又一餐@OCIO

呢間西餐廳OCIO, 好多時行過都會見到有人係門口等位, 今日放假可以早少少食晚飯, 時間尚早未見要係門人口等位, 咁就一於再試下啦!

門口見有晩餐餐牌, 食物選擇都唔算少, 包餐湯沙律, 主菜選一, 餐茶及甜品, 都幾豐富!  

餐廳面積唔大, 裝潢格局走CAFE路線, 牆上掛上食物推介


點餐後, 我們二人各選了餐湯(蕃茄濃湯) - 份量頗多, 喜愛蕃茄人士絶對唔可以錯過, 濃度強勁, 質感比較厚身, 見到蕃茄籽在內, 每啖都充滿蕃茄味, 飲到尾都覺酸


喜歡多一點綠色, 選擇要田園沙律 - 醬汁另上, 可以根據自己口味落多少份量; 沙律菜好爽甜, 配以少量菇菌, 但整個沙律係室溫, 食唔凍既沙律有D古怪


主菜到...............呢款係黑松露野菌肩意粉 ($139)


上枱時聞到好香黑松露味, 配以甜椒及野菌, 野菌口感爽脆, 意粉口感夠al dente，味道配合得唔錯

另一款主菜係車打芝士安格斯牛柳漢堡伴薯條 ($189)


份量夠晒巨型, 除左主角外, 仲有沙律菜及薯條, 主角"內涵"包括芝士, 安格斯牛柳, 厚蕃茄及少量野菌; 安格斯牛柳肉質嫩滑又多汁, 一咬D肉汁係口內爆發, 正! 值得一提係個飽內裏香脆, 食落好香口, 簡直為呢個食品加唔少分

飲埋餐茶就到甜品, 有呢款賣相唔錯既綠茶戚風疍糕

綠茶味幾濃, 配以少量紅豆, 味道唔太甜又夠鬆軟, 以餐包括在內既質數黎講算中上!
加一服務, 埋單三百幾蚊都算幾唔錯, 唔怪之得咁多人係門外等位!





地址： 旺角煙廠街33號朗廷軒地下B舖
contact me :  gingerszeto@yahoo.com.hk

 

 

韓一寒@Nun Korean Dessert

飯後食個甜品是常識吧! 對於韓式甜品一向都LIKE, 之前對佢地既韓冰一試難忘, 路過呢間主打韓式甜品既店舖又點可以唔巡視下業務呢! 哈.........
店內以自助式主理, 選好食物比錢, 再自行拎食物

呢個到餐提示器, 食物預備好會叫, 提你去取餐處拎食物, 幾搞鬼

餐牌上提供甜品選擇都唔少, 應該實會有想食既甜品

行到熱辣辣, 食番碗韓冰, 呢款係麻糬紅豆雪奶 ($55)
份量都幾大份, 足夠二人一齊分享, 面頭蓋滿黃豆粉, 加上有麻糬及紅豆, 食落都幾飽肚, 冰質地算幾滑身, 但若然奶味再重D會梗好, 冰溶既速度都幾快, 要快口D食!

另一款係魔鬼意大利粉雪糕 ($68)
未見真身時會諗意大利粉雪糕究意係咩東東, 見完真身即係將雪糕唧成條狀(類似打邊爐時既唧魚面), 雪糕好重奶味, 份量亦係大份, 伴以香蕉一齊食, 味道都幾夾, 但食完就好有罪惡感啦..............哈!

埋單百幾蚊, 以後食甜品又多個選擇啦!



地址 : 銅鑼灣勿地臣街12號地舖

contact me :  gingerszeto@yahoo.com.hk

 

 

豬出沒注意@Pork Bistro

一間主打食豬肉既西餐廳 PORK BISTRO,  中文名字相當搞鬼 - "豬肉在前", 擺明玩食字, 保證不用味精, 即叫即製, 不設加一

店內面積唔算好大, 似走簡約時尚路線, 入內見"豬"踪影處處, 屬豬既朋友有無好有親切感呢?! 哈..

打開餐牌, 食物選擇都幾多, 價錢合理唔算貴, 一班朋友就點左以下幾款食物
豬骨醬汁芝士薯條(分享份$85)

面頭有香脆煙肉碎粒, 熱溶左既芝士醬伴隨熱辣辣薯條一齊食, 味道偏咸, 建議叫杯BEER一齊食
豬骨濃湯黑松露意大利飯 ($100)

味道偏濃, 唔係好食到黑松露味, 意大利飯粒口感偏硬, 似未夠時間去令湯汁被飯粒索晒
豬皇飯 (多款西班牙"伊比利"及黑豚肉加特式芝士白汁配白飯) ($175)

見到兩款唔同種類豬肉(深淺顏色), 豬肉味幾濃, 芝士白汁配白飯口感較意大利飯好好多
招牌燒排骨 (半份/$95)

燒到骨肉有D分離, 食落肉質有D嚡口,  配以甜酸燒烤醬, 味道一般, 無咩特別
食滿指定金額, 送上特色甜品, 今次有賣相可愛既馬卡龍, 每人一個唔駛爭

侍應服務一般, 食完都費時再坐咁耐, 轉場去食甜品好過!

地址 : 九龍城褔佬村道63號地下

contact me :  gingerszeto@yahoo.com.hk

 

 

夏日炎炎正好甜@Joyful Dessert House

見到米芝蓮推介呢個"光環", 想試既意欲當堂會高D

而呢間甜品店就有呢個光環啦.................

 

店內環境佈置比人舒服感覺, 播著外國流行音樂, 甜品選擇幾多, 今次試下呢2款

伯爵茶奶凍 ($52) - 用耳杯著住, 驟眼睇以為係一杯奶茶, 試一啖食到好香伯爵茶味, 奶凍又夠滑, 相當唔錯, 甜度適宜, 伴以雲呢拿雪糕, 反覺雪糕偏甜

出面溫度入夜後都係咁熱, 試呢個菠蘿雪芭($52)就最岩不過 - 面頭有片有糖焦面既菠蘿, 下面就係滿載菠蘿味既雪芭, 切開一小塊, 伴著雪芭一齊食, 口腔充斥著香甜菠蘿甜味, 到肚後簡直涼透心, 份量仲足夠二人份享, 誠意推介呢款夏日消暑之選

不收加一, 侍應服務細心, 回頭率.........高!

地址 : 旺角黑布街74號藝興大廈地下2及3號舖

contact me : gingerszeto@yahoo.comhk

藍補濕, 黃潤養@Dove日本極致系列

未到七月, 炎夏日子已經來臨, 又熱又濕既日子真係令人苦惱, 除左護膚品要轉用質地清爽一D外, 頭髮既洗護產品都要有所轉變, 咁先可以時刻保持頭髮健康亮麗!  早前收到Dove日本極致系列, 主打補濕及潤養髮絲功效, 當然樂意使用啦!
呢套係極致輕氧保濕洗髮乳及護髮素 (藍色)
HK$59.9/480g (適合油性或中性髮質)

配方添加獨特Oxy-fusion「輕氧因子」，可撫平髮絲，令秀髮輕盈順滑，加上高科技揉合Oxygen atom於「輕氧因子」中，幫助秀髮凝聚水分保濕，毫不黏膩，更可賦予秀髮絲柔順潤澤感，並由髮芯締造極致絲滑柔亮秀髮

洗髮乳揼2-3下份量已足夠, 清新優雅花果香, 加水後容易做出泡沬

而護髮素特有 Dove Moisture Keratin，令秀髮意想不到的水潤順滑, 同樣有清新優雅花果香!

用後感覺頭髮清爽, 補濕功效令頭油出少左, 前面既留海唔會'痴"埋一舊

而呢套係極致金潤養護洗髮乳及護髮素 (金黃色)
HK$59.9/480g

以高科技揉合與秀髮天然滋養成分相似的Oleic Acid，注入配方，能深入滲透養護髮芯，令乾旱的髮絲從髮芯重拾健康光澤。同時添加了第二重Squalane養護成分，重點滋潤髮絲表面!

亦都帶清新優雅的香氣, 加水容易產生泡沬

護髮素並配合特有 Dove Moisture Keratin，令秀髮滋養順滑，輕盈柔順

用後頭髮帶點光澤感, 即使每晚用風筒吹頭亦能得到柔順感

產品於各大萬寧、屈臣氏、百佳及惠康有售。
有關產品及相關資料由品牌提供, 內容純個人感受/分享

contact me :  gingerszeto@yahoo.com.hk
 

勁量桑拿海鮮鍋@德哥火鍋專門店

覓食女子組又再出動, 今次黎到呢間火鍋專門店, 展開我地呢次女子組吹水大會

 店舖面積不大, 格局普通唔離地, 魚缸內放滿左各種海鮮, 邊款新鮮靚仔, 一目了然

火鍋就打得多, 今次試下呢個全港首創"浩瀚桑拿海上鮮" (每位$388, 2位起)

侍應透露預備製作需時25分鐘, 於是試下呢2款前菜
"司㰩", 女子組其中一員話好鮮甜; 另一款係麻辣木耳海蜇, 味道都幾麻辣但幾爽口

終於有得食啦, 侍應拎上枱時我地都不禁發出哇一聲, 好有睇頭下喎, 將錫紙揭開時, 香味散發出來

材料包括沙巴龍躉(魚皮食落有膠質感, 肉唔會嚡), 花蛤(肉幾鮮甜), 流浮山生蠔 (煮熟都咁大隻, 勁!), 農場鷄 (肉幾嫩), 海生蝦 (肉質幾彈牙), 鮮帶子 (食落有些少痴牙), 花蚧(雖然唔大隻, 但蚧蓋都有D膏食下)

食緊期間, 可加入豆腐卜索埋D海鮮精華一齊食, 唔夠飽仲可以煮埋個烏冬

食完呢個咁勁量既海鮮鍋, 侍應送上冰涼一點甜...............雲呢拿味道既雪米糍
結束我地呢次女子組吹水大會.........................哈..哈!

地址 : 佐敦廟街286-298號華志大廈地下A舖
contact me :  gingerszeto@yahoo.com.hk

 

 

下一站....甜品@Next Station Dessert

下一站唔係天后。。。。下一站係。。。。。。。甜品！
食過午餐，行左陣街，悶熱天氣驅使我地入去食個甜品消下暑

呢款法式朱古力班戟配青檸雪芭 ($58)


朱古力非常香滑, 一舊切開兩份可以一啖一舊, 朱古力充滿晒我口腔內, 最令我LIKE既係佢唔太甜, 食落唔會有好膩既感覺; 而個青檸雪芭夠晒清新又夠凍, 炎夏日子食真係透心涼, 可能係法式關係, 以雪芭黎清洗一下味蕾, 再食下一個甜品........哈
下一款出場係今期甜品紅人 - 紫薯, 化身成九宫格內既紫薯窩夫配雲呢拿雪糕 ($62)

一客兩件, 切開窩夫見到有紫薯餡, 甜度適中, 食到紫薯香甜味, 另有朱古力醬/糖漿伴食, 個人覺得加糖漿會梗加好味, 當然伴以雲呢會雪糕都唔錯啦, 一凍一熱, 味蕾新衝擊
兩款甜品賣相吸引, 份量適中, 食完成個人都Refresh晒！


 地址 :　旺角黑布街１３號地舖

  contact me:  gingerszeto@yahoo.com.hk