回本食足150分鐘@初心

 呢幾日天氣好似秋天咁，舒服得令人興奮，而晚上仲覺得少少清涼，仲有興致去食火煱。加上假期前夕就想食餐火鍋放題，任飲任飲夠滿足。

 

呢間除咗有茶飲，晚市仲有150分鐘任食任飲火鍋放題。

 

各式凍飲可以自己去雪櫃拎，罐裝紙盒都有。

 

未食火鍋，先食招牌鷄煲 (可追加)，辣度入選，唔辣又唔係幾好食，就BB辣啦。

 

除咗鷄件，仲有紅綠椒加大量洋蔥及蔥去爆香，加埋豬皮去索惹味醬汁，呢一煲，好快被我地食晒。

 

再黎五款小食，每天不同，今晚有松露蝦多士，涼伴雲耳，麻辣鴨血，椒鹽三文魚頭腩及漬牛膀。

 

食緊麻辣鴨血之際，三文魚刺身送到。港人對佢又點可能抗拒?! 一啖一塊過吓口癮。

 

跟住就可以轉做火鍋時間啦，多款特色湯底選擇，最後都係還原基本步同下火之選，芫茜皮蛋湯是也。

打邊爐點少得海鮮?! 六款不定時轉款湊合成為海鮮拼盤。今晚”佳麗”為鮑魚，廣島蠔，龍躉片，蜆，蝦及翡翠螺。每款2隻/件，以冰底墊住保持鮮度。

鮑魚帶點厚度，入口夠彈牙。

 

廣島蠔烚完雖然變細咗，但蠔味幾出。

 

之後嘅任食類包括肥牛，黑豚肉，丸，菜，菇類，薯粉烏冬等

 

肥牛及黑豚肉肉色靚仔，脂肪比例平均，薄薄一片好快熟。

 

頭轉唔駛自己落單，侍應送上心水推介，例如年糕福袋，黃金魚腐，各式丸類及魚片頭。

 

呢款手打牛丸，大大粒

 

入口超濃牛味，肉汁爆射，推介。

 

仲要個蔬菜籃，色彩繽紛，菜心同娃娃菜都好甜。

 

食完幾轉都好飽，咪忘記仲有雪米糍做甜品呀。

 #foodie #foodblog #hotpot #allyoucaneat #TKO

晚餐食好D食平D@維港冰室

 呢區嘅茶餐廳/冰室數目比美旺角，途經見到呢間門面明亮同大間，望下電子餐牌晚市套餐都幾岩食。

 

內裏裝飾比較”金碧”，出菜位上放滿式日式威士忌，多卡坐位，坐得幾舒服，地面都幾乾淨。

 

小菜套餐包埋湯及白飯，是日餐湯係紅蘿蔔煲豬骨，好有親切感。

 

另加$12就有特飲，分別叫咗柚子及青檸梳打，大大杯又夠氣感，爽呀。

 

飲完湯，最先上枱係去骨水門海南鷄 ($129/半隻)

 

去埋骨啖啖肉，鷄皮唔食可輕易撕走，鷄肉幾嫩滑，點埋特色鷄醬汁一齊食，唔錯。

 

蔬菜類穩打之選，海皇什菜煲 ($93)，清清地有菜又有海鮮類。

 

有菜芯西蘭花，魷魚，厚切魚塊，蜆肉及蝦，加埋金菇粉絲大大煲，味道清甜。

 

平時少食魚，叫餸食飯蒸條魚都唔錯，茶餐廳多數都有豉汁蒸倉魚 ($99)，同樣即叫即蒸。

 

滿滿芫荽下就係豆豉，成條倉魚二人分享都夠食。倉魚唔多細骨，魚肉點豉汁好好送飯呀，趁熱快D食先。

 

無限用餐時間，小菜味道同酒樓出品唔差好遠，但價錢相宜好多，難怪入坐率都唔低。

#foodblog #foodiehk#CWB

 

出品確有一手@星橋居酒屋

 友人終於歐遊完返黎，約食飯兼送上手信。為咗方便佢放工過黎，飯聚於中環比較就腳，提出想食日本嘢。

 

呢間當區居酒屋價錢以中環黎講算親民貼地

 

昏暗燈光，坐位靠牆兩側，無日式七彩燈籠作裝飾，只有特色推介食物黑板掛於牆上。伴隨係半玻璃窗廚房及開放式酒吧。

 

下雨晚上除咗悶，仲有濕同熱，當呢一刻遇上呢客梅子蕃茄 ($58)，食完當場身心舒暢。飽滿多汁嘅蕃茄已經去皮，浸淫係甜中帶微酸嘅梅子汁入面，完全入晒味，凍食好醒神又開胃。

 

見隔離幾枱都有叫呢客螢光魷魚漬 ($58)，細細隻面頭加上薑蓉

 

夾住薑蓉食先食到有薑味，魷魚漬口感煙韌，帶點咸香，送酒都唔錯。

 

以鷄皮做餃子皮都係第一次食，呢客雞皮餃子 ($60)一客4隻，外型有別於一般嘅餃子。

 

另上自家製醬汁，味道似沙律醬不過係薄身D，襯煎炸類食物係適合嘅。

 

食完餃子，到佢嘅”皮”……………鷄皮 ($38)

 

燒得無晒皮下脂肪，只剩下香脆，似鷄皮味嘅脆片。

 

鷄類代表唔好停，鷄翼 ($45)，雞軟骨 ($35)及鷄頸肉 ($35)又岩岩燒好啦。

 

只睇外表都令人想食，燒鷄翼….我鍾意食，皮香肉嫩，調味岩岩好唔會某D位會好咸。

 

鷄軟骨係軟骨之間連住鷄肉，一啖有兩種唔同口感。

 

海鮮類出場，先有三文魚腩串 ($38)，切成條狀串住再燒，腩位嘅油份被”迫”出來，軟嫩嘅魚肉帶點油脂香，加上連帶少少脆感嘅魚皮，另一番口感。

 

再黎帆立貝串 ($52)，唧上沙律醬及及汁燒過。

 

有點厚度嘅主體，香甜鬆軟，加埋醬汁食有點似層相識嘅味道………………..係大阪燒呀，哈哈……

 

帶點厚切油揚 ($38)，揸住竹籤食都無問題，燒到外脆內嫩，再汁燒一下，甜甜地好味道。

 

只食鷄又唔得嘅，用蔬菜做串燒作間場，點咗秋葵($38)同甜薯($28)，唔會燒到收晒水份，只加添香味。

 

加點澱粉質，明太子芝士醬薯條 ($58)真係超邪惡，無辧法唔一條駁一條。

 

居酒屋食物就係可以點多幾款，慢慢叫，慢慢食，慢慢飲，享受一下放輕鬆感覺。

#foodblog #food #foodie #foodiehk #central #居酒屋

泰好食@泰好記

 依加星期六行旺角係比較少人咗，行得舒服咗，要幫手振興一下本地消費，係附近食埋晚飯先。 呢間新開張嘅泰菜店，被門口嘅菜式照片吸引住。望入去見店內卡位佔大多數，應該坐得幾舒服，就試下先。

 

套餐要直接同侍應落單，散叫嘅就可以掃二維碼。有兩款二人套餐，呢款 ($299)比較岩食。

 

送埋兩杯飲品，除咗椰青/啤酒唔叫得，沙冰類都可以。分別叫咗食泰菜必飲嘅青檸梳打及泰式凍檸檬茶，份量足夠成餐飲用，行到有D熱， 一飲爽晒。

 

呢客泰式木瓜絲沙律，主要材料係木瓜絲，口感爽脆，伴以甘荀絲及車厘茄，再淋上酸辣汁 (辣度都唔可以睇小)，酸辣味道令人開了胃口。

 

同行友人可以食辣，咁就可以選冬蔭公湯 (小)，每人至少可以飲2碗。

 

滿滿嘅菇菇同蝦隻，加埋香茅，南薑片，入口酸辣度唔會嗆喉又唔會過濃，係碗”斯文”版嘅冬蔭公湯。

 

炒通菜就好多地方有得食，黎泰菜店梗要選擇泰式炒椰菜苗。以豆醬，辣椒炒，惹味十足，苗真係苗，入口無渣的。

 

要飽肚感，炒飯/河類當然唔少得，二選一要泰式乾炒河 (豬/牛/雞)中嘅鷄肉炒。

 

炒得乾身之餘但唔會一口油，加埋蛋塊炒就仲香D。

 

另外散叫泰式燒鷄 ($85/半隻)，超抵食，半隻份量相當對眼。

 

燒得鷄皮香脆; 鷄肉即使係鷄胸位都唔嚡同乾，另有兩款特色醬汁點鷄食，個人比較歡喜個泰式燒鷄醬，酸甜味道配燒鷄正呀。

 

是日泰式甜品2件，都大約估到係糕點類，靚靚花花造型嘅斑蘭糕，入口有清香斑籣味，再加埋香甜椰漿，熱食增加軟糯感。

 

上菜速度幾快，眨下眼就成枱都係食物。味道唔錯又夠份量，要係九龍食泰菜，唔駛一定要去九龍城嘅。

#foodblog #foodpics #thaifood #foodblogger #foods #mk