡佢個抺茶醬, 充滿抺茶香味又唔甜, 減少"膩"既感覺!
我就點左呢款雲呢拿泡沬配榴槤雪糕 ($56), 身為榴槤控的我, 行到咁熱想食返杯凍品COOL DOWN一下, 見到榴槤雪糕仲唔心心眼咩?! 面頭係好香滑雲呢拿泡沬, 配以側邊既柚子肉, 一甜一酸口感特別!
而中間係榴槤雪糕, 菓味好夠, 閉上眼覺得自己食緊榴槤咁, 而底層係芒果肉粒, 味道甜甜酸酸, 令人感覺SO FRESHING! 一客份量岩岩好, 食完唔會好飽肚!
此店不收加一服務費, 仲會送上清水比你中和返甜味, 侍應服務態度快, 我地食完呢餐又再有力量去繼續血拼!
contact me : gingerszeto@yahoo.com.hk
要同朋友慶祝生日, 當然要搵間特別少少既地方食生日飯, 地點就佢返工既尖沙咀, 上到黎呢間由名㕑EDDY CHU主理既餐廳展開呢餐壽宴
餐廳面積唔算少, 分開兩邊, 可惜未能安排入座於窗口位置
但唔緊要, 服務細心既侍應送上餐牌, 見我地二人就提議要呢個精選二人晚餐, 望落食物都幾吸引, 咁就呢個啦! 餐包2杯餐酒, 我地唔"酒", 可改為菓茶, 味道酸甜幾好入口
海鮮拼盤 - 食材非常豐富, 包括兩款生蠔(各2隻), 今晚呢兩款分別為南非及愛爾蘭, 咸鮮味濃, 質感幾爽身; 鮑魚(2隻), 無需點醬汁已經有味道, 肉質夠厚身, 有咬口; 鮮蝦(4隻),蝦肉爽口, 配以酸甜香草汁一齊食好清新; 日本刺身帶子(2隻), 以杯仔奉上, 十分鮮甜; 紐西蘭聖子刺身, 配以日本刺身豉油及芥辣, 口感及味道又唔同, 鮮味更顯!
乳酪芒果雜菜沙律配西班牙48個月黑毛豬風乾腿, 清爽沙律菜加埋咸香黑毛豬風乾腿, 食到少少油香感, 配以酸甜度適中既乳酪醬汁, 夠晒醒胃
湯類要左創意度十足既海鮮冬陰忌廉湯 - 泰式香料配以西式煮法會係點? 口感細滑, 味道幾辛辣但絶對接受到, 湯中包括帶子粒, 蝦肉及蟹肉, 不欺場!
熱前菜有三款 : 磨菇法國田螺 - 醬汁濃味, 田螺肉較為稔身, 配以紫薯肉既甜味中和一下; 咖哩蟹肉配熱脆麵包 - 味道似食緊泰國菜, 個咖哩汁唔辣但好香, 濃淡度岩岩好, 配以索汁熱脆麵包簡直妙極; 黑松露年糕 - 上枱時已經聞到黑松露既獨特香味, 香滑醬汁配煙韌年糕, 好味道!
食到呢度, 基本上都已經飽左一大半, 但無理由浪費期待已久既主菜?! 今次點左香燒全條鮮魚配酸甜香草汁, 全條燒既鮮魚唔係好多地方有得食, 餐廳每日會根據買到咩鮮魚而有咩魚供應, 今晚呢條係盲曹, 份量都幾大條, 燒到皮香肉嫩, 好彩魚本身無咩細骨, 食得都好方便, 亦都配以酸甜香草汁, 簡直將味道提昇!
呢款西班牙橡果級黑毛豬肉眼蓋 - 一客兩件, 肉質比較有咬口但又唔會有嚡口感覺, 配以燒汁一齊食都好夾; 另外亦留意到佢地既配菜唔用炸薯條而改用紫薯肉, 食得更有均衡營養及健康, 要比個: 讚!
最後當然唔少得係甜品, 今晚甜品係芝士蛋糕配鮮菓, 份量岩岩好, 再大份D都食唔晒
套餐價錢再加一, 為同朋友祝壽, 豪一點又如何?!
地址 : 尖沙咀亞士厘道17-19號19樓
contact me : gingerszeto@yahoo.com.hk
歐洲國家盃進行中, 同一大班朋友落BAR睇波是常識吧, 估唔到依間酒吧除左有HAPPY HOUR外, 仲有得食晚餐, 一於試下先
一般酒吧格局, 設有大電視及電子擲飛標機, 另設有卡啦OK, 可以讓你一展歌喉
講返晚餐先, 見餐牌提供一人餐 ($168), 包是日餐湯, 香煎厚切鵝肝多士, 主菜一款及精選法國紅酒/非酒類飲品(無限任飲2個鐘)
都幾吸引喎, 一於點呢個餐, 先點左Lemon Squash 同 Orange Squash解一下暑氣, 味道調教得幾好, 一飲感覺幾refreshing
餐湯係南瓜忌廉湯, 味道比較淡口
之後送上香煎厚切鵝肝多士, 鵝肝果然係厚切, 一咬入口就滿口油香, 喜歡食鵝肝既朋友一定夠晒滿足感
主菜: 黑安格斯肉眼牛扒 (七成熟), 份量有8安士, 肉質算Juicy, 配以香滑薯蓉, 食晒都幾飽肚
另一款主菜 : 香草燒鷄(半隻), 上枱時已經聞到好香, 燒得皮香肉嫩, 雖然份量係半隻但都幾多肉, 食埋個薯蓉亦都飽肚
話明係2個鐘任飲非酒精類飲品, 飲多兩杯已經抵晒, 食物味道OK, 侍應服務態度OK, 下次要去飲野開餐兼睇波就知去邊到啦
地址 : 太子大南街27-31號富威閣地下1-2號舖
contact me : gingerszeto@yahoo.com.hk
