朋友知我係芝士控, 尤其係處於熱熔狀態下的芝士, 於是就帶我去試左呢間馳名芝士鷄煲店
由於時間尚早, 所以唔駛等位就可入座, 侍應送上落單紙, 見到食物選擇都幾多, 蔬菜, 菌類及丸類都有半份供應, 岩D 兩人顧客可以試多幾款
鷄煲味道除左芝士, 仲有麻辣口味, 我地當然選擇黃金芝士鷄煲
呢個係小煲($148), 適合2-3人, 份量都幾多, 內裏有洋䓤, 煮幾分鐘後, 芝士熔晒後就可以開餐
由於有洋䓤關係, 打開煲蓋後有一陣香味湧上來, 芝士味道唔會過咸, 鷄肉算幾嫩滑, 連芝士一齊食, 好邪惡呀...............
差不多食完個鷄煲, 侍應就會加湯作火煱湯底! 我地係呢個芝士配搭之選中叫左幾樣
新鮮牛頸脊 (小) ($188) - 份量多, 肉質望落幾新鮮, 稍為淥十幾秒就食得, 有肉味
鮮炸響鈴 ($48) - 每枱必叫食物, 淥十零秒就食得, 索晒D芝士湯底, 正!
手打五寶丸拼盤 ($88) - 每種各有兩粒, 包括墨魚, 鯪魚, 牛肉, 豬肉及蝦丸, 好足料, 個人推介蝦丸, 好彈牙
虎蝦 (6隻) ($88) - 好大隻, 絶對抵食, 肉質無"梅"
娃娃菜 (半份) ($18) - 好鮮甜, 估唔到搭芝士湯底都好夾喎!
有芝士湯底, 無理由唔叫個公仔面作結束架?! ($10)
尤如食緊韓國既芝士面咁.................好滿足呀^^
食完呢餐咁邪惡, 肥幾磅都抵既............哈!
地址 : 太子彌敦道761號太子藍馬之城2樓
contact me : gingerszeto@yahoo.com.hk
之前經過呢間泰廚泰國菜館門口已經被佢既串燒香味所吸引, 今次一於入去試下味道如何
店內面積唔大, 晚飯時間都坐滿八成, 有電視送飯都唔錯
見麥包宣傳單張, 仲有推介泰式辣蟹
辣蟹就下次先試, 今晚純粹普通晚飯就算, 先黎個前菜開下胃口先
酸辣鳯爪沙律($72)
鳯爪份量好足, 配料有爽汁洋蔥及大䓤, 味道唔太辣, 酸酸辣辣好味道
馬拉盞炒椰菜苗($75)
應該唔算係椰菜苗, 算係椰菜芯, 味道濃香, 送飯幾好
友人點左青咖喱鷄 ($80), 白飯另叫($10)
香滑青咖鷄, 唔辣, 份量夠2人食, 咖喱汁撈白飯, 好快見碗底
泰式鷄絲湯米($42), 轉冬蔭公湯底加$10
冬蔭公湯底絶對值得要試, 見到湯底有好多香茅及香葉, 酸辣湯味香濃, 配埋索晒湯汁米粉一齊食, 好味又飽肚, 食完成身暖笠笠
全店免收加一, 食物份量又夠, 都算幾抵食!
地址 : 旺角通菜街126號地下 (旺角地鐵B2 / B3出口 旺角道轉入(金魚街) )
contact me : gingerszeto@yahoo.com.hk
上星期出席左一個來自新加坡既新護膚品牌搞既活動, 認識左The FACE inc, 一同見證Eye Lift鑽石眼眸精華如何30秒還你煥發明眸。
品牌要員Wenda向我地介紹The FACE inc護膚品牌的核心概念是與科研創造無限的可能性，利用突破性科技不斷研製產品，能夠有效提供最專業的尖端科學化護理。強調集中利用最純正、最有效的成分結合成產品，其包含獨家高濃度活性成分，致力改善粉刺、暗瘡、色素沉澱、疤痕、細紋和皺紋等各種肌膚問題，全面改善肌膚健康，並秉著最高的商業道德標準，保證沒有在動物身上進行任何實驗或測試。
要建立一個簡單實用既護膚程序, Face Inc提倡只需4步系統: I潔淨, II修復, III喚醒, IV保護
而產品現時只供網上選購, 想知自己膚質適合咩類型產品? 只需回答網上皮膚醫生DR. REI既幾條簡單問題就可以
之後請出品牌星級代言人黃子晴小姐同我地分享佢對Eye Lift鑽石眼眸精華既用後感及美容心得
仲教埋我地用法同塗搽時手勢, Blogger表示用後眼部有提升感覺
呢款Eye Lift鑽石眼眸精華賣點能夠30秒瞬間令眼部緊緻提升, 淡化黑眼圈就需要長少少時間, 大約一至兩個月
每位出席者都有呢盒Eye Lift鑽石眼眸精華返去自己試用, 當然要急不及待試下
一盒有16支, 每支可用2-3次, 可用到一個月! 精華質地柔滑帶有香味, 搽上去好快就被皮膚所吸收, 眼肚位置會有被拉緊感覺, 期望用長D時間可減淡我既黑眼圈^^
網址 : www.thefaceinc.com/HK
產品由品牌提供, 內容純個人分享
contact me : gingerszeto@yahoo.com.hk
跟據非正式統計調查, 開甜品店係食店中最易/快賺錢既生意龍虎榜頭幾位! 需知道依加食個甜品既價錢都由三幾十蚊起, 用餐時間又唔會長, 即係回枱率高啦, 怪不知依加成行成市都開甜品店!
食得新奇又西式既甜品多, 又係掛念傳統中式糖水既時間啦, 食糖水?! 當然諗起佢啦
幾十年歷史, 獲推介無數, 最近仲得到米芝蓮推介, 唔怪之得條隊愈來愈長
無特別裝修, 零願放心機係食物上, 價錢絶對超值, 最貴都唔過$30
友人點木瓜燉雪耳 ($20), 滋潤一番 - 味道清甜, 食完喉嚨都舒服D! 若然加幾粒南北杏就更好
香滑芝麻糊($18) - 就咁睇都覺得滑, 無起粉粒, 甜度適中
呢個白果薏米腐竹 ($18)(另加鷄疍$2) 係我至愛 - 白果薏米好有咬口, 隻疍好有疍味, 呢$2絶對要加
可能受到米之蓮既推介影響, 不敵業主瘋狂加租, 黎緊將會3月1日搬遷至附近, 一於記低佢新店地址先!
現址 : 佐敦白加士街121-123號
contact me : gingerszeto@yahoo.com.hk
之前有朋友告知佐敦有間食醬油蟹好出名既韓國餐廳, 離遠已經見到門口排隊等食既人, 決定放棄! 行下行下又比我地見到呢間同名小店, 一於入去開餐
呢間小店(醬缸小食)主打似係家庭式經營, 店內亦有醬油蟹及蝦供應, 我地一行數人肚餓指數高, 叫飯餐食算數
落單後先送上三小碟伴菜
呢款係滑豆腐辣海鮮湯, 配白飯 - 熱辣辣上枱, 湯底味道似辛辣面湯底, 海鮮料有魷魚, 蜆等, 一路食, 一路流下鼻水, 辣得幾過癮, 凍天氣食時包你成身暖晒
我既至愛大醬湯, 即係韓國麵豉湯, 材料包括滑豆腐, 洋蔥, 翠玉瓜粒同蜆, 味道濃淡適中, 食完又唔覺口渴喎!
食完湯類, 叫返碟牛肉炒粉絲 - 牛肉份量都幾多, 粉絲又彈牙, 加埋面頭既芝麻, 提昇佢既香味
牛肉伴飯 - 份量頗多, 2人分享都OK, 加埋特有辣椒醬撈埋一齊食, 愈食愈想食
最後黎個韓式海鮮煎餅 - 煎餅煎到金黃色, 賣相討好, 材料亦都幾豐富, 輕易食到魷魚, 蝦, 餅邊食到香脆, 配少少辣椒醬一齊送入口............嗚....正呀~~
價錢親民, 食得滿足, 下次會再黎!
地址 : 佐敦吳松街159號地下
contact me : gingerszeto@yahoo.com.hk
朋友提議去九龍城開餐, 熱氣纏身決定唔食泰國菜, 行行下就就發現呢間精緻CAFE, 見門口餐牌食物價錢幾岩荷包, 一於試下
入到去見到佈置令人有返到屋企既舒服感覺, 四圍佈滿得意又好私人化既擺設, 可能呢D係CAFE應有既格局
侍應送上得意MENU, 封面好似讀書時期自畫既筆記薄咁, 見出店主心思
食物選擇都唔少, 由頭盤沙律, 意粉肉類到甜品都有, 仲提供花茶及特色咖啡飲品
我地決定每樣試D, 首先係頭盤炸珍寶磨菇配黑松露他他醬 ($68)
一份有7-8隻磨菇, 外皮香脆, 磨菇入口爆汁, 配埋黑松露他他醬一齊食, 好夾!
主菜先黎侍應推介既溫泉疍卡邦尼飲管粉($98)
份量唔細, 適合二人一齊食
特別既飲管粉第一次食, 中間係空心, 口感比食意粉較為硬D, 與溫泉疍汁撈埋一齊食, 好香滑又有咬口, 果然無介紹錯!
朋友想試牛, 咁就叫左美國安格斯有骨肉眼牛扒 ($248)
有16安士, 配菜有炸蕃薯薯條
我地點左七成熟, 切開時覺得熟左少少, 但肉質都唔覺好嚡口, 食到肉既原味, 配埋少少鹽一齊食都OK
配菜既炸蕃薯薯條, 份量唔細, 甜甜地好好味, 坊間好少食到, 最令人驚喜係炸得好乾身, 用手指拎黎食係完全無油留係手, 侍應透露由於係用新鮮油炸, 所以做到咁既效果!
呢款炸蕃薯薯條亦係頭盤之一, 只係$28, 絶對誠意推介
總括黎講, 呢間CAFE環境舒服, 唔會限你幾時要交枱, 侍應服務都幾細心, 食物質數亦唔錯, 回食度高!
地址 : 九龍城南角道55號地舖
contact me : gingerszeto@yahoo.com.hk
